നിര്‍മ്മിത ബുദ്ധി (AI) വ്യാപകമാകുന്നതോടെ മനുഷ്യരുടെ തൊഴിലുകൾ വൻതോതിൽ നഷ്ടപ്പെടുമെന്ന ആശങ്ക ലോകമെമ്പാടും നിലനിൽക്കുന്നുണ്ട്. എന്നാൽ അടുത്ത 10 വർഷത്തിനുള്ളിൽ മനുഷ്യർ ചെയ്യുന്ന പ്രവര്‍ത്തനങ്ങളുടെ 5 ശതമാനം മാത്രമേ എഐ കൈയടക്കുകയുള്ളൂ എന്നാണ് നൊബൽ സമ്മാന ജേതാവായ ഡാരോൺ അസെമോഗ്ലുവിന്റെ (Daron Acemoglu) വിലയിരുത്തൽ. മൈക്രോസോഫ്റ്റ് എഐ സി.ഇ.ഒ മുസ്തഫ സുലൈമാൻ പങ്കുവെച്ച അസെമോഗ്ലുവിന്റെ ലേഖനത്തിലാണ് ഈ നിരീക്ഷണം.
ലളിതമായ ജോലികൾ മാത്രം: നിലവിലെ എഐ സാങ്കേതികവിദ്യക്ക് ഓഫീസുകളിലെ ലളിതമായ പ്രവർത്തികളും അടിസ്ഥാന വിജ്ഞാന ജോലികളും (cognitive tasks) മാത്രമേ ഓട്ടോമേറ്റ് ചെയ്യാന്‍ (automate) സാധിക്കൂ. എന്നാൽ സങ്കീർണമായ തൊഴിലുകൾ നിർവഹിക്കാൻ മനുഷ്യന്റെ വിവേചനബുദ്ധി (judgment), ബഹുമുഖ ചിന്താശേഷി (multi-dimensional reasoning), സാമൂഹിക നൈപുണ്യങ്ങൾ (social skills) എന്നിവ അത്യാവശ്യമാണ്.
നിർമ്മാണ മേഖലയിലെ പരിധികൾ: മാനുഫാക്ചറിംഗ്, കൺസ്ട്രക്ഷൻ തുടങ്ങിയ മേഖലകളിൽ റോബോട്ടിക്സിന്റെ പരിമിതികളും, സ്ഥലസംബന്ധിയായ ഭൗതിക സാഹചര്യങ്ങൾ മനസിലാക്കാനുള്ള എഐയുടെ ശേഷിക്കുറവും കാരണം തൊഴിൽ മാറ്റങ്ങൾ കൂടുതൽ വൈകും.
ഉത്പാദനക്ഷമതയിലെ മന്ദഗതി: ഭൂരിഭാഗം കമ്പനികളും എഐ സാങ്കേതികവിദ്യ പരീക്ഷണാടിസ്ഥാനത്തിലാണ് ഉപയോഗിക്കുന്നത്. അതിനാൽ ഉത്പാദനക്ഷമതയിൽ പെട്ടെന്നുള്ള വൻ വർദ്ധനവ് ഉണ്ടായിട്ടില്ല. അടുത്ത 10 വർഷത്തിനുള്ളിൽ ജി.ഡി.പിയിൽ (GDP) ഏകദേശം 1.5 ശതമാനം വർദ്ധനവ് മാത്രമേ എഐ ഉണ്ടാക്കൂ, അല്ലാതെ ഇതൊരു വിപ്ലവകരമായ മാറ്റമാകില്ല.
ജോലിരീതികൾ പുനഃക്രമീകരിക്കൽ: എഐ സാങ്കേതികവിദ്യക്ക് അനുസൃതമായി ബിസിനസ് പ്രക്രിയകളും ടീം ഘടനകളും പുനഃക്രമീകരിക്കാൻ കമ്പനികൾക്ക് കൂടുതൽ സമയം ആവശ്യമാണ്.
മനുഷ്യ ബുദ്ധിയെ അനുകരിച്ച് അവരെ മാറ്റിസ്ഥാപിക്കുന്നതിന് പകരം, മനുഷ്യന്റെ ജോലിക്ഷമത വർദ്ധിപ്പിക്കുന്ന രീതിയിലാണ് എഐ വികസിപ്പിക്കേണ്ടതെന്ന് അസെമോഗ്ലു ചൂണ്ടിക്കാണിക്കുന്നു.
Read DhanamOnline in English
Subscribe to Dhanam Magazine
