ജോലി വേഗത്തില്‍ തീര്‍ക്കാന്‍ ഇന്ന് ആര്‍ട്ടിഫിഷ്യല്‍ ഇന്റലിജന്‍സ് (AI) ടൂളുകളെ ആശ്രയിക്കാത്തവര്‍ ചുരുക്കമാണ്. എന്നാല്‍ ഈ വേഗതയ്ക്ക് പിന്നില്‍ ഓഫീസുകളില്‍ പടരുന്ന പുതിയൊരു പ്രതിസന്ധിയെക്കുറിച്ച് എത്രപേര്‍ക്കറിയാം? കോര്‍പ്പറേറ്റ് ലോകം ഇപ്പോള്‍ ഗൗരവമായി ചര്‍ച്ച ചെയ്യുന്ന ആ പുതിയ പ്രതിഭാസമാണ് 'വര്‍ക്ക്സ്ലോപ്പ്' (Workslop). എഐ ടൂളുകള്‍ ഉപയോഗിച്ച് നിമിഷനേരം കൊണ്ട് തയ്യാറാക്കുന്ന, കാണാന്‍ നല്ല ഭംഗിയുള്ളതെങ്കിലും ഉള്ളടക്കത്തില്‍ യാതൊരു കാമ്പും ഇല്ലാത്തതുമായ ഔട്ട്പുട്ടുകളെയാണ് 'വര്‍ക്ക്സ്ലോപ്പ്' എന്ന് വിശേഷിപ്പിക്കുന്നത്.
ഇന്ന് നാലിലൊന്ന് ജീവനക്കാരും ഇത്തരം എഐ നിര്‍മ്മിത ജോലികളും റിപ്പോര്‍ട്ടുകളും സഹപ്രവര്‍ത്തകര്‍ക്കും മേലധികാരികള്‍ക്കും അയച്ചുകൊടുക്കുന്നുണ്ട്. എന്നാല്‍ ഇത്തരം വര്‍ക്കുകള്‍ യഥാര്‍ത്ഥത്തില്‍ കമ്പനിയുടെ ഉല്‍പ്പാദനക്ഷമതയെയല്ല തകര്‍ക്കുന്നത്, മറിച്ച് ജീവനക്കാരുടെ വിലപ്പെട്ട സമയത്തെയാണ്. ഇത്തരം അപൂര്‍ണവും അര്‍ത്ഥശൂന്യവുമായ വിവരങ്ങള്‍ ലഭിക്കുന്ന സ്വീകര്‍ത്താവിന്, അത് ശരിയാക്കിയെടുക്കാന്‍മാത്രം ദിവസവും രണ്ട് മണിക്കൂറോളം അധികമായി മാറ്റിവെക്കേണ്ടി വരുന്നു എന്നതാണ് സത്യം.
ബെറ്റര്‍അപ് ലാബ്‌സും (BetterUp Labs) സ്റ്റാന്‍ഫോര്‍ഡ് സോഷ്യല്‍ മീഡിയ ലാബ്‌സും ചേര്‍ന്ന് നടത്തിയ പുതിയ പഠനം വിരല്‍ ചൂണ്ടുന്നത് വലിയൊരു അപകടത്തിലേക്കാണ്. എഐ ഉപയോഗം ടീമുകളുടെ ജോലിയുടെ ഗുണനിലവാരം കൂട്ടിയെന്ന് 66 ശതമാനം ജീവനക്കാര്‍ സമ്മതിക്കുന്നുണ്ടെങ്കിലും, സഹപ്രവര്‍ത്തകര്‍ തമ്മിലുള്ള വിശ്വാസവും പരസ്പര സഹകരണവും 20 ശതമാനത്തിലധികം ഇടിഞ്ഞിരിക്കുന്നു എന്നാണ് പഠനം വ്യക്തമാക്കുന്നത്.
ഓഫീസില്‍ തൊട്ടടുത്തുള്ള സഹപ്രവര്‍ത്തകനോട് ഒരു സംശയം ചോദിക്കാന്‍ മടിച്ച്, അല്ലെങ്കില്‍ വേഗത്തില്‍ ഉത്തരം കിട്ടാന്‍ വേണ്ടി ഇന്ന് പലരും മനുഷ്യര്‍ക്ക് പകരം എഐ ചാറ്റ്ബോട്ടിനെയാണ് സമീപിക്കുന്നത്. എന്നാല്‍ ഈ പ്രവണത ടീമിന്റെ കൂട്ടായ്മയെ പൂര്‍ണ്ണമായും തകര്‍ക്കുന്നു. സഹപ്രവര്‍ത്തകരേക്കാള്‍ എഐയെ മാത്രം ആശ്രയിക്കുമ്പോള്‍ തൊഴിലിടങ്ങളില്‍ അകല്‍ച്ച വര്‍ധിക്കുകയും, ഇത് കമ്പനികള്‍ക്ക് വന്‍ സാമ്പത്തിക നഷ്ടം ഉണ്ടാക്കുകയും ചെയ്യുന്നുണ്ട്.
ഒരു മികച്ച എഐ ടൂളിന് നിങ്ങളുടെ ജോലിയുടെ 30 ശതമാനം മാത്രമേ സഹായിക്കാനാകൂ. ബാക്കി 70 ശതമാനവും വിജയിക്കുന്നത് നിങ്ങളുടെ സ്വന്തം ചിന്താഗതിയും, സഹപ്രവര്‍ത്തകരുമായുള്ള പരസ്പര വിശ്വാസവും കൊണ്ടാണ്. വര്‍ക്ക്സ്ലോപ്പുകളുടെ ഈ കുത്തൊഴുക്ക് തടയാന്‍ മനുഷ്യന്റെ സ്വന്തം സര്‍ഗാത്മകതയ്ക്കും ക്രിട്ടിക്കല്‍ തിങ്കിംഗിനും പ്രാധാന്യം നല്‍കേണ്ടത് അത്യാവശ്യമാണെന്ന് കമ്പനികള്‍ തിരിച്ചറിഞ്ഞു തുടങ്ങിയിട്ടുണ്ട്.
ഇതിന്റെ ഭാഗമായി, സ്വന്തം ബുദ്ധിയും നല്ല തീരുമാനങ്ങളും (Sound Judgment) ഉപയോഗിച്ച് ജോലി ചെയ്യുന്ന ജീവനക്കാരെ പ്രോത്സാഹിപ്പിക്കാന്‍ ചില കമ്പനികള്‍ പ്രത്യേക പാരിതോഷികങ്ങളും ബോണസുകളും നല്‍കിത്തുടങ്ങിയിട്ടുണ്ട്. എഐ തരുന്ന വിവരങ്ങളെ കണ്ണടച്ച് വിശ്വസിക്കാതെ, സ്വന്തം ചിന്താശേഷി ഉപയോഗിച്ച് ജോലി ചെയ്യുന്നതാണ് ഓഫീസുകളില്‍ യഥാര്‍ത്ഥ വിജയം സമ്മാനിക്കുന്നത്.
As 25% of employees rely on AI-generated outputs and reports, modern workplaces face a new crisis called 'Workslop' that erodes team trust and productivity.
Read DhanamOnline in English
Subscribe to Dhanam Magazine