വാട്‌സാപ് വഴി ഇനി എല്ലാ ഉപയോക്താക്കൾക്കും പണം അയയ്ക്കാം, പേയ്മെൻ്റ് ഫീച്ചർ ഇങ്ങനെ പ്രവര്‍ത്തനക്ഷമമാക്കാം

ഇന്ത്യയിൽ ഏറ്റവും കൂടുതൽ ഉപയോഗിക്കുന്ന മെസേജിംഗ് പ്ലാറ്റ്‌ഫോമുകളിൽ ഒന്നാണ് വാട്‌സാപ്. വാട്‌സാപ് പേ സേവനത്തിനായുള്ള ഉപയോക്തൃ ഓൺബോർഡിംഗ് പരിധി നീക്കം ചെയ്യുന്നതിനുള്ള നാഷണൽ പേയ്‌മെൻ്റ് കോർപ്പറേഷൻ ഓഫ് ഇന്ത്യയുടെ (എൻ.പി.സി.ഐ) അനുമതി ആപ്പിന് അടുത്തിടെയാണ് ലഭിച്ചത്.

ഓൺബോർഡിംഗ് പരിധി നീക്കം ചെയ്തതോടെ ഇന്ത്യയിലെ മുഴുവൻ ഉപയോക്തൃ അടിത്തറയിലേക്കും യു.പി.ഐ സേവനങ്ങൾ വിപുലീകരിക്കാൻ വാട്‌സാപ് പേ യ്ക്ക് സാധിക്കുന്നതാണ്.

വാട്‌സാപ് ആപ്പില്‍ തന്നെ പണം അയയ്‌ക്കുന്നതിനും സ്വീകരിക്കുന്നതിനുമുള്ള സംവിധാനമാണ്

വാട്‌സാപ് പേ വാഗ്ദാനം ചെയ്യുന്നത്. യൂണിഫൈഡ് പേയ്‌മെൻ്റ് ഇൻ്റർഫേസ് (യു.പി.ഐ) വഴി പണം അയയ്‌ക്കാനും സ്വീകരിക്കാനും ഈ ഫീച്ചര്‍ ഉപയോക്താക്കളെ സഹായിക്കുന്നു. ഫീച്ചർ പ്രവർത്തനക്ഷമമാക്കിയാൽ ഉപയോക്താക്കൾക്ക് വ്യത്യസ്‌ത ഉൽപ്പന്നങ്ങൾക്കും സേവനങ്ങൾക്കും പണമടയ്‌ക്കാൻ ഈ സൗകര്യം ഉപയോഗിക്കാം.

1. മൊബൈലില്‍ വാട്‌സാപ് തുറന്ന ശേഷം സ്ക്രീനിൻ്റെ മുകളിൽ വലത് വശത്തുള്ള മൂന്ന്-ഡോട്ട് ബട്ടൺ ടാപ്പ് ചെയ്യുക

2. ഡ്രോപ്പ്-ഡൗൺ മെനുവിൽ നിന്ന് 'പേയ്‌മെൻ്റ്' ഓപ്ഷന്‍ തിരഞ്ഞെടുക്കുക

3. 'പേയ്‌മെൻ്റ് രീതി ചേര്‍ക്കുക (Add Payment Method)' ഓപ്ഷൻ തിരഞ്ഞെടുക്കുക

4. 'ബാങ്ക് അക്കൗണ്ട്' അല്ലെങ്കിൽ 'റുപേ ക്രെഡിറ്റ് കാർഡ്' എന്നിവയിൽ ഒന്ന് തിരഞ്ഞെടുക്കുക

5. നിബന്ധനകളും വ്യവസ്ഥകളും വായിച്ച് 'അംഗീകരിക്കുക, തുടരുക (Accept and Continue)' ക്ലിക്ക് ചെയ്യുക

6. നിങ്ങളുടെ ബാങ്ക് അക്കൗണ്ട് തിരഞ്ഞെടുക്കുക

7. നിങ്ങളുടെ ബാങ്ക് അക്കൗണ്ടുമായി ലിങ്ക് ചെയ്‌തിരിക്കുന്ന ഫോൺ നമ്പർ വഴി നിങ്ങളുടെ ബാങ്ക് വിശദാംശങ്ങൾ പരിശോധിക്കുക

8. ബാങ്ക് അക്കൗണ്ട് ചേർത്ത ശേഷം പരിശോധിച്ചുറപ്പിക്കൽ പ്രക്രിയ പൂർത്തിയാക്കാൻ 'ചേർക്കുക (Add)' ടാപ്പു ചെയ്യുക

വാട്‌സാപ് പേ ഫീച്ചർ ഉപയോഗിച്ച് ഉപയോക്താക്കൾക്ക് ചാറ്റുകൾ വഴി പണം അയയ്‌ക്കാനും സ്വീകരിക്കാനും സാധിക്കുന്നതാണ്

വാട്‌സാപ് ചാറ്റിലെ '(Share) പങ്കിടുക' ഐക്കണിൽ ടാപ്പ് ചെയ്‌ത് 'പേയ്‌മെൻ്റ്' തിരഞ്ഞെടുക്കുക

പങ്കിടൽ (Share) ഫയൽ ഐക്കണിന് അടുത്തുള്ള 'പേയ്‌മെൻ്റ്' ഷോര്‍ട്ട്കട്ട് ടാപ്പ് ചെയ്യുക

നിങ്ങൾ അയയ്‌ക്കാൻ ആഗ്രഹിക്കുന്ന തുക നൽകുക, തുടർന്ന് പേയ്‌മെൻ്റ് പൂര്‍ത്തിയാക്കുക

വാട്‌സാപ് ഉപയോഗിക്കുന്ന രണ്ട് ഉപയോക്താക്കളും ഈ ഫീച്ചർ പ്രവർത്തനക്ഷമമാക്കിയാൽ മാത്രമാണ് വാട്‌സാപ് പേ വഴിയുള്ള ഇടപാടുകൾ പ്രവർത്തിക്കൂ എന്ന കാര്യം പ്രത്യേകം ശ്രദ്ധിക്കുക.

ഉപയോക്തൃ ഓൺബോർഡിംഗിലെ പരിധി നീക്കം ചെയ്തതോടെ ഗൂഗിൾ പേ, ഫോൺപേ, ഇൻ്റഗ്രേറ്റഡ് യു.പി.ഐ സേവനങ്ങള്‍ നല്‍കുന്ന മറ്റ് ബാങ്കിംഗ് ആപ്പുകൾ തുടങ്ങിയവ പോലുള്ള പേയ്‌മെൻ്റ് സേവന മേഖലയിലെ മറ്റ് പ്രധാന കമ്പനികളുമായി മത്സരിക്കാൻ വാട്‌സാപ് പേ സജ്ജമായിരിക്കുകയാണ്.