സെപ്റ്റംബർ പാദത്തിൽ ഇന്ത്യയിൽ എക്കാലത്തെയും ഉയർന്ന സർവകാല റെക്കോർഡ് വരുമാനം സ്വന്തമാക്കി പ്രമുഖ ടെക് ഭീമനായ ആപ്പിൾ. ഐഫോൺ (iPhone), മാക് (Mac), സർവീസസ് (Services) തുടങ്ങിയ മേഖലകളിലുണ്ടായ ശക്തമായ മുന്നേറ്റമാണ് ഈ നേട്ടത്തിന് വഴിതെളിച്ചതെന്ന് ആപ്പിൾ സി.ഇ.ഒ ജോൺ ടെർനസ് വ്യക്തമാക്കി.
ഐഫോൺ അപ്‌ഗ്രേഡർമാരുടെ വർദ്ധനവ്: പഴയ ഫോണുകളിൽ നിന്ന് പുതിയ ഐഫോണുകളിലേക്ക് മാറുന്ന (Upgraders) ഉപഭോക്താക്കളുടെ എണ്ണത്തിൽ ആപ്പിൾ സർവകാല റെക്കോർഡ് കുറിച്ച പ്രധാന വിപണികളിലൊന്നാണ് ഇന്ത്യ. ഐഫോൺ 17 ആയിരുന്നു ഈ പാദത്തിൽ ഇന്ത്യയിൽ ഏറ്റവും കൂടുതൽ ഷിപ്പ് ചെയ്ത സ്മാർട്ട്‌ഫോൺ മോഡൽ.
മാക്, സർവീസസ് മേഖലകളിലെ സർവകാല റെക്കോർഡ്: മാക്ബുക്ക് നിയോ, മാക്ബുക്ക് പ്രോ എന്നിവയ്ക്കുള്ള ഉയർന്ന ആവശ്യകത കാരണം ഇന്ത്യയിൽ മാക് വിൽപന റെക്കോർഡ് തലത്തിലെത്തി. കൂടാതെ ഡിജിറ്റൽ സർവീസ് വിഭാഗത്തിലും കമ്പനി എക്കാലത്തെയും മികച്ച വരുമാന വളർച്ച നേടി.
ആപ്പിൾ പേ ക്ക് തുടക്കം: ആക്സിസ് ബാങ്കുമായി (Axis Bank) സഹകരിച്ച് ഇന്ത്യയിൽ 'ആപ്പിൾ പേ' (Apple Pay) അവതരിപ്പിച്ചതും വിപണിയിലെ സാന്നിധ്യം കൂടുതൽ ശക്തമാക്കി.
സെപ്റ്റംബർ പാദത്തിൽ ഐഫോൺ വരുമാനം ആഗോള തലത്തില്‍ 57.6 ബില്യൺ ഡോളറായി, വാർഷികാടിസ്ഥാനത്തിൽ 17 ശതമാനം വർധന. യുഎസിലും ഗ്രേറ്റർ ചൈനയിലും ആപ്പിൾ ശക്തമായ ഇരട്ട അക്ക വളർച്ച രേഖപ്പെടുത്തിയതായും ജോൺ ടെർനസ് പറഞ്ഞു.
ധനകാര്യ ഇളവുകളും പ്രാദേശിക ഉൽപ്പാദനവും: എളുപ്പത്തിലുള്ള ഫിനാൻസിംഗ് ഓപ്ഷനുകൾ, ട്രേഡ്-ഇൻ ആനുകൂല്യങ്ങൾ, വിതരണ ശൃംഖലയുടെ വിപുലീകരണം, ഇന്ത്യയിലെ പ്രാദേശിക നിർമ്മാണം എന്നിവ പ്രീമിയം ഉൽപ്പന്നങ്ങൾ വാങ്ങാൻ ഉപഭോക്താക്കളെ പ്രേരിപ്പിച്ചു. ഇതോടെ ഇന്ത്യയിലെ ഐഫോണുകളുടെ ശരാശരി വിൽപന വില (ASP) 1,000 ഡോളര്‍ കടന്ന് എക്കാലത്തെയും ഉയർന്ന നിരക്കിലെത്തി.
കേവലം ഒരു ഐഫോൺ വിപണി എന്നതിനേക്കാള്‍ ഉപരി, എല്ലാ ഡിവൈസുകളും സവിശേഷതകളും ഉൾക്കൊള്ളുന്ന സമഗ്രമായ ഒരു 'ഇക്കോസിസ്റ്റം' വിപണിയായി ഇന്ത്യ മാറുന്നുവെന്ന വിലയിരുത്തലാണ് വിപണി വിദഗ്ദ്ധർ ആപ്പിളിന്റെ മുന്നേറ്റത്തെ കാണുന്നത്.
Read DhanamOnline in English
Subscribe to Dhanam Magazine