ഒരു ദിവസം എത്ര ജോലി പൂര്‍ത്തിയാക്കി എന്നതല്ല ഉല്‍പാദനക്ഷമത (Productivity). നമ്മുടെ ലക്ഷ്യത്തിലേക്ക് യഥാര്‍ഥത്തില്‍ മുന്നോട്ടു നയിച്ച ജോലി ഏതാണ്? അതാണ് കാര്യം. ഇന്ത്യയില്‍ അധികം പരിചിതമല്ലാതിരുന്ന പാഡല്‍ എന്ന കായിക ഇനത്തെ ഒരു ബിസിനസ് അവസരമായി വളര്‍ത്തിയ PadelPark India സഹസ്ഥാപകന്‍ നിഖില്‍ സച്ദേവിന്റെ പ്രവര്‍ത്തനരീതിയുടെ കാതലും ഇതുതന്നെ.
ടെന്നിസിന്റെയും സ്‌ക്വാഷിന്റെയും സവിശേഷതകള്‍ ചേര്‍ന്ന റാക്കറ്റ് സ്‌പോര്‍ട്ടാണ് പാഡല്‍. ആദ്യമായി കളിച്ചപ്പോള്‍ തന്നെ അതിന്റെ മത്സരാവേശവും ആളുകളെ ഒന്നിപ്പിക്കുന്ന സാമൂഹിക സ്വഭാവവും നിഖിലിനെ ആകര്‍ഷിച്ചു. എന്നാല്‍ അന്ന് ഇന്ത്യയില്‍ ഈ കായിക ഇനത്തെക്കുറിച്ച് അറിയുന്നവര്‍ വളരെ കുറവായിരുന്നു.
വിപണിയില്‍ ഒരു ട്രെന്‍ഡ് രൂപപ്പെട്ടശേഷം അതിന്റെ പിന്നാലെ പോകുകയായിരുന്നില്ല നിഖില്‍. ട്രെന്‍ഡ് ഉണ്ടാകുന്നതിന് മുമ്പുതന്നെ അതിന്റെ സാധ്യതയില്‍ വിശ്വസിക്കുകയായിരുന്നു. അംഗീകാരമോ വിജയമാതൃകയോ മുന്നിലില്ലാത്ത സാഹചര്യത്തില്‍ എടുക്കുന്ന അത്തരം തീരുമാനങ്ങള്‍ സംരംഭകനെ വലിയ സമ്മര്‍ദ്ദത്തിലാക്കും. എന്നിട്ടും താല്‍ക്കാലിക നേട്ടങ്ങളേക്കാള്‍ ദീര്‍ഘകാല മൂല്യം സൃഷ്ടിക്കുന്നതിലാണ് അദ്ദേഹം ശ്രദ്ധിച്ചത്.
ഒരു പുതിയ കായിക ഇനം വളരണമെങ്കില്‍ ആദ്യം വേണ്ടത് അടിസ്ഥാന സൗകര്യങ്ങളാണ്. അതുകൊണ്ട് കോര്‍ട്ടുകള്‍ നിര്‍മിക്കുന്നതിനൊപ്പം പരിശീലനം, തുടക്കക്കാര്‍ക്കുള്ള സെഷനുകള്‍, അക്കാദമികള്‍, മത്സരങ്ങള്‍, സമൂഹകേന്ദ്രിത പരിപാടികള്‍ എന്നിവയും PadelPark വികസിപ്പിച്ചു.
2023ല്‍ ഇന്ത്യയിലുണ്ടായിരുന്ന പാഡല്‍ കോര്‍ട്ടുകളുടെ എണ്ണം 70നടുത്ത്. 2026ന്റെ തുടക്കത്തോടെ അത് 300 കടന്നു. യുവാക്കളുടെ ഫിറ്റ്നസ് താല്‍പര്യവും എളുപ്പത്തില്‍ പഠിക്കാനാകുന്ന കളിയെന്ന സവിശേഷതയും കോര്‍പറേറ്റ് പിന്തുണയും ഈ വളര്‍ച്ചയ്ക്ക് കരുത്തായി.
സെപ്റ്റംബര്‍ 19 മുതല്‍ ഒക്ടോബര്‍ നാലുവരെ ജപ്പാനിലെ ഐച്ചി-നഗോയയില്‍ നടക്കുന്ന ഏഷ്യന്‍ ഗെയിംസില്‍ മെഡല്‍ ഇനമായി പാഡല്‍ ഉള്‍പ്പെടുത്തിയിട്ടുണ്ട്. പാഡല്‍ പാര്‍ക്കിന്റെ ദീര്‍ഘകാല കാഴ്ചപ്പാടിന് പുതിയ പ്രസക്തി നല്‍കുന്നതാണ് ഈ അംഗീകാരം.
വളരുന്ന ഒരു സ്ഥാപനത്തില്‍ ഓരോ ദിവസവും ശ്രദ്ധ ആവശ്യപ്പെടുന്ന നിരവധി കാര്യങ്ങളുണ്ടാകും. എല്ലാ ജോലികളും ഒരുപോലെ പ്രധാനമാണെന്ന തോന്നലും ഉണ്ടാകും. പക്ഷേ എല്ലാം ചെയ്യാനുള്ള ശ്രമം പുരോഗതിയാകണമെന്നില്ല -അതാണ് നിഖിലിന്റെ നിരീക്ഷണം. ഉല്‍പ്പാദനക്ഷമത എന്നത് ജോലിയുടെ അളവല്ല, ശ്രദ്ധയാണ്.
ദിവസം മുഴുവന്‍ തിരക്കിലായിരിക്കുക എളുപ്പമാണ്. എന്നാല്‍ സ്ഥാപനത്തെ മുന്നോട്ടു നയിക്കുന്ന രണ്ടോ മൂന്നോ കാര്യങ്ങള്‍ ഏതാണെന്ന് തിരിച്ചറിയുക അത്ര എളുപ്പമല്ല. ആ വ്യക്തത ലഭിച്ചാല്‍ 'ചെയ്ത ജോലികളുടെ എണ്ണം' എന്നതിനേക്കാള്‍ 'സൃഷ്ടിച്ച മാറ്റം' പ്രധാനമാകും.
വിശ്വസിക്കാവുന്നൊരു ടീമിനെ വളര്‍ത്തുന്നതും ഉല്‍പാദനക്ഷമതയുടെ ഭാഗമാണെന്ന് നിഖില്‍ പറയുന്നു. എല്ലാ തീരുമാനങ്ങളും ഒരാള്‍ തന്നെ എടുക്കുന്ന സ്ഥാപനത്തിന് വളരാന്‍ കഴിയില്ല. ഉത്തരങ്ങള്‍ പറഞ്ഞുകൊടുക്കുന്നതിനു പകരം സ്വതന്ത്രമായി ചിന്തിക്കാനും ഉത്തരവാദിത്തം ഏറ്റെടുക്കാനും പരീക്ഷണങ്ങളിലൂടെ പഠിക്കാനും സഹപ്രവര്‍ത്തകരെ പ്രാപ്തരാക്കുകയാണ് യഥാര്‍ഥ മെന്റര്‍ഷിപ്പ്.
നിഖിലിന്റെ ദിവസങ്ങള്‍ നേരത്തെയാണ് ആരംഭിക്കുന്നത്. ചിട്ടപ്പെടുത്തിയ പ്രഭാതവും ഏതെങ്കിലും തരത്തിലുള്ള ശാരീരിക വ്യായാമവും അദ്ദേഹത്തിന്റെ പതിവാണ്. ബിസിനസിലെ ഫോണ്‍കോളുകളും യോഗങ്ങളും അടിയന്തര തീരുമാനങ്ങളും ആരംഭിക്കുന്നതിനുമുമ്പുള്ള ഈ സമയം മനസ്സിനെ 'റീസെറ്റ്' ചെയ്യുന്നു.
സമയം കൂടുതല്‍ കരുതലോടെ ക്രമീകരിക്കാനും ജോലിയും വ്യക്തിപരമായ ക്ഷേമവും തമ്മിലുള്ള സന്തുലനം സംരക്ഷിക്കാനും കോവിഡ് കാലം അദ്ദേഹത്തെ പഠിപ്പിച്ചു. ദീര്‍ഘകാലത്തേക്ക് എന്തെങ്കിലും പടുത്തുയര്‍ത്തുമ്പോള്‍ വേഗം മാത്രം പോരാ; തുടര്‍ന്നു കൊണ്ടുപോകാനുള്ള ശാരീരികവും മാനസികവുമായ കരുത്തും വേണം.
ഉടന്‍ ഫലം നല്‍കുന്ന കാര്യങ്ങള്‍ക്കാണ് പലപ്പോഴും നമ്മള്‍ മുന്‍ഗണന നല്‍കുന്നത്. എന്നാല്‍ വലിയ നേട്ടങ്ങള്‍ രൂപപ്പെടുന്നത് ദിവസേന ആവര്‍ത്തിക്കുന്ന ചെറിയ ശരിയായ തീരുമാനങ്ങളില്‍ നിന്നാണ്. ഉടന്‍ കൈയടി ലഭിക്കാത്ത തീരുമാനങ്ങളും കാലം കഴിയുമ്പോള്‍ വലിയ മൂല്യമായി മാറാം.
നിഖില്‍ സച്ദേവിന്റെ യാത്ര നല്‍കുന്ന സന്ദേശം ലളിതമാണ്: എല്ലാം ചെയ്യാന്‍ ശ്രമിക്കേണ്ടതില്ല. നിങ്ങളുടെ ലക്ഷ്യത്തിന് ഏറ്റവും പ്രധാനപ്പെട്ടത് കണ്ടെത്തുക.
അതില്‍ പൂര്‍ണശ്രദ്ധയോടെ തുടരുക. തിരക്കുള്ളതായി കാണപ്പെടുന്നതല്ല വിജയം. ഓരോ ദിവസവും ശരിയായ ദിശയില്‍ ഒരു ചുവടെങ്കിലും മുന്നോട്ടുവയ്ക്കുന്നതാണ് യഥാര്‍ഥ ഉല്‍പ്പാദനക്ഷമത.
Read DhanamOnline in English
Subscribe to Dhanam Magazine