സുരക്ഷിതമായ പണമിടപാടുകൾക്ക് പുതിയ വഴി, മാതാപിതാക്കള്‍ക്കും ബിസിനസുകാർക്കും സഹായകരം, എന്താണ് യു.പി.ഐ സർക്കിൾ?

നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (NPCI) വികസിപ്പിച്ചെടുത്ത യുപിഐ സർക്കിൾ (UPI Circle) എന്ന പുതിയ ഫീച്ചർ ഇപ്പോൾ പ്രമുഖ ആപ്പുകളിൽ ലഭ്യമാണ്. ഭീം (BHIM), ഫോൺപേ (PhonePe), ഗൂഗിൾ പേ (Google Pay) തുടങ്ങിയ പെയ്മെന്റ് ആപ്പുകളില്‍ നിലവില്‍ ഈ സൗകര്യം അവതരിപ്പിച്ചിട്ടുണ്ട്. ബാങ്ക് അക്കൗണ്ട് ഉടമയ്ക്ക് തന്റെ അക്കൗണ്ടിൽ നിന്നുള്ള പണമിടപാടുകൾ നടത്താൻ വിശ്വസ്തരായ വ്യക്തികൾക്ക് നിയന്ത്രിതമായ അധികാരം നൽകാൻ ഇതിലൂടെ സാധിക്കുന്നു. ബാങ്ക് അക്കൗണ്ടുകൾ പങ്കിട്ടുകൊണ്ട് തന്നെ നിയന്ത്രിതമായി കൈകാര്യം ചെയ്യാൻ ഇത് ഉപയോക്താക്കളെ പ്രാപ്തരാക്കുന്നു.

എങ്ങനെ പ്രവർത്തിക്കുന്നു?

ഈ സംവിധാനത്തിൽ ഒരാൾ പ്രൈമറി യൂസറും (Primary User) മറ്റൊരാൾ സെക്കൻഡറി യൂസറും (Secondary User) ആയിരിക്കും. പ്രൈമറി യൂസർക്ക് തന്റെ യുപിഐ പിൻ (UPI PIN), പാസ്‌വേഡ് അല്ലെങ്കിൽ ഡിവൈസ് ആക്സസ് എന്നിവ പങ്കുവെക്കാതെ തന്നെ സെക്കൻഡറി യൂസർക്ക് തന്റെ ബാങ്ക് അക്കൗണ്ടിൽ നിന്ന് പണം ചെലവഴിക്കാനുളള അനുവാദം നൽകാം.

പ്രധാന സവിശേഷതകൾ:

• ഉപയോക്താക്കളുടെ എണ്ണം: ഒരു പ്രൈമറി യൂസർക്ക് അഞ്ച് സെക്കൻഡറി യൂസർമാരെ വരെ ചേർക്കാൻ സാധിക്കും.

• പണത്തിന്റെ പരിധി: പ്രതിമാസ ഇടപാട് പരിധി നിലവിൽ 15,000 രൂപയായി നിശ്ചയിച്ചിരിക്കുന്നു.

• കാലാവധി: പണം നൽകാനുള്ള അധികാരം ഒരു മാസം മുതൽ അഞ്ച് വർഷം വരെ നീളുന്ന കാലയളവിലേക്ക് നിശ്ചയിക്കാം.

• നിയന്ത്രണം: പ്രൈമറി യൂസർക്ക് എല്ലാ ഇടപാടുകളും തത്സമയം നിരീക്ഷിക്കാനും എപ്പോൾ വേണമെങ്കിലും നൽകിയിരിക്കുന്ന അനുവാദം പരിഷ്കരിക്കാനോ റദ്ദാക്കാനോ സാധിക്കും.

ആർക്കൊക്കെ ഗുണകരമാകും?

കുട്ടികൾക്ക് പഠനാവശ്യങ്ങൾക്കും മറ്റും നിയന്ത്രിതമായ രീതിയിൽ പണം ചെലവാക്കാൻ അനുവാദം നൽകാൻ മാതാപിതാക്കളെ ഇത് സഹായിക്കുന്നു. ഡിജിറ്റൽ ഇടപാടുകളിൽ സഹായം ആവശ്യമായ മുതിർന്ന പൗരന്മാരുടെ കുടുംബാംഗങ്ങൾക്ക് മേൽനോട്ടം വഹിച്ചുകൊണ്ട് അവരെ സഹായിക്കാം. കൂടാതെ, ചെറുകിട ബിസിനസ് ഉടമകൾക്ക് ജീവനക്കാരെ ദൈനംദിന ആവശ്യങ്ങൾക്കായി പണമടയ്ക്കാൻ ഈ സംവിധാനം വഴി ചുമതലപ്പെടുത്താം. ലോഗിൻ വിവരങ്ങൾ കൈമാറുന്നതും പണം ആവർത്തിച്ച് ട്രാൻസ്ഫർ ചെയ്യുന്നതും ഒഴിവാക്കി ഡിജിറ്റൽ ഇടപാടുകൾ കൂടുതൽ സുരക്ഷിതമാക്കാൻ യുപിഐ സർക്കിൾ സഹായിക്കുന്നു.

_{NPCI’s UPI Circle feature enables controlled digital payments by allowing trusted users limited access to a primary bank account.}