ജീവിതത്തിലും കരിയറിലും വിജയക്കൊടി പാറിക്കാന് എല്ലാവരും ആഗ്രഹിക്കുന്ന ഒന്നാണ് ആത്മവിശ്വാസം. എന്നാല് എവിടെ നിന്നാണ് ഈ ആത്മവിശ്വാസം തുടങ്ങുന്നത്? പുതിയൊരു ബിസിനസ് ആരംഭിക്കുമ്പോഴോ അല്ലെങ്കില് മുന്പരിചയമില്ലാത്ത ഒരു ഉയര്ന്ന തസ്തികയിലേക്ക് പ്രൊമോഷന് ലഭിക്കുമ്പോഴോ എങ്ങനെ പൂര്ണ്ണ ആത്മവിശ്വാസത്തോടെ പെരുമാറാനാകും? ബാഹ്യമായ നേട്ടങ്ങളല്ല, മറിച്ച് സ്വന്തം അപൂര്ണ്ണതകളെയും പരിമിതികളെയും ഭയമില്ലാതെ സ്വീകരിക്കാനുള്ള കഴിവാണ് യഥാര്ത്ഥ ആത്മവിശ്വാസമെന്ന് പ്രശസ്ത എഴുത്തുകാരനായ മാര്ക്ക് മാന്സണ് ചൂണ്ടിക്കാണിക്കുന്നു.
പലപ്പോഴും ആളുകള് ചിന്തിക്കുന്നത് വിജയവും അംഗീകാരങ്ങളും ലഭിച്ചാല് മാത്രമേ ആത്മവിശ്വാസം ഉണ്ടാവൂ എന്നാണ്. എന്നാല് ആത്മവിശ്വാസമില്ലാതെ വിജയിക്കാനും സാധിക്കില്ലെന്നത് നമ്മെ ഒരു കുരുക്കില് കൊണ്ടുചെന്നെത്തിക്കുന്നു. എന്നാല് യാഥാര്ത്ഥ്യം അതല്ല. കോടികളുടെ ആസ്തിയുള്ള വ്യവസായികള്ക്കും വലിയ പ്രശസ്തിയുള്ള പ്രൊഫഷണലുകള്ക്കും അവരുടെ കഴിവില് ചിലപ്പോള് വലിയ സംശയങ്ങള് ഉണ്ടാകാറുണ്ട്. അതിനാല് വലിയൊരു ബിസിനസ് വളര്ച്ചയോ പ്രൊമോഷനോ ലഭിക്കുന്നത് പെട്ടെന്ന് ആത്മവിശ്വാസം കൂട്ടണമെന്നില്ല, മറിച്ച് ഉത്തരവാദിത്തങ്ങള് കൂടുമ്പോള് അത് കുറയാനും സാധ്യതയുണ്ട്. തനിക്ക് ഒരു കുറവുമില്ലെന്നും ഏത് സാഹചര്യത്തെയും നേരിടാന് താന് പ്രാപ്തനാണെന്നുമുള്ള മാനസികാവസ്ഥയാണ് യഥാര്ത്ഥത്തില് ആത്മവിശ്വാസം.
പലരും ആത്മവിശ്വാസം വര്ധിപ്പിക്കാന് തെറ്റായ രണ്ടു വഴികളാണ് തിരഞ്ഞെടുക്കുന്നത്. കഴിവില്ലെങ്കിലും ഞാന് മികച്ചവനാണ് എന്ന് സ്വയം വിശ്വസിപ്പിക്കാന് ശ്രമിക്കുന്നതാണ് ഒന്നാമത്തേത്. ഇത് പലപ്പോഴും അഹങ്കാരത്തിലേക്കോ വാസ്തവവിരുദ്ധമായ തീരുമാനങ്ങളിലേക്കോ ആണ് നയിക്കുക. രണ്ടാമതായി, വസ്ത്രധാരണത്തിലോ സംസാരരീതിയിലോ മാറ്റം വരുത്തി ആത്മവിശ്വാസം അഭിനയിക്കാന് ശ്രമിക്കുന്ന രീതിയാണ്. ഇത് കുറച്ചു സമയത്തേക്ക് സഹായിച്ചേക്കാമെങ്കിലും വ്യക്തിപരമായ ഭയങ്ങളെ മാറ്റാന് ഇത്തരം ബാഹ്യമാറ്റങ്ങള്ക്ക് കഴിയില്ല.
മാര്ക്ക് മാന്സന്റെ അഭിപ്രായത്തില്, തന്റെ കുറവുകളെയും തിരിച്ചടികളെയും ഭയമില്ലാതെ അഭിമുഖീകരിക്കാന് കഴിയുന്നിടത്താണ് യഥാര്ത്ഥ ആത്മവിശ്വാസം വളരുന്നത്. ബിസിനസില് വലിയ ആത്മവിശ്വാസമുള്ള സംരംഭകര് പരാജയങ്ങളെ പുതിയൊരു പാഠമായി മാത്രമാണ് കാണുന്നത്. കരിയറിലോ ബിസിനസ് ഡീലുകളിലോ ഉണ്ടാകുന്ന നിരസിക്കലുകള് വ്യക്തിപരമായ പരാജയമല്ല എന്ന് തിരിച്ചറിയുന്നിടത്താണ് ഒരാള് കൂടുതല് വളരുന്നത്. നഷ്ടങ്ങള് ഉണ്ടാകാനുള്ള സാധ്യതയെ മുന്കൂട്ടി കണ്ട് അതിനെ നേരിടാന് തയ്യാറാകുമ്പോഴാണ് തടസങ്ങളില്ലാതെ ശക്തമായ തീരുമാനങ്ങള് എടുക്കാന് കഴിയുന്നത്.
നല്ല അനുഭവങ്ങള് മാത്രമല്ല, മോശം അനുഭവങ്ങളെയും സ്വാഭാവികമായി നേരിടാന് തയ്യാറാകുമ്പോഴാണ് നാം കൂടുതല് കരുത്തരാകുന്നത്. പരിമിതികള് ഒരു തിരിച്ചടിയല്ലെന്നും അതിനെ മറികടക്കാന് സാധിക്കുമെന്നുമുള്ള തിരിച്ചറിവാണ് ഏതൊരു സംരംഭകനും പ്രൊഫഷണലിനും ആവശ്യമായ ഏറ്റവും വലിയ ആത്മവിശ്വാസം.
Author Mark Manson highlights that true confidence in life and business comes from accepting failure and personal flaws without fear.
Read DhanamOnline in English
Subscribe to Dhanam Magazine
