ടെക്നോളജി സ്ഥാപനങ്ങൾ നിര്മിത ബുദ്ധി (AI) പരിശീലനം ലഭിച്ച പ്രൊഫഷണലുകളുടെ വലിയ ക്ഷാമം നേരിടുന്നു. 2027 ഓടെ ഇന്ത്യയിലെ എ.ഐ മേഖലയില് 23 ലക്ഷം തൊഴിലവസരങ്ങൾ സൃഷ്ടിക്കപ്പെടുമെന്നാണ് പ്രതീക്ഷിക്കുന്നത്. 15 മുതല് 20 ശതമാനം തൊഴിലാളികൾക്ക് മാത്രമാണ് നിര്മിത ബുദ്ധിയില് നിലവില് പ്രവര്ത്തന പരിചയമുളളത്. ഈ വിടവ് സോഫ്റ്റ്വെയർ സ്ഥാപനങ്ങള് അടക്കമുളള ടെക്നോളജി കമ്പനികളില് വലിയ പ്രതിസന്ധി സൃഷ്ടിക്കുമെന്നാണ് വിലയിരുത്തുന്നത്.
നിര്മിത ബുദ്ധിയുടെ വർദ്ധിച്ചുവരുന്ന ആവശ്യകതയുമായി പൊരുത്തപ്പെടാൻ നിലവിലെ തൊഴില് ശക്തിക്ക് കഴിയാത്ത സാഹചര്യവും സൃഷ്ടിക്കപ്പെടുന്നുണ്ട്. എ.ഐ മോഡലുകൾ നിർമ്മിക്കുന്നതിലും പരിശീലിപ്പിക്കുന്നതിലും വിന്യസിക്കുന്നതിലും വൈദഗ്ധ്യമുള്ള എഞ്ചിനീയർമാരുടെയും എ.ഐ സംവിധാനങ്ങൾക്കൊപ്പം പ്രവർത്തിക്കാൻ കഴിവുള്ള മാനേജര്മാരായ പ്രൊഫഷണലുകളുടെയും ആവശ്യകതയാണ് റിപ്പോര്ട്ട് ചെയ്യപ്പെടുന്നത്. പ്രത്യേക എ.ഐ കഴിവുകളുള്ള പുതുമുഖങ്ങൾക്ക് സ്റ്റാൻഡേർഡ് എൻട്രി ലെവൽ ശമ്പളത്തിന്റെ നാലിരട്ടി വരെ പ്രമുഖ കമ്പനികള് വാഗ്ദാനം ചെയ്യുന്നുണ്ട്.
എച്ചസിഎല് ടെക് (HCLTech) പോലുള്ള വലിയ ഐടി കമ്പനികളും പബ്ലിസിസ് സാപിയന്റ് (Publicis Sapient) പോലുള്ള ഡിജിറ്റൽ എഞ്ചിനീയറിംഗ് സ്ഥാപനങ്ങളും എ.ഐ സ്റ്റാർട്ടപ്പുകളും ഒരുപോലെ നിര്മിതബുദ്ധിയില് വൈദഗ്ധ്യമുളള തൊഴിലാളികളുടെ ക്ഷാമം നേരിടുന്നു. യുഎസ്, ചൈന തുടങ്ങിയ രാജ്യങ്ങൾക്ക് തുല്യമായി അടിസ്ഥാന എ.ഐ മോഡലുകൾ നിർമ്മിക്കുന്നതിന് പരിമിതമായ ഗവേഷണ അടിസ്ഥാന സൗകര്യങ്ങളും ധനസഹായവും ഇന്ത്യയെ തടയുന്നു. രണ്ട് വർഷം മുമ്പ് നിലവിലില്ലായിരുന്ന എ.ഐ സാങ്കേതിക വിദ്യയാണ് ഇപ്പോള് പ്രചാരത്തിലുളളത്. എ.ഐ ക്ക് ഒരു നിശ്ചിത പാഠ്യപദ്ധതിയില്ല എന്നതും കമ്പനികളെയും ഉദ്യോഗാര്ത്ഥികളെയും കുഴക്കുന്നു.
2019 മുതൽ എ.ഐ ജോലി നിയമനങ്ങളില് പ്രതിവർഷം 21 ശതമാനത്തിന്റെ വർദ്ധനവാണ് ഉളളത്. ശമ്പളത്തില് 11 ശതമാനത്തിന്റെ വർദ്ധനയും ഉണ്ടായിട്ടുണ്ട്. വര്ധിച്ചു വരുന്ന എ.ഐ തൊഴില് മേഖലയുടെ ആവശ്യത്തിന് അനുസരിച്ച് ഉദ്യോഗാര്ത്ഥികളെ കണ്ടെത്തുന്നതില് പ്രതിസന്ധി അഭിമുഖീകരിക്കുകയാണ് കമ്പനികള്.
India faces a growing talent gap as AI jobs are expected to reach 2.3 million by 2027.
Read DhanamOnline in English
Subscribe to Dhanam Magazine
