പ്രമുഖ കോൺടാക്റ്റ്ലെസ് പേയ്മെന്റ് സേവനമായ ആപ്പിൾ പേ (Apple Pay) ഇന്ത്യയിൽ ഔദ്യോഗികമായി പുറത്തിറക്കി ആപ്പിൾ. ലോകത്തെ പ്രമുഖ ഡിജിറ്റൽ പേയ്മെന്റ് വിപണികളിലൊന്നായ ഇന്ത്യയിലേക്ക് ആപ്പിൾ പേ കടന്നുവരുമ്പോൾ, ആക്സിസ് ബാങ്കാണ് (Axis Bank) കമ്പനിയുടെ ആദ്യത്തെ ബാങ്കിംഗ് പങ്കാളി. ആക്സിസ് ബാങ്ക് നൽകുന്ന വിസ (Visa), മാസ്റ്റർകാർഡ് (Mastercard) ക്രെഡിറ്റ് കാർഡ് ഉപഭോക്താക്കൾക്കാണ് നിലവിൽ ഈ സേവനം ലഭ്യമാകുക.
സുരക്ഷയ്ക്കും സ്വകാര്യതയ്ക്കും മുൻഗണന നൽകുന്ന രീതിയിലാണ് ആപ്പിൾ പേ രൂപകൽപ്പന ചെയ്തിരിക്കുന്നത്. ഉപഭോക്താക്കളുടെ യഥാർത്ഥ കാർഡ് നമ്പറുകൾ ഉപകരണത്തിലോ ആപ്പിളിന്റെ സെർവറുകളിലോ സൂക്ഷിക്കില്ല. പകരം, 'സെക്യൂർ എലമെന്റ്' വഴി എൻക്രിപ്റ്റ് ചെയ്ത 'ഡിവൈസ് അക്കൗണ്ട് നമ്പർ' (Device Account Number), കാർഡ് ടോക്കണൈസേഷൻ സാങ്കേതികവിദ്യ എന്നിവ ഉപയോഗിച്ചാണ് ഇടപാടുകൾ നടത്തുന്നത്. പേയ്മെന്റ് നടത്തുമ്പോൾ ഒ.ടി.പിയോ പിൻ നമ്പറോ നൽകേണ്ടതില്ല; പകരം ഫേസ് ഐ.ഡി (Face ID), ടച്ച് ഐ.ഡി (Touch ID), അല്ലെങ്കിൽ പാസ്കോഡ് വഴി വേഗത്തിൽ ഇടപാടുകൾ പൂർത്തിയാക്കാം.
ഐഫോൺ XR അല്ലെങ്കിൽ അതിനുശേഷമുള്ള മോഡലുകൾ (iOS 18 അല്ലെങ്കിൽ അതിനുശേഷമുള്ള പതിപ്പിൽ പ്രവർത്തിക്കുന്നവ), ആപ്പിൾ വാച്ച് സീരീസ് 6 അല്ലെങ്കിൽ അതിനുശേഷമുള്ള മോഡലുകൾ (watchOS 11+) എന്നിവയിൽ ആപ്പിൾ പേ ഉപയോഗിക്കാം. കൂടാതെ, ആപ്പുകൾ വഴിയും വെബ്സൈറ്റുകൾ വഴിയും സാധനങ്ങൾ വാങ്ങാൻ ഐഫോൺ, ഐപാഡ് എന്നിവയിൽ ഇത് ലഭ്യമാണ്; മാക് (Mac) കമ്പ്യൂട്ടറുകളിലേക്കുള്ള പിന്തുണ ഉടൻ ലഭ്യമാക്കും.
ഡിജിറ്റൽ വിപണിയിലെ മുന്നേറ്റം: ലോകമെമ്പാടുമുള്ള 90-ലധികം രാജ്യങ്ങളിലും 11,000-ത്തിലധികം ബാങ്കിംഗ് ശൃംഖലകളിലും നിലവിൽ ആപ്പിൾ പേ ലഭ്യമാണ്. ഇന്ത്യയിലെ അതിവേഗം വളരുന്ന കാർഡ് ഉപയോഗവും സാങ്കേതികമായി വികസിച്ച എൻ.എഫ്.സി (NFC) ടെർമിനലുകളുമാണ് ആപ്പിൾ പേ ഇന്ത്യയിലെത്തിക്കാൻ സഹായകമായതെന്ന് ആപ്പിൾ പേ വൈസ് പ്രസിഡന്റ് ജെന്നിഫർ ബെയ്ലി വ്യക്തമാക്കി.
Read DhanamOnline in English
Subscribe to Dhanam Magazine
