10 കോടി രൂപയോ അതിൽ കൂടുതലോ വാർഷിക ടേൺ ഓവർ ഉള്ള എല്ലാ ബിസിനസ് സ്ഥാപനങ്ങളും ഇൻവോയ്സ് നൽകിയ തീയതി മുതൽ 30 ദിവസത്തിനുള്ളിൽ ഇൻവോയ്സ് രജിസ്ട്രേഷൻ പോർട്ടലിൽ (IRP) ഇ-ഇൻവോയ്‌സുകൾ ഏപ്രിൽ 1 മുതൽ അപ്‌ലോഡ് ചെയ്യണം. 100 കോടി രൂപയിൽ കൂടുതൽ വാർഷിക ടേൺ ഓവർ ഉള്ള ബിസിനസ് സ്ഥാപനങ്ങൾക്ക് മാത്രമായിരുന്നു നേരത്തെ ഈ നിയമം ബാധകം. വിറ്റുവരവ് പരിധി ഗണ്യമായി കുറച്ചതോടെ സമയപരിധി പാലിക്കേണ്ട ബിസിനസ് സ്ഥാപനങ്ങളുടെ എണ്ണത്തില്‍ വലിയ വര്‍ധനയുണ്ടാകും.
ഇഷ്യു ചെയ്ത തീയതി മുതൽ 30 ദിവസത്തിൽ കൂടുതൽ പഴക്കമുള്ള ക്രെഡിറ്റ് നോട്ട്, ഡെബിറ്റ് നോട്ട് ഇൻവോയ്‌സുകള്‍ പുതിയ നിയമം പ്രാബല്യത്തില്‍ ആയതോടെ ഇ-ഇൻവോയ്സ് ജനറേഷനായി IRP സ്വീകരിക്കില്ല. 30 ദിവസത്തെ സമയപരിധിക്കുളളില്‍ ഒരു ഇൻവോയ്സ് റിപ്പോർട്ട് ചെയ്തില്ലെങ്കിൽ, ഇൻപുട്ട് ടാക്സ് ക്രെഡിറ്റ് (ഐടിസി) ക്ലെയിമുകൾക്ക് അത് അസാധുവാകുന്നതാണ്. അതിനാല്‍ വാങ്ങുന്നയാൾക്ക് ആ ഇൻവോയ്സിൽ ജിഎസ്ടി ക്രെഡിറ്റ് ക്ലെയിം ചെയ്യാൻ സാധിക്കില്ല.
തടസമില്ലാത്ത ഐടിസി ക്ലെയിമുകൾ ഉറപ്പാക്കുന്നതിനായി സമയപരിധിക്കുളളില്‍ ഇൻവോയ്‌സുകള്‍ അപ്‌ലോഡ് ചെയ്യേണ്ടതുണ്ട്. ഇ-ഇൻവോയ്‌സുകൾ ഉടനടി റിപ്പോർട്ട് ചെയ്യപ്പെടുന്നുവെന്ന് ഉറപ്പാക്കാൻ സ്ഥാപനങ്ങള്‍ അവരുടെ പണമിടപാട് സോഫ്റ്റ്‌വെയർ, ഐആർപി സംവിധാനങ്ങൾ തുടങ്ങിയവ അപ്ഡേറ്റ് ചെയ്യാൻ ശ്രദ്ധിക്കണം.
10 കോടി രൂപയിൽ താഴെ വാർഷിക ടേൺ ഓവർ ഉള്ള ബിസിനസുകളെ നിലവിൽ ഈ 30 ദിവസത്തെ സമയപരിധിയില്‍ നിന്ന് ഒഴിവാക്കിയിട്ടുണ്ട്.
Read DhanamOnline in English
Subscribe to Dhanam Magazine
