കാനറ ബാങ്കിന്റെ 91 ശാഖകള് കേരളത്തില് പ്രവര്ത്തനം നിര്ത്തുന്നു. സിന്ഡിക്കേറ്റ് ബാങ്ക് കാനറയില് ലയിപ്പിച്ചതിനെ തുടര്ന്നാണിത്. അടുത്തടുത്ത് സ്ഥിതി ചെയ്യുന്ന ബ്രാഞ്ചുകളാണ് പ്രവര്ത്തനം നിര്ത്തുന്നത്. ഈ ബ്രാഞ്ചുകളിലെ കോണ്ട്രാക്റ്റ് ജോലിക്കാര്ക്ക് ജോലി പോകും. എന്നാല് സ്ഥിരം ജോലിക്കാരെ പിരിച്ചുവിടില്ല. പുതിയ നിയമനങ്ങളും വൈകും. 2018 ലാണ് സിന്ഡിക്കേറ്റ് ബാങ്ക് കാനറ ബാങ്കില് ലയിപ്പിക്കാന് കേന്ദ്രസര്ക്കാര് തീരുമാനിച്ചത്. 10, 391 ബ്രാഞ്ചുകള്, 12, 829 എടിഎം കൗണ്ടറുകള് എന്നിവയാണ് ലയിപ്പിച്ച ശേഷം കാനറ ബാങ്കിനുള്ളത്.
കഴിഞ്ഞ വര്ഷം ആഗസ്റ്റിലാണ് ബാങ്കുകളുടെ ലയനം കേന്ദ്രസര്ക്കാര് പ്രഖ്യാപിച്ചത്. ആന്ധ്ര ബാങ്ക്, കോര്പറേഷന് ബാങ്ക് എന്നിവ യൂണിയന് ബാങ്ക് ഓഫ് ഇന്ത്യയിലാണ് ലയിപ്പിച്ചത്. സിന്ഡിക്കേറ്റ് ബാങ്ക് കാനറയിലും. യുനൈറ്റഡ് ബാങ്ക് ഓഫ് ഇന്ത്യ, ഓറിയന്റല് ബാങ്ക് ഓഫ് കൊമേഴ്സ് എന്നിവ പഞ്ചാബ് നാഷണല് ബാങ്കില് ലയിപ്പിച്ചു. അലഹാബാദ് ബാങ്ക് ഇന്ത്യന് ബാങ്കിലും ലയിപ്പിച്ചാണ് സര്ക്കാര് ഉത്തരവിറക്കിയത്.
ബാങ്കുകളുടെ ലയനം മൂലം ജീവനക്കാര്ക്ക് ജോലി നഷ്ടമാകില്ലെന്ന് കേന്ദ്രസര്ക്കാര് നേരത്തെ അറിയിച്ചിരുന്നെങ്കിലും കരാര് അടിസ്ഥാനത്തിലും ദിവസക്കൂലിക്കും ജോലി ചെയ്യുന്നവര്ക്ക് ജോലി നഷ്ടമാകും. മാത്രമല്ല, പുതിയ നിയമനം ഇനി സമീപ ഭാവിയില് നടക്കില്ല. നിലവില് അടച്ചുപൂട്ടുന്ന ബ്രാഞ്ചിലെ ജീവനക്കാരെ മറ്റു ബ്രാഞ്ചുകളില് വിന്യസിക്കുകയാണ് ചെയ്യുക.
പ്രവര്ത്തനം അവസാനിപ്പിക്കുന്ന ബ്രാഞ്ചുകള് -
തിരുവനന്തപുരം സ്റ്റാച്യൂ (എം), ചാല, കഴക്കൂട്ടം, പേരൂർക്കട, മുട്ടത്തറ (എച്ച്.എഫ്.ബി), പേട്ട, ശാസ്തമംഗലം, തിരുമല, ലോക്കൽ, കാരക്കോണം, കാട്ടാക്കട, നെടുമങ്ങാട്, കിളിമാനൂർ, കുണ്ടറ, പുനലൂർ, ആയൂർ, പന്തളം, തിരുവല്ല, പത്തനംതിട്ട, അടൂർ, കോന്നി, കോഴഞ്ചേരി, ആലപ്പുഴ, കായംകുളം, ചെങ്ങന്നൂർ, മാന്നാർ, ചേർത്തല, എടത്വ, അമ്പലപ്പുഴ, ഹരിപ്പാട്, കടുത്തുരുത്തി, പൊൻകുന്നം, കറുകച്ചാൽ, കുറുവിലങ്ങാട്, കോട്ടയം കഞ്ഞിക്കുഴി,
എറണാകുളം ഷൺമുഖം റോഡ് (മെയിൻ), കാക്കനാട്, അങ്കമാലി ഉദ്യമി മിത്ര, പെരുമ്പാവൂർ, മൂവാറ്റുപുഴ, കോലഞ്ചേരി, കളമശ്ശേരി, കോതമംഗലം, പിറവം, മരട്, ചാലക്കുടി, ഗുരുവായൂർ, ഇരിങ്ങാലക്കുട, കൊടുങ്ങല്ലൂർ, കുന്നംകുളം, മുളങ്കുന്നത്തുകാവ് (പുഴയ്ക്കൽ), മാള, വലപ്പാട്. ചെർപുളശ്ശേരി, പട്ടാമ്പി, മലപ്പുറം, കോട്ടക്കൽ, കൊണ്ടോട്ടി, മഞ്ചേരി സ്പെഷലൈസ്ഡ് എസ്.എം.ഇ, വളാഞ്ചേരി, നിലമ്പൂർ, തിരൂർ (തൃക്കണ്ടിയൂർ), വടകര, ബാലുശ്ശേരി,
കോഴിക്കോട് ചെറൂട്ടി റോഡ് (മെയിൻ), മാവൂർ റോഡ്, കൊടുവള്ളി, പായന്തോങ്ങ്, ഓർക്കാട്ടേരി, കൊയിലാണ്ടി, താമരശ്ശേരി, പേരാമ്പ്ര, പാനൂർ, മട്ടന്നൂർ, ഇരിട്ടി, മാഹി, കൽപറ്റ, ബത്തേരി, പനമരം, പഴയങ്ങാടി (മുട്ടം), പയ്യന്നൂർ, തളിപ്പറമ്പ്, ചിറക്കൽ, കണ്ണപുരം, ചക്കരക്കൽ (അഞ്ചരക്കണ്ടി), അഴീക്കോട് സൗത്ത്, ചെങ്ങള, പെരിയ, തൃക്കരിപ്പൂർ, കാസർകോട്.
Read DhanamOnline in English
Subscribe to Dhanam Magazine
