സ്വകാര്യ ടെലികോം കമ്പനികളോട് മത്സരിക്കുന്നതിന്റെ ഭാഗമായി, ഒരു മാസത്തേക്ക് സൗജന്യ 4G സേവനങ്ങൾ പ്രഖ്യാപിച്ച് പൊതുമേഖലാ സ്ഥാപനമായ ബിഎസ്എൻഎൽ (BSNL). പുതിയ ഉപയോക്താക്കളെ തങ്ങളുടെ നെറ്റ്വർക്കിലേക്ക് ആകർഷിക്കുക എന്ന ലക്ഷ്യത്തോടെയാണ് കമ്പനി ഈ ആകർഷകമായ ദീപാവലി ഓഫർ അവതരിപ്പിച്ചിരിക്കുന്നത്.
സൗജന്യ 4G സേവനങ്ങൾക്ക് പുറമെ, ഈ ഓഫറിൽ ഉപയോക്താക്കൾക്ക് അൺലിമിറ്റഡ് കോളിംഗ് സൗകര്യവും പ്രതിദിനം 2 ജിബി ഡാറ്റയും ലഭിക്കും. ആദ്യമായി ബിഎസ്എൻഎൽ കണക്ഷൻ എടുക്കുന്നവർക്ക് മാത്രമാണ് ഈ ആനുകൂല്യം ലഭിക്കുക. പ്രീപെയ്ഡ് ഉപയോക്താക്കൾക്കായിട്ടാണ് ഈ ഓഫർ ഒരുക്കിയിരിക്കുന്നത്.
ഈ പ്ലാൻ പ്രകാരം, ഉപയോക്താക്കൾക്ക് ആദ്യത്തെ 30 ദിവസത്തേക്ക് ഡാറ്റയ്ക്കോ കോളിംഗിനോ പണം നൽകേണ്ടതില്ല. എന്നാൽ, സിം കാർഡ് എടുക്കുന്നതിനുള്ള പ്രവേശന ഫീസായി ഒരു രൂപ ടോക്കൺ തുകയായി ഈടാക്കും. ഇന്ത്യയിലെ എല്ലാ സർക്കിളുകളിലും ഈ ഓഫർ ലഭ്യമാണ്. ഒക്ടോബർ 15 മുതൽ നവംബർ 15 വരെയാണ് സൗജന്യ 4G സേവന ഓഫർ അവതരിപ്പിച്ചിരിക്കുന്നത്.
ബിഎസ്എൻഎൽ തങ്ങളുടെ 4G നെറ്റ്വർക്ക് വിപുലീകരിക്കുന്ന ഈ സാഹചര്യത്തിൽ, പുതിയ ഉപയോക്താക്കൾക്ക് നെറ്റ്വർക്ക് അനുഭവിച്ചറിയാൻ ഈ സൗജന്യ ഓഫർ ഒരു മികച്ച അവസരമാണ്. നിലവിൽ 4G സേവനങ്ങൾ പരിമിതമായ ഇടങ്ങളിൽ മാത്രമേ ലഭ്യമാകൂ എന്ന പരിമിതി നിലനിൽക്കുന്നുണ്ടെങ്കിലും, ഉപയോക്താക്കളെ ആകർഷിക്കാനും സ്വകാര്യ കമ്പനികളിൽ നിന്ന് ഉപയോക്താക്കളെ നേടാനും ബിഎസ്എൻഎല്ലിന്റെ ഈ നീക്കം സഹായകമാകും. ഡാറ്റാ ഉപഭോഗം വർധിച്ചു വരുന്ന ഈ കാലഘട്ടത്തിൽ, ഉപയോക്താക്കൾക്ക് ഒരു വലിയ ആശ്വാസമേകുന്നതാണ് ഒരു മാസത്തെ സൗജന്യ സേവനങ്ങൾ.
മൊബൈൽ വരിക്കാരുടെ എണ്ണത്തിൽ 1.38 ലക്ഷത്തിലധികം വർധനവുണ്ടായതോടെ, ഓഗസ്റ്റിൽ പുതിയ ഉപയോക്താക്കളെ ചേർക്കുന്നതിൽ എയർടെല്ലിനെ പിന്തള്ളി ബിഎസ്എൻഎൽ രണ്ടാം സ്ഥാനം നേടി.
BSNL offers one month of free 4G service with unlimited calls and 2GB/day data for new users as part of its Diwali promotion.
Read DhanamOnline in English
Subscribe to Dhanam Magazine
