ബൈജൂസ് ലേണിങ് ആപ്പിന് മലയാളികള്ക്കിടയില് എന്നും അഭിമാനത്തിളക്കമാണ്. കാരണം കേരളത്തില് നിന്നെത്തി ഇന്ത്യയിലെ പ്രമുഖ ലേണിങ് ആപ്പ് മാറിയതിന്റെ ഒരു പ്രത്യേക ഇഷ്ടം കൊണ്ട് തന്നെ. ഇപ്പോഴിതാ ഇന്ത്യന് ക്രിക്കറ്റ് ടീമിന്റെ ജേഴ്സിയിലും ബൈജൂസ് ആപ്പ് സ്ഥാനം പിടിച്ചു കഴിഞ്ഞു. വരുന്ന സെപ്റ്റംബര് മുതല് ബൈജൂസ് ആപ്പ് ലോഗോയുള്ള ജേഴ്സി അണിഞ്ഞാകും നമ്മുടെ പ്രിയപ്പെട്ട താരങ്ങള് ക്രീസിലിറങ്ങുക. പുതിയ വളര്ച്ചാ പദ്ധതികളോടൊപ്പം സ്വന്തം നാട്ടിലും പുതിയ പദ്ധതിക്കു തുടക്കമിടുകയാണ് ബൈജൂസ് ആപ്പ്. ബൈജൂസിന്റെ വമ്പന് ടെക്നോളജി സെന്ററുകളാണ് കേരളത്തില് സ്ഥാപിക്കാനൊരുങ്ങുന്നത്.
തിരുവനന്തപുരത്തും കൊച്ചിയിലുമാണ് ടെക്നോളജി സെന്റര് സ്ഥാപിക്കാന് കമ്പനി പദ്ധതിയിടുന്നത്. ഇതിന് മുന്നോടിയായി തിരുവനന്തപുരം കിന്ഫ്രാ പാര്ക്കില് കെട്ടിടം ഏറ്റെടുക്കുന്നത് സംബന്ധിച്ചുളള ചര്ച്ചകള് പുരോഗമിക്കുകയാണ്. കൊച്ചിയിലും ക്യാമ്പസിനായി സ്ഥലം എടുക്കുമെന്നാണ് അറിയുന്നത്. കേരളത്തിലെ നിക്ഷേപ പ്രവര്ത്തനങ്ങള് സംബന്ധിച്ച് ഒരാഴ്ചയ്ക്കുള്ളില് അന്തിമ തീരുമാനം ഉണ്ടായേക്കും. തുടര്ന്ന് സര്ക്കാരുമായി ധാരണാപത്രം ഒപ്പിടാനാണ് ബൈജൂസ് ആലോചിക്കുന്നത്.
വെര്ച്വല് റിയാലിറ്റി സ്റ്റുഡിയോ ഉള്പ്പടെയുളള അത്യാധൂനിക സൗകര്യങ്ങളുളള വമ്പന് ടെക് പ്രൊഡക്ഷന് സെന്ററാണ് തിരുവനന്തപുരത്ത് സ്ഥാപിക്കാന് ബൈജൂസ് പദ്ധതിയിടുന്നത്. മറ്റ് കമ്പനികളുമായി സഹകരിച്ചായിരിക്കും പ്രവര്ത്തനമെന്നാണ് ലഭിക്കുന്ന സൂചന. തിരുവനന്തപുരം സെന്ററില് 1,000 പ്രഫഷണലുകള്ക്ക് തൊഴില് ലഭിക്കുമെന്നാണ് കണക്കാക്കുന്നത്. തുടക്കത്തില് 300 പേരെ ഉള്പ്പെടുത്തിയായിരിക്കും ക്യാമ്പസിന്റെ പ്രവര്ത്തനം.
എഡ്യൂടെക് രംഗത്ത് ലോകത്ത് ഏറ്റവും മൂല്യമുളള സംരംഭമാണ് ബൈജൂസ് ആപ്പ്. സംരംഭം ആരംഭിച്ച് വെറും എട്ട് വര്ഷം കൊണ്ടാണ് ഈ നേട്ടം ബൈജൂസ് സ്വന്തമാക്കിയത്. ബാംഗ്ലൂരാണ് കമ്പനിയുടെ ആസ്ഥാനം. ഇവിടുത്ത പ്രധാന പ്രൊഡക്ഷന് സെന്ററില് 1,500 ജീവനക്കാരുണ്ട്.
40,000 കോടി രൂപയാണ് കമ്പനിയുടെ ഇപ്പോഴത്തെ ആകെ മൂല്യം.
Read DhanamOnline in English
Subscribe to Dhanam Magazine
