ബിസിനസ് യാത്രയില്‍ അനിശ്ചിതത്വങ്ങളും മാനസിക സമ്മര്‍ദ്ദങ്ങളും സ്വാഭാവികമാണ്. പുതിയ പ്രോജക്റ്റുകള്‍ ആരംഭിക്കുമ്പോഴോ സാമ്പത്തിക വെല്ലുവിളികള്‍ നേരിടുമ്പോഴോ ഉണ്ടാകുന്ന ഭയവും ആശങ്കയും മൂലം പലപ്പോഴും പ്രധാന തീരുമാനങ്ങള്‍ വൈകുകയോ ലക്ഷ്യങ്ങളില്‍ നിന്ന് പിന്തിരിയുകയോ ചെയ്യാറുണ്ട്. പ്രശസ്ത എഴുത്തുകാരനും ചിന്തകനുമായ മാര്‍ക്ക് മാന്‍സന്‍ (Mark Manson) ചൂണ്ടിക്കാണിക്കുന്നത് മനസ് നമ്മെ മുന്നോട്ട് നയിക്കുന്ന എഞ്ചിനല്ല, മറിച്ച് പലപ്പോഴും നമ്മുടെ വഴികളില്‍ ഉയര്‍ന്നുവരുന്ന ഒരു ചുവരാണെന്നാണ്.
സമ്മര്‍ദ്ദ ഘട്ടങ്ങളില്‍ മനസിനെ എങ്ങനെ നിയന്ത്രിക്കണമെന്നും വികാരങ്ങള്‍ക്ക് അടിപ്പെടാതെ ബിസിനസില്‍ കൃത്യമായ തീരുമാനങ്ങള്‍ എങ്ങനെ കൈക്കൊള്ളണമെന്നു നോക്കാം.
നമ്മുടെ മനസിന് പ്രധാനമായും രണ്ട് തലങ്ങളുണ്ട്. ഒന്ന് ചിന്തകളും വികാരങ്ങളും ഭയങ്ങളും നിരന്തരം ഉത്പാദിപ്പിക്കുന്ന 'തിങ്കിംഗ് മൈന്‍ഡ്' (Thinking Mind), മറ്റൊന്ന് ഈ ചിന്തകളെ തികച്ചും വസ്തുനിഷ്ഠമായി വീക്ഷിക്കുന്ന 'ഒബ്‌സര്‍വിംഗ് മൈന്‍ഡ്' (Observing Mind).
ഒരു ബിസിനസ് സംരംഭകന്‍ വെല്ലുവിളി നേരിടുമ്പോള്‍ ഉണ്ടാകുന്ന ഭയം സ്വാഭാവികമാണ്. എന്നാല്‍ 'എനിക്ക് ഭയമുണ്ട്, അതിനാല്‍ ഞാന്‍ ഇത് ഉപേക്ഷിക്കുന്നു' എന്ന് കരുതുന്നതിന് പകരം, 'എന്റെ മനസ് നിലവില്‍ ഭയം ഉല്‍പ്പാദിപ്പിക്കുന്നുണ്ട്, എന്നാല്‍ ഞാന്‍ എന്റെ ലക്ഷ്യത്തിലേക്ക് തന്നെ മുന്നേറും' എന്ന് വേര്‍തിരിച്ചു കാണാന്‍ സാധിക്കണം. വികാരങ്ങളില്‍ നിന്ന് മാറിനിന്ന് തീരുമാനമെടുക്കാനുള്ള ഈ ശേഷിയാണ് വിജയകരമായ നേതൃത്വത്തിന്റെ അടിത്തറ.
'എനിക്ക് ഇപ്പോള്‍ പേടിയാണ്, ആ പേടി മാറിയ ശേഷമേ ഞാന്‍ അടുത്ത ഘട്ടത്തിലേക്ക് കടക്കൂ' എന്ന് കരുതുന്നത് അപ്രായോഗികമാണ്. ഭയവും ആശങ്കയും ഇല്ലാതാക്കാന്‍ ശ്രമിക്കുന്തോറും അവ വര്‍ധിക്കുകയേ ഉള്ളൂ.
വിജയികളായ സംരംഭകര്‍ ഭയമോ വിമുഖതയോ ഇല്ലാത്തവരല്ല; മറിച്ച്, ഭയം നിലനില്‍ക്കുമ്പോള്‍ തന്നെ ആവശ്യമായ തീരുമാനങ്ങള്‍ എടുക്കാന്‍ പ്രാപ്തരായവരാണ്. വികാരങ്ങള്‍ വരുമ്പോള്‍ അവയെ അംഗീകരിക്കുക, തുടര്‍ന്ന് ലക്ഷ്യത്തിലേക്ക് മുന്നേറുക.
പ്രശ്‌നങ്ങളും പ്രതിസന്ധികളും ഇല്ലാത്ത ഒരു ബിസിനസ് ലോകം സാധ്യമല്ല. ബിസിനസ് വളരുന്നതിനനുസരിച്ച് പ്രശ്‌നങ്ങളുടെ വ്യാപ്തിയും മാറുന്നു. അതിനാല്‍ വെല്ലുവിളികളെ ശിക്ഷയായി കാണാതെ, നിങ്ങളുടെ മാനേജ്മെന്റ് ശേഷി മെച്ചപ്പെടുത്താനുള്ള പരിശീലനമായി (Training) കാണുക.
സ്ഥിരതയാര്‍ന്ന സമീപനവും വൈകാരികമായ പക്വതയും വളര്‍ത്തിയെടുക്കുന്നതിലൂടെ ബിസിനസിലും വ്യക്തിജീവിതത്തിലും മികച്ച നേട്ടങ്ങള്‍ കൈവരിക്കാന്‍ സാധിക്കും.
Read DhanamOnline in English
Subscribe to Dhanam Magazine
