മാസം ഒന്നര ലക്ഷം ശമ്പളം കിട്ടിയിട്ട് ഈ ബംഗളുരുവില്‍ എന്താവാനാണ്? തോറ്റു പോവുകയാണ്, ടെക്കികള്‍...

ബെംഗളൂരുവിലെ ഉയര്‍ന്ന ജീവിതച്ചെലവ് വീണ്ടും ചര്‍ച്ചയാകുകയാണ്. ഐടി മേഖലയിലുള്ള ഒരാള്‍ക്ക് മാസത്തില്‍ 1.5 ലക്ഷം രൂപ ശമ്പളം ലഭിച്ചിട്ടും 15,000 പോലും മിച്ചം പിടിക്കാന്‍ കഴിയുന്നില്ല. ഈ അനുഭവം പങ്കുവെച്ച ടെക്കിയുടെ സോഷ്യല്‍ മീഡിയ പോസ്റ്റ് വൈറലായി. നഗരത്തിലെ ഭീമമായ വാടകയും മറ്റ് ചെലവുകളും ശമ്പളം മിക്കവാറും വിഴുങ്ങുന്നുവെന്ന് അദ്ദേഹം വിശദീകരിച്ചു. അതു ശരിവെക്കുകയാണ് പ്രഫഷണലുകളില്‍ പലരും.

ടെക്കിയുടെ കണക്കുപ്രകാരം 1.5 ലക്ഷം മാസശമ്പളത്തില്‍ നിന്നും ആദ്യം തന്നെ നികുതി, പി.എഫ് തുടങ്ങിയവയ്ക്കായി ഏകദേശം 25,000 രൂപ വരെ പോകുന്നു. ബാക്കി കിട്ടുന്നത് ഏകദേശം 1.25 ലക്ഷംവരെയാണ്. ഈ തുക പോലും നഗരത്തിലെ പ്രതിദിന ചെലവുകള്‍ നിറവേറ്റാന്‍ മതിയാവുന്നില്ലെന്നാണ് അദ്ദേഹം പറയുന്നത്.

കൊല്ലുന്ന വാടക

വാടകയാണ് ഏറ്റവും വലിയ ചെലവ്. ബെംഗളൂരുവിലെ ഐടി ഹബുകളായ വൈറ്റ്ഫീല്‍ഡ്, മറാത്തഹള്ളി, സര്‍ജാപൂര്‍, ബെല്ലന്ദൂര്‍ എന്നിവിടങ്ങളിലെ ഒരു ബി.എച്ച്.കെ ഫ്‌ളാറ്റിന് 35,000 മുതല്‍ 45,000 വരെ വാടക കൊടുക്കേണ്ടി വരും. ഇതോടൊപ്പം മെന്റനന്‍സ് ചാര്‍ജ്, വൈദ്യുതി ബില്‍, ഇന്റര്‍നെറ്റ് എന്നിവ ചേര്‍ന്നാല്‍ വീടിനായി മാത്രം 40,000 മുതല്‍ 50,000 വരെ ചെലവാകുന്നു.

ഭക്ഷണച്ചെലവും വലുതാണ്. ഗ്രോസറി വാങ്ങല്‍, പുറത്ത് ഭക്ഷണം കഴിക്കല്‍, ഓഫീസിലേക്കുള്ള ലഞ്ച് തുടങ്ങിയവയ്ക്ക് ചേര്‍ന്ന് മാസത്തില്‍ 18,000 മുതല്‍ 22,000 വരെ ചെലവാകുന്നു. ബെംഗളൂരുവില്‍ പുറത്തു ഭക്ഷണം കഴിക്കുന്നത് ചെലവേറിയതാണെന്നും ടെക്കി കൂട്ടിച്ചേര്‍ത്തു. യാത്രയ്ക്കും വലിയ ചെലവാണ്. ഓഫീസ് യാത്രയ്ക്കായി കാബ്, മെട്രോ, ബസ് എന്നിവ ഉപയോഗിക്കേണ്ടി വരുമ്പോള്‍ മാസത്തില്‍ 8,000 മുതല്‍ 12,000 വരെ ചെലവാകുന്നു. സ്വന്തമായി വാഹനം ഉപയോഗിക്കുന്നവര്‍ക്ക് ഇന്ധനം, പാര്‍ക്കിംഗ്, മെയിന്റനന്‍സ് എന്നിവ കൂടി ചേര്‍ന്നാല്‍ ചെലവ് ഇതിലും കൂടുതലാകും.

ചെലവോടു ചെലവ്

ജിം മെമ്പര്‍ഷിപ്പ്, മൊബൈല്‍ ബില്‍, ഒടിടി സബ്‌സ്‌ക്രിപ്ഷനുകള്‍, ഇന്‍ഷുറന്‍സ്, മെഡിക്കല്‍ ചെലവ്, വസ്ത്രം, വിനോദം തുടങ്ങിയവയ്ക്കായി ഏകദേശം 10,000 മുതല്‍ 15,000 വരെ ചെലവാകുന്നു. ചെറിയ ചെലവുകള്‍ പോലും ചേര്‍ന്ന് മാസാവസാനം വലിയ തുകയാകുന്നു. 1.25 ലക്ഷം മുതല്‍ 1.30 ലക്ഷം വരെ ലഭിക്കുന്ന മാസവരുമാനത്തില്‍ നിന്നും ഭൂരിഭാഗവും ചെലവായി പോകുന്നു. അതു കഴിച്ചാല്‍ ഏകദേശം 15,000 രൂപ മാത്രമാണ് ലാഭിക്കാന്‍ കഴിയുന്നത്.

ഈ അനുഭവം സോഷ്യല്‍ മീഡിയയില്‍ വലിയ ചര്‍ച്ചയായി. ബെംഗളൂരു പോലുള്ള ഐടി നഗരങ്ങളില്‍ ഉയര്‍ന്ന ശമ്പളം ലഭിക്കുന്നുണ്ടെങ്കിലും വാടകയും ജീവിതച്ചെലവും വേഗത്തില്‍ വര്‍ധിക്കുന്നതാണ് യഥാര്‍ഥ പ്രശ്‌നമെന്ന് പലരും അഭിപ്രായപ്പെട്ടു. ചിലര്‍ കുറഞ്ഞ ചെലവുള്ള നഗരങ്ങളിലേക്ക് മാറുന്നതാണ് നല്ലതെന്ന് അഭിപ്രായപ്പെട്ടപ്പോള്‍, മറ്റുചിലര്‍ താമസം ഷെയര്‍ ചെയ്യുന്നതു (shared accommodation) പോലുള്ള മാര്‍ഗങ്ങള്‍ സ്വീകരിച്ചാല്‍ ചെലവ് കുറയ്ക്കാനാകുമെന്ന് പറയുന്നു.

'മുണ്ട് മുറുക്കാതെ' വയ്യ

ബെംഗളൂരുവില്‍ ജോലി ചെയ്യുന്ന യുവപ്രൊഫഷണലുകള്‍ക്ക് ഉയര്‍ന്ന ശമ്പളം ഉണ്ടായാലും ജീവിതച്ചെലവുകള്‍ നിയന്ത്രിക്കാനാകാതെ പോയാല്‍ സേവിംഗ്‌സ് വളരെ കുറയാനാണ് സാധ്യതയെന്ന് സാമ്പത്തിക വിദഗ്ധരും മുന്നറിയിപ്പ് നല്‍കുന്നു. വലിയ നഗരങ്ങളില്‍ ജോലി ചെയ്യുമ്പോള്‍ ചെലവ് നിയന്ത്രണം, വ്യക്തമായ സാമ്പത്തിക പദ്ധതി, നിക്ഷേപ ശീലങ്ങള്‍ എന്നിവ അനിവാര്യമാണെന്ന് അവര്‍ ഓര്‍മിപ്പിച്ചു.