മുന്‍ കാബിനറ്റ് സെക്രട്ടറി കെഎം ചന്ദ്രശേഖര്‍ നാളെ കൊച്ചിയില്‍
പതിനാലാമത് ധനം ബിസിനസ് സമിറ്റ് ആന്‍ഡ് അവാര്‍ഡ് നൈറ്റ്; ഡി-ഡെ 2022 ല്‍ മുഖ്യാതിഥിയായാണ് അദ്ദേഹമെത്തുന്നത്
മുന്‍ കാബിനറ്റ് സെക്രട്ടറി കെഎം ചന്ദ്രശേഖര്‍ നാളെ കൊച്ചിയിലെത്തുന്നു. ലെ മെറിഡിയന്‍ കണ്‍വെന്‍ഷന്‍ സെന്ററില്‍ നടക്കുന്ന പതിനാലാമത് ധനം ബിസിനസ് സമിറ്റ് ആന്‍ഡ് അവാര്‍ഡ് നൈറ്റ്; ഡി-ഡെ 2022 ല്‍ മുഖ്യാതിഥിയായി പങ്കെടുക്കാനാണ് അദ്ദേഹം കൊച്ചിയിലെത്തുന്നത്. കേരളത്തിലെ ബിസിനസ് സമൂഹം ഏറെ വിലമതിക്കുന്ന ധനം ബിസിനസ് എക്‌സലന്‍സ് അവാര്‍ഡുകളും അദ്ദേഹം സമ്മാനിക്കും.
നിലവില്‍ മുംബൈ, ഗുജറാത്ത്, ഡല്‍ഹി, ഒറീസ, കേരളം തുടങ്ങിയ ഇടങ്ങളിലായി വ്യാപിച്ചുകിടക്കുന്ന പത്തോളം കമ്പനികളുടെ ഡയറക്ടര്‍ ബോര്‍ഡംഗമാണ് കെഎം ചന്ദ്രശേഖര്‍. 1970 ലെ കേരള കേഡര്‍ ഐഎഎസ് ഉദ്യോഗസ്ഥനായ കെഎം ചന്ദ്രശേഖര്‍ സംസ്ഥാനത്തെ വ്യവസായ, ധനകാര്യ രംഗങ്ങളില്‍ പുതുമയാര്‍ന്ന പല ആശയങ്ങളും അവതരിപ്പിച്ച ബ്യൂറോക്രാറ്റ് കൂടിയാണ്. സിവില്‍ സര്‍വീസ് കരിയറിനിടെ 50-60 ഓളം കമ്പനികളുടെ ചീഫ് എക്‌സിക്യൂട്ടിവ് ഓഫീസര്‍/ ഡയറക്ടര്‍ ബോര്‍ഡ് പദവികള്‍ ഇദ്ദേഹം വഹിച്ചിട്ടുണ്ട്. ബിസിനസുകളെ ഇത്രയേറെ അടുത്തറിഞ്ഞിട്ടുള്ള ചന്ദ്രശേഖറാണ് കേരളത്തില്‍ മത്സ്യഫെഡ് സ്ഥാപനത്തിന് മുന്നില്‍ നിന്നത്. സ്‌പൈസസ് ബോര്‍ഡിന്റെ സ്ഥാപക ചെയര്‍മാനുമായിരുന്നു.
സര്‍വീസില്‍ നിന്ന് വിരമിക്കും മുമ്പ് ഇന്ത്യന്‍ അഡ്മിനിസ്‌ട്രേഷന്‍ സര്‍വീസിലെ സമുന്നത പദവിയായ യൂണിയന്‍ കാബിനറ്റ് സെക്രട്ടറിയായി നാല് വര്‍ഷത്തോളമാണ് സേവനമനുഷ്ഠിച്ചത്. ധനകാര്യമന്ത്രാലയത്തില്‍ റവന്യു സെക്രട്ടറി, വേള്‍ഡ് ട്രേഡ് ഓര്‍ഗനൈസേഷനില്‍ ഇന്ത്യന്‍ പ്രതിനിധി എന്നിവയെല്ലാം ഇദ്ദേഹം വഹിച്ച സുപ്രധാനപദവികളില്‍ ചിലതാണ്. കാബിനറ്റ് സെക്രട്ടറി പദം വഹിക്കുന്ന വേളയില്‍
മിലിറ്ററി, ടെററിസം, സാമ്പത്തിക പ്രതിസന്ധി, പ്രകൃതി ദുരന്തങ്ങള്‍ തുടങ്ങി നിരവധി വെല്ലുവിളികളുള്ള സാഹചര്യങ്ങളും കൈകാര്യം ചെയ്യേണ്ടി വന്നിട്ടുണ്ട്. സര്‍വീസില്‍ നിന്ന് വിരമിച്ച ശേഷം സംസ്ഥാന ആസൂത്രണ ബോര്‍ഡ് ചെയര്‍മാന്‍, സിഡിഎസ് ചെയര്‍മാന്‍ തുടങ്ങിയ പദവികളും ചന്ദ്രശേഖര്‍ വഹിച്ചിരുന്നു.
ചടങ്ങില്‍ ഓപ്പണ്‍ നെറ്റ്വര്‍ക്ക് ഫോര്‍ ഡിജിറ്റല്‍ കൊമേഴ്‌സി (ONDC) ന്റെ മാനേജിംഗ് ഡയറക്ടറും ചീഫ് എക്‌സിക്യൂട്ടിവ് ഓഫീസറുമായ ടി. കോശി മുഖ്യപ്രഭാഷണം നിര്‍വഹിക്കുക. കോവിഡ് സൃഷ്ടിച്ച രണ്ടുവര്‍ഷത്തെ ഇടവേളയ്ക്കു ശേഷം തിരിച്ചെത്തുന്ന ഡി-ഡെ, ചര്‍ച്ച ചെയ്യുന്നത് മാറിയ കാലത്തെ ബിസിനസ് സാഹചര്യങ്ങളും പുതിയ കാലത്ത് ബിസിനസ് രംഗത്ത് മുന്നേറാന്‍ വേണ്ട സാങ്കേതിക വിദ്യകളുമാണ്.
ധനം ബിസിനസ്മാന്‍ ഓഫ് ദി ഇയര്‍ 2021 പുരസ്‌കാരത്തിന് അര്‍ഹനായിരിക്കുന്നത് മലബാര്‍ ഗ്രൂപ്പ് ചെയര്‍മാന്‍ എംപി അഹമ്മദാണ്. ജ്യോതി ലാബ്‌സ് ലിമിറ്റഡ് മാനേജിംഗ് ഡയറക്ടര്‍ എംആര്‍ ജ്യോതിയെ വുമണ്‍ എന്റര്‍പ്രണര്‍ ഓഫ് ദി ഇയര്‍ 2021 ആയി തെരഞ്ഞെടുത്തു. മാന്‍ കാന്‍കോര്‍ ഇന്‍ഗ്രീഡിയന്‍സ് പ്രൈവറ്റ് ലിമിറ്റഡ് എക്‌സിക്യൂട്ടിവ് ഡയറക്ടറും ചീഫ് എക്‌സിക്യൂട്ടിവ് ഓഫീസറുമായ ജീമോന്‍ കോരയാണ് ഔട്ട്സ്റ്റാന്‍ഡിംഗ് ബിസിനസ് പ്രൊഫഷണല്‍ ഓഫ് ദി ഇയര്‍ 2021. ബ്രാഹ്‌മിന്‍സ് ഫുഡ്സ് മാനേജിംഗ് ഡയറക്ടര്‍ ശ്രീനാഥ് വിഷ്ണു എമര്‍ജിംഗ് എന്റര്‍പ്രണര്‍ ഓഫ് ദി ഇയര്‍ 2021 ന് അര്‍ഹനായി. യുഎഇയിലെ എസ്എഫ്സി ഗ്രൂപ്പ് ചെയര്‍മാന്‍ കെ മുരളീധരനാണ് ഔട്ട്സ്റ്റാന്‍ഡിംഗ് എന്‍ആര്‍ഐ ബിസിനസ്മാന്‍ ഓഫ് ദി ഇയര്‍ 2021. സ്റ്റാര്‍ട്ടപ്പ് ഓഫ് ദി ഇയര്‍ 2021 പുരസ്‌കാരത്തിന് ഓപ്പണിനെ തെരഞ്ഞെടുത്തു.