ചാറ്റ്ജിപിടി വഴി ഇനി ഇഷ്ട സിനിമകള്‍ കണ്ടെത്താം, ജിയോഹോട്ട്സ്റ്റാർ ഓപ്പൺഎഐയുമായി സഹകരിക്കുന്നു

റിലയൻസിന്റെ ഉടമസ്ഥതയിലുള്ള ജിയോഹോട്ട്സ്റ്റാർ, സാം ആൾട്ട്മാന്റെ നേതൃത്വത്തിലുള്ള ഓപ്പൺഎഐയുമായി (OpenAI) കൈകോർക്കുന്നു. ഇന്ത്യയിലെ ഏറ്റവും വലിയ സ്ട്രീമിംഗ് പ്ലാറ്റ്‌ഫോമായ ജിയോഹോട്ട്സ്റ്റാറിൽ ചാറ്റ്ജിപിടി (ChatGPT) അധിഷ്ഠിതമായ വോയ്‌സ് ഡിസ്‌കവറി സൗകര്യം കൊണ്ടുവരികയാണ് ഈ പങ്കാളിത്തത്തിന്റെ ലക്ഷ്യം.

ഇതിലൂടെ അവതരിപ്പിക്കപ്പെടുന്ന "മൾട്ടി ലിംഗ്വൽ കോഗ്നിറ്റീവ് സെർച്ച്" (Multilingual Cognitive Search) എന്ന ഫീച്ചർ കാഴ്ചക്കാരുടെ "എന്ത് കാണണം" എന്ന ആശയക്കുഴപ്പത്തിന് അറുതി വരുത്തുമെന്ന് കമ്പനി അവകാശപ്പെടുന്നു. പരമ്പരാഗതമായ കീവേഡ് സെർച്ചുകൾക്കോ മെനുകൾ വഴിയുള്ള തിരച്ചിലുകൾക്കോ പകരം, ഉപയോക്താക്കൾക്ക് തങ്ങളുടെ മൂഡോ സാഹചര്യമോ ലളിതമായി സംസാരിച്ചു അറിയിക്കാം. ഇതിലൂടെ സന്ദർഭത്തിനനുയോജ്യമായതും വ്യക്തിഗതവുമായ ശുപാർശകൾ തൽസമയം ലഭിക്കും. ഉപയോക്താക്കൾ ചിന്തിക്കാത്ത തരത്തിലുള്ള അനുബന്ധ ഉള്ളടക്കങ്ങൾ പോലും നിർദ്ദേശിക്കാൻ ഈ എഐ സംവിധാനത്തിന് സാധിക്കും.

മാധ്യമ-വിനോദ മേഖലയിലെ വലിയൊരു മാറ്റമായാണ് ജിയോസ്റ്റാർ വൈസ് ചെയർമാൻ ഉദയ് ശങ്കർ ഇതിനെ വിശേഷിപ്പിച്ചത്. വിനോദത്തെ വെറും കാഴ്ച എന്നതിലുപരി സജീവമായ ഇടപഴകലായി എഐ മാറ്റുമെന്ന് ഓപ്പൺഎഐ ആപ്ലിക്കേഷൻസ് സിഇഒ ഫിഡ്ജി സിമോ പറഞ്ഞു. 19 ഭാഷകളിലായി 3 ലക്ഷത്തിലധികം മണിക്കൂർ ഉള്ളടക്കമുള്ള ജിയോഹോട്ട്സ്റ്റാറിന്റെ 45 കോടിയിലധികം വരുന്ന പ്രതിമാസ ഉപയോക്താക്കൾക്ക് ഈ പുതിയ അനുഭവം ഘട്ടം ഘട്ടമായി ലഭ്യമാകും. ഇതിലൂടെ കൂടുതൽ ലളിതവും എല്ലാവരെയും ഉൾക്കൊള്ളുന്നതുമായ ഒരു കാഴ്ചാനുഭവം നൽകാനാണ് കമ്പനി ലക്ഷ്യമിടുന്നത്.

_{JioHotstar partners with OpenAI to introduce ChatGPT-powered multilingual voice discovery for personalized streaming recommendations.}