ഒരു ഫ്രാഞ്ചൈസിയെ യഥാര്‍ത്ഥത്തില്‍ വികസന സാധ്യമാക്കുന്നത് എന്താണ്?
'സ്‌കെയ്ലബിലിറ്റി' (Scalabiltiy) എന്നത് വെറുമൊരു ഫാഷന്‍ വാക്ക് മാത്രമല്ല; അത് ഫ്രാഞ്ചൈസിങ്ങിലെ സുസ്ഥിരമായ വളര്‍ച്ചയുടെ ഡിഎന്‍എ തന്നെയാണ്.
ബിസിനസിന്റെ പ്രധാന കരുത്തോ ഗുണനിലവാരമോ നഷ്ടപ്പെടുത്താതെ, പുതിയ വിപണികളിലേക്ക് കാര്യക്ഷമമായി വ്യാപിപ്പിക്കാനും കൂടുതല്‍ സംരംഭകരെ ശാക്തീകരിക്കാനും സാധിക്കുന്ന ഒരു സംവിധാനം കെട്ടിപ്പടുക്കുക എന്നതാണ് ഇതിനര്‍ത്ഥം. എന്റെ ദീര്‍ഘകാലത്തെ അനുഭവസമ്പത്തിലൂടെ, ഈ രീതിയിലുള്ള വിജയകരമായ പകര്‍പ്പ് സാധ്യമാക്കുന്ന നിര്‍ണായകമായ സവിശേഷതകളും ശക്തമായ സംവിധാനങ്ങളും ഞാന്‍ തിരിച്ചറിഞ്ഞിട്ടുണ്ട്. യഥാര്‍ത്ഥത്തില്‍ വികസിപ്പിക്കാന്‍ സാധിക്കുന്ന ഒരു ഫ്രാഞ്ചൈസി മോഡല്‍ തിരഞ്ഞെടുക്കുമ്പോഴോ, വികസിപ്പിച്ചെടുക്കുമ്പോഴോ സംരംഭകര്‍ ശ്രദ്ധിക്കേണ്ട പ്രധാന കാര്യങ്ങള്‍ എന്തൊക്കെെയന്ന് നോക്കാം.
മികച്ച രീതിയില്‍ വികസിപ്പിക്കാന്‍ സാധിക്കുന്ന ഏതൊരു ഫ്രാഞ്ചൈസിയുടെയും ഹൃദയമെന്നത് കേവലമൊരു ആശയമല്ല, മറിച്ച് കൃത്യമായി രേഖപ്പെടുത്തപ്പെട്ടതും പരീക്ഷിച്ച് വിജയിച്ചതും വ്യക്തമായി ലാഭം തെളിയിച്ചതുമായ ഒരു ബിസിനസ് രീതിയാണ്. ഒരു ആശയത്തെ വെറുതെ ഫ്രാഞ്ചൈസി ചെയ്യാന്‍ കഴിയില്ലെന്ന് ഞങ്ങള്‍ എപ്പോഴും പറയാറുണ്ട്.
യഥാര്‍ത്ഥ ബിസിനസ് ഉടമ തങ്ങളുടെ നിലവിലുള്ള പ്രവര്‍ത്തനങ്ങളില്‍ നിന്ന് സ്ഥിരമായി മികച്ച ലാഭം ഉണ്ടാക്കുന്നുണ്ടെന്ന് തെളിയിച്ചിരിക്കണം. മറ്റൊരാള്‍ക്കും ഇതേ മാതൃകയില്‍ വിജയകരമായി നടത്താന്‍ കഴിയുമെന്ന് കാണിച്ചുകൊടുക്കുകയാണ് ഇവിടെ ചെയ്യുന്നത്.
പതിറ്റാണ്ടുകളായുള്ള ഞങ്ങളുടെ നിരീക്ഷണം പൈലറ്റ് ഓപറേഷനുകളുടെ നിര്‍ണായക പങ്ക് മനസിലാക്കിത്തന്നിട്ടുണ്ട്. യഥാര്‍ത്ഥ വിപണിയിലെ ഈ പരീക്ഷണം വിലയേറിയ ഉള്‍ക്കാഴ്ചകള്‍ നല്‍കുന്നു. ബിസിനസ് മാതൃക മറ്റുള്ളവരിലേക്ക് വ്യാപിപ്പിക്കുന്നതിന് മുമ്പുതന്നെ, ഏറ്റവും മികച്ച ഫലം നല്‍കുന്ന രീതിയില്‍ അതിനെ പരിഷ്‌കരിക്കാന്‍ ഇത് സഹായിക്കുന്നു. കാലത്തെ അതിജീവിച്ച്, അതിന്റെ കരുത്തും ലാഭക്ഷമതയും തെളിയിച്ച ഒരു യഥാര്‍ത്ഥ ബ്ലൂപ്രിന്റാണ് ഇത്.
ഒരു ബിസിനസ് മാതൃക വിജയകരമെന്ന് തെളിയിക്കപ്പെട്ടു കഴിഞ്ഞാല്‍, അതിന്റെ തുടര്‍ന്നുള്ള വളര്‍ച്ച നിലകൊള്ളുന്നത് ഫ്രാഞ്ചൈസി പങ്കാളികളെ ശാക്തീകരിക്കുന്നതിനായി രൂപകല്‍പന ചെയ്തിട്ടുള്ള പിന്തുണാ സംവിധാനങ്ങളിലാണ്.
ഓപറേഷന്‍സ് മാന്വല്‍: ഇത് വെറും ഗൈഡ് മാത്രമല്ല, മറിച്ച് കൃത്യതയും സ്ഥിരതയും നിലനിര്‍ത്താനുള്ള ഒരു 'വിശുദ്ധ ഗ്രന്ഥം' തന്നെയാണ്. ഏറ്റവും മികച്ച ഫലം ലഭിക്കുന്നതിനായി ഫ്രാഞ്ചൈസിയുടെ ഓരോ കാര്യവും എങ്ങനെ കൈകാര്യം ചെയ്യണമെന്ന് വിശദീകരിക്കുന്ന, കാലാനുസൃതമായി പുതുക്കുന്ന ഒരു വിശദമായ രേഖയാണിത്. ഓരോ ശാഖയും ഉപഭോക്താവിന് ഒരുപോലെയുള്ള അനുഭവം നല്‍കുന്നുവെന്ന് ഇത് ഉറപ്പാക്കുന്നു.
തുടര്‍ച്ചയായ മാര്‍ഗനിര്‍ദേശം: സ്കെയ്ലബ്ളായ ഒരു ഫ്രാഞ്ചൈസിയെ മറ്റുള്ളവയില്‍ നിന്ന് വേറിട്ടുനിര്‍ത്തുന്നത് അവര്‍ നല്‍കുന്ന നിരന്തര പിന്തുണയും ഉപദേശങ്ങളുമാണ്. ഇത് ബിസിനസിന്റെ തുടക്കത്തില്‍ നല്‍കുന്ന പരിശീലനത്തിന് അപ്പുറമുള്ളതാണ്. ഉല്‍പന്നങ്ങള്‍ കണ്ടെത്തുക, മികച്ച പ്രൊഡക്റ്റ് മിക്‌സ് തിരഞ്ഞെടുക്കുക, വിപണന തന്ത്രങ്ങള്‍, ജീവനക്കാരുമായി ബന്ധപ്പെട്ട കാര്യങ്ങള്‍, സാമ്പത്തിക നിയമങ്ങള്‍ പാലിക്കല്‍ തുടങ്ങിയ സുപ്രധാന മേഖലകള്‍ ഇതില്‍ ഉള്‍പ്പെടുന്നു.
വിദ്യാഭ്യാസ - പരിശീലന പരിപാടികള്‍: ശക്ത മായ പരിശീലനം ഏറെ പ്രധാനമാണ്. സ്കെയ്ലബ്ളായ ഫ്രാഞ്ചൈസി ശൃംഖല, ബിസിനസ് ഉടമകള്‍ക്കും അവരുടെ ജീവനക്കാര്‍ക്കുമായി തുടക്കത്തിലും തുടര്‍ന്നും കൃത്യമായ പരിശീലനം ലഭിക്കുന്നുണ്ടെന്ന് ഉറപ്പാക്കുന്നു. ശൃംഖല വളരുന്നതിനനുസരിച്ച് ഈ പരിശീലനങ്ങളും വിപുലീകരിക്കപ്പെടുന്നു.
നവീകരണവും വികസനവും: ഞാന്‍ എപ്പോഴും ശുപാര്‍ശ ചെയ്യാറുള്ള മികച്ച ഫ്രാഞ്ചൈസി കമ്പനികള്‍, വെറുമൊരു ബിസിനസ് സംവിധാനം നല്‍കുക മാത്രമല്ല ചെയ്യുന്നത്. മറിച്ച് അവര്‍ ഉല്‍പന്നങ്ങളുടെയും സേവനങ്ങളുടെയും കാലാനുസൃതമായ വികാസത്തിന് നേതൃത്വം നല്‍കുകയും ചെയ്യുന്നു. നിരന്തര ഗവേഷണങ്ങളിലൂടെയും വികസനത്തിലൂടെയും അവര്‍ ഉപഭോക്താക്കളുടെ മാറുന്ന ആവശ്യങ്ങളോട് പ്രതികരിക്കുന്നു. ഇത് ബ്രാന്‍ഡിനെ എപ്പോഴും പുതുമയുള്ളതാക്കി നിര്‍ത്താനും എല്ലാ ഫ്രാഞ്ചൈസി പങ്കാളികള്‍ക്കും വിപണിയില്‍ മികച്ച മത്സരം കാഴ്ചവെക്കാനും സഹായിക്കുന്നു.
സ്‌കെയ്ലബിലിറ്റി പലപ്പോഴും ഫ്രാഞ്ചൈസി നല്‍കുന്നവര്‍ക്കും എടുക്കുന്നവര്‍ക്കും ഗണ്യമായ സാമ്പത്തിക നേട്ടങ്ങള്‍ സമ്മാനിക്കുന്നു.
എക്കോണമീസ് ഓഫ് സ്‌കെയ്ല്‍: ഈ സംവിധാനത്തിലൂടെ ഫ്രാഞ്ചൈസി പങ്കാളികള്‍ക്ക് ലഭിക്കുന്ന വലിയ നേട്ടങ്ങളെക്കുറിച്ച് ഞാന്‍ എടുത്തുപറയാറുണ്ട്. ഉല്‍പന്നങ്ങള്‍ വലിയ അളവില്‍ ഒന്നിച്ച് വാങ്ങുമ്പോള്‍ ലഭിക്കുന്ന വിലക്കുറവിനൊപ്പം ദേശീയതലത്തിലുള്ള പരസ്യപ്രചാരണങ്ങള്‍, കേന്ദ്രീകൃതമായ ഗുണനിലവാര നിയന്ത്രണം, പങ്കുവെക്കപ്പെടുന്ന ഇന്നവേഷന്‍ എന്നിവ ഇതില്‍ ഉള്‍പ്പെടുന്നു. ശൃംഖല വളരുന്നതിനനുസരിച്ച് ഈ നേട്ടങ്ങളുടെ ശക്തിയും കൂടുന്നു.
കാര്യക്ഷമമായ തൊഴില്‍ വിഭജനം: ഫ്രാഞ്ചൈസി നല്‍കുന്നവരും എടുക്കുന്നവരും തമ്മിലുള്ള മികച്ച ബന്ധം ശക്തമായ തൊഴില്‍ വിഭജനത്തിന് വഴിതുറക്കുന്നു. ഉല്‍പന്നങ്ങള്‍ വാങ്ങുന്നതിനുള്ള ചര്‍ച്ചകള്‍, പുതിയ ഉല്‍പന്നങ്ങളുടെ വികസനം, മാര്‍ക്കറ്റിങ് സാമഗ്രികളുടെ നിര്‍മാണം തുടങ്ങിയ ജോലികള്‍ ഫ്രാഞ്ചൈസി നല്‍കുന്ന കമ്പനി കേന്ദ്രീകൃതമായി കൈകാര്യം ചെയ്യുന്നു. ഇത് ഫ്രാഞ്ചൈസിഎടുത്തവര്‍ക്ക് തങ്ങളുടെ വിലപ്പെട്ട സമയം പ്രാദേശികമായ ബിസിനസ് നടത്തിപ്പിലും ഉപഭോക്തൃ സേവനത്തിലും പൂര്‍ണമായി വിനിയോഗിക്കാന്‍ സ്വാതന്ത്ര്യം നല്‍കുന്നു.
ചെലവ് കുറഞ്ഞ വിപുലീകരണം: ഫ്രാഞ്ചൈസി നല്‍കുന്ന കമ്പനിയുടെ കാഴ്ചപ്പാടില്‍, ബിസിനസ് വളര്‍ത്താനുള്ള ഏറ്റവും ചെലവ് കുറഞ്ഞ മാര്‍ഗമാണിത്. ഫ്രാഞ്ചൈസി പങ്കാളികള്‍ തുടക്കത്തില്‍ നിക്ഷേപം നടത്തുകയും തുടര്‍ന്ന് റോയല്‍റ്റി തുക നല്‍കുകയും ചെയ്യുന്നു. ഒപ്പം പുതിയ ശാഖ തുടങ്ങുന്നതിനും ജീവനക്കാര്‍ക്ക് പരിശീലനം നല്‍കുന്നതിനും അത് വിജയകരമായി ആരംഭിക്കുന്നതിനുമുള്ള ചെലവുകള്‍ അവര്‍ തന്നെ വഹിക്കുന്നു. ഇത് ഫ്രാഞ്ചൈസി അനുവദിക്കുന്ന കമ്പനിയുടെ കടബാധ്യതകളും ഉത്തരവാദിത്തങ്ങളും കുറക്കുകയും വേഗത്തിലുള്ള വളര്‍ച്ച സാധ്യമാക്കുകയും ചെയ്യുന്നു.
ലാളിത്യവും പ്രതിബദ്ധതയുമുള്ള മാനേജ്മെന്റ്: സ്വന്തം പണം നിക്ഷേപിച്ചിട്ടുള്ളതിനാല്‍, ഫ്രാഞ്ചൈസി പങ്കാളികള്‍ക്ക് തങ്ങളുടെ ശാഖയുടെ ദൈനംദിന പ്രവര്‍ത്തനങ്ങളില്‍ വലിയ പ്രതിബദ്ധതയും ഉത്തരവാദിത്തവും ഉണ്ടായിരിക്കും. ഇത് ഫ്രാഞ്ചൈസി നല്‍കുന്ന കമ്പനിയുടെ മേല്‍നോട്ടച്ചുമതല ലഘൂകരിക്കുന്നു. അതിന്റെ ഫലമായി ശൃംഖലയിലുടനീളം കൂടുതല്‍ ലളിതവും ചെലവ് കുറഞ്ഞതുമായ ഒരു മാനേജ്മെന്റ് സംവിധാനം രൂപപ്പെടുന്നു.
ദ്രുതഗതിയിലുള്ള വളര്‍ച്ച: സ്വയം ധനം കണ്ടെ ത്തുന്ന ബിസിനസ് ശാഖകളും ലളിതമായ മാനേജ്മെന്റ് ഘടനയും ഉള്ളതിനാല്‍, കമ്പനി നേരിട്ട് നടത്തുന്ന ബിസിനസുകളേക്കാള്‍ വളരെ വേഗത്തില്‍ ഫ്രാഞ്ചൈസി ശൃംഖലകള്‍ക്ക് വളരാന്‍ സാധിക്കും.
കുറഞ്ഞ റിക്രൂട്ട്‌മെന്റ് ബാധ്യത: ഫ്രാഞ്ചൈസി പങ്കാളികളുടെ ദീര്‍ഘകാലത്തേക്കുള്ള പ്രതിബദ്ധത, കമ്പനിയുടെ സ്വന്തം ശാഖകള്‍ക്കായി നിരന്തരം മാനേജര്‍മാരെ കണ്ടെത്തേണ്ടതും നിയമിക്കേണ്ടതുമായ ജോലിയില്‍ നിന്ന് ഫ്രാഞ്ചൈസി നല്‍കുന്ന കമ്പനിയെ ഒഴിവാക്കുന്നു.
സ്കെയ്ലബ്ളായ ഒരു ഫ്രാഞ്ചൈസി തങ്ങളുടെ ബ്രാന്‍ഡിന്റെ കരുത്ത് ഉപയോഗിച്ച് ഉപഭോക്താക്കളെയും പുതിയ ഫ്രാഞ്ചൈസി പങ്കാളികളെയും ഒരുപോലെ ആകര്‍ഷിക്കുന്നു.
ബ്രാന്‍ഡ് അംഗീകാരം: ബിസിനസ് രംഗത്തേക്ക് വരാന്‍ ആഗ്രഹിക്കുന്നവര്‍ക്ക് നന്നായി അറിയപ്പെടുന്ന ഒരു ബ്രാന്‍ഡ് നാമം വലിയൊരു ആകര്‍ഷണമാണ്. പലയിടങ്ങളിലായി ശാഖകള്‍ തുടങ്ങുന്നതിലൂടെ ബ്രാന്‍ഡിന്റെ പ്രശസ്തി വര്‍ധിക്കുന്നത് ഫ്രാഞ്ചൈസി നല്‍കുന്നവര്‍ക്കും എടുക്കുന്നവര്‍ക്കും ഒരുപോലെ നേട്ടമാണ്.
മികച്ച വിപണി പങ്കാളിത്തം: ഫ്രാഞ്ചൈസി പങ്കാളികള്‍ പലപ്പോഴും അതത് പ്രദേശവാസികളായതുകൊണ്ടും അവര്‍ക്ക് ആ സ്ഥലത്തെക്കുറിച്ച് വ്യക്തമായ അറിവുള്ളതുകൊണ്ടും ബ്രാന്‍ഡിന് വലിയൊരു നേട്ടമായി മാറുന്നു. പുതിയ ബിസിനസുകള്‍ ഫലപ്രദമായി നേടിയെടുക്കാന്‍ ഇത് സഹായിക്കുന്നു.
ഉയര്‍ന്ന ഫ്രാഞ്ചൈസി പ്രതിബദ്ധത: ഫ്രാഞ്ചൈസി പങ്കാളികള്‍ അവരുടെ പണം നിക്ഷേപിക്കുന്നതുകൊണ്ട് തന്നെ, അവരില്‍ സമാനതകളില്ലാത്ത പ്രതിബദ്ധതയും അഭിമാനവും വളരുന്നു. ഇത് മികച്ച ഉപഭോക്തൃ സേവനത്തിലേക്കും വിശ്വസ്തതയിലേക്കും നയിക്കുന്നു.
കുറഞ്ഞ പരാജയ നിരക്ക്: സാധാരണ സ്റ്റാര്‍ട്ടപ്പുകളെ അപേക്ഷിച്ച് ഫ്രാഞ്ചൈസി ബിസിനസുകള്‍ക്ക് വിജയസാധ്യത കൂടുതലാണ്. ഇന്ത്യയില്‍ ആദ്യത്തെ അഞ്ച് വര്‍ഷത്തിനുള്ളില്‍ പരാജയപ്പെടുന്ന ഫ്രാഞ്ചൈസികളുടെ നിരക്ക് കേവലം 15 ശതമാനം മാത്രമാണ്. സ്വതന്ത്ര ബിസിനസുകളുടെ പരാജയ നിരക്ക് ഇതിനേക്കാള്‍ വളരെ കൂടുതലായതുകൊണ്ട് തന്നെ, ഇത് കൂടുതല്‍ സുരക്ഷിതവും തെളിയിക്കപ്പെട്ടതുമായ ഒരു ബിസിനസ് മാതൃകയാണെന്ന് വ്യക്തമാകുന്നു.
സ്കെയ്ലബ്ളായ ഫ്രാഞ്ചൈസികള്‍ക്ക് എപ്പോഴും വ്യക്തമായ, ദീര്‍ഘവീക്ഷണത്തോടെയുള്ള ഒരു തന്ത്രത്തിന്റെ പിന്തുണയുണ്ടായിരിക്കും.
ആഗോള സാധ്യതകള്‍ (മാസ്റ്റര്‍ ഫ്രാഞ്ചൈസിങ്): ആഗോളതലത്തില്‍ വളരാന്‍ ആഗ്രഹിക്കുന്ന ഫ്രാഞ്ചൈസി ഉടമകള്‍ക്കായി ഞങ്ങള്‍ പലപ്പോഴും 'മാസ്റ്റര്‍ ഫ്രാഞ്ചൈസിങ്' രീതികള്‍ നിര്‍ദേശിക്കാറുണ്ട്. ഈ സാങ്കേതിക വിദ്യ പുതിയ രാജ്യങ്ങളില്‍ വളരെ പെട്ടെന്ന് ബിസിനസ് വ്യാപിപ്പിക്കാന്‍ സഹായിക്കുന്നു. ഇവിടെ മാസ്റ്റര്‍ ഫ്രാഞ്ചൈസി എടുക്കുന്ന വ്യക്തി, ആ ബിസിനസ് മാതൃക പ്രാദേശിക വിപണിക്ക് അനുയോജ്യമായ രീതിയില്‍ മാറ്റിയെടുക്കുന്നു. അതോടൊപ്പം പുതിയ ശാഖകള്‍ കണ്ടെത്തല്‍, പരിശീലനം, പിന്തുണ എന്നിവ കൈകാര്യം ചെയ്യുന്നു. ഇത് ഫ്രാഞ്ചൈസി നല്‍കുന്ന കമ്പനിക്ക് കുറഞ്ഞ സാമ്പത്തിക ബാധ്യതയില്‍ വേഗത്തിലുള്ള വളര്‍ച്ച ഉറപ്പാക്കും.
വ്യക്തമായ സാമ്പത്തിക ഘടനയും ഫീസുകളും: തുടക്കത്തിലെ ഫ്രാഞ്ചൈസി ഫീസ്, റോയല്‍റ്റി ഫീസ്, മാര്‍ക്കറ്റിങ് ഫീസ് എന്നിവ ഉള്‍പ്പെടുന്ന ഫീസ് ഘടന പരിശോധിക്കാന്‍ ഞാന്‍ ക്ലയ്ന്റുകളോട് ആവശ്യപ്പെടാറുണ്ട്. ഈ ഘടന ഫ്രാഞ്ചൈസി നല്‍കുന്ന കമ്പനിയുടെ സാമ്പത്തിക ആവശ്യങ്ങളും ഫ്രാഞ്ചൈസി എടുക്കുന്ന ആളുടെ നിക്ഷേപത്തിന്മേലുള്ള ലാഭസാധ്യതയും കൃത്യമായി സന്തുലിതമാക്കുന്ന ഒന്നായിരിക്കണം. സുസ്ഥിരവും ആരോഗ്യകരവുമായ വളര്‍ച്ചക്ക് ഇത് വളരെ പ്രധാനമാണ്.
തന്ത്രപരമായ ആസൂത്രണം: ഒരു വിശദമായ ബിസിനസ് ബ്ലൂപ്രിന്റ്, അല്ലെങ്കില്‍ തന്ത്രപരമായ പ്ലാന്‍ ഉണ്ടായിരിക്കണമെന്ന് ഞാന്‍ എപ്പോഴും വാദിക്കാറുണ്ട്. ഈ അടിസ്ഥാന രേഖ ബിസിനസിലെ എല്ലാ പ്രധാന കാര്യങ്ങളും പരിശോധിക്കുന്നു.
യഥാര്‍ത്ഥത്തില്‍ സ്കെയ്ലബ്ളായ ഒരു ഫ്രാഞ്ചൈസി എന്നത് വളരെ ശക്തവും എളുപ്പത്തില്‍ പകര്‍ത്താന്‍ കഴിയുന്നതുമായ ഒരു ബിസിനസ് രീതിയാണ്. വിപുലമായ പരിശീലനം, തുടര്‍ച്ചയായ സഹായം, ശക്തമായ ഒരു ബ്രാന്‍ഡിന്റെ ആകര്‍ഷണീയത എന്നിവയുടെ പിന്തുണ ഇതിനുണ്ടാകും. ഈ ശക്തമായ കൂട്ടുകെട്ട്, സ്വന്തം വിജയത്തിലും ബ്രാന്‍ഡിന്റെ വിജയത്തിലും താല്‍പര്യമുള്ള പ്രതിബദ്ധതയുള്ള സംരംഭകരിലൂടെ വളരെ വേഗത്തിലും ചെലവ് കുറഞ്ഞതുമായ രീതിയില്‍ ബിസിനസ് വളര്‍ത്താന്‍ സഹായിക്കുന്നു.
നിങ്ങള്‍ ഒരു ഫ്രാഞ്ചൈസിയില്‍ നിക്ഷേപം നടത്താന്‍ ആഗ്രഹിക്കുന്നവരോ, അല്ലെങ്കില്‍ ഫ്രാഞ്ചൈസിങ്ങിലൂടെ നിങ്ങളുടെ ബിസിനസ് വളര്‍ത്താന്‍ ആഗ്രഹിക്കുന്നവരോ ആണെങ്കില്‍ മുകളില്‍ പറഞ്ഞ കാര്യങ്ങള്‍ മനസിലാക്കേണ്ടതാണ്.
(ഫ്രാഞ്ചൈസി മാനേജ്‌മെന്റില്‍ പിഎച്ച്ഡി നേടിയ ഡോ. ചാക്കോച്ചന്‍ മത്തായിക്ക് ഈ മേഖലയില്‍ 35 വര്‍ഷത്തിലേറെ പ്രവൃത്തിപരിചയമുണ്ട്. എന്‍ഐഐറ്റി, ആപ്ടെക്, കാഡ് സെന്റര്‍, കാവിന്‍ കെയര്‍ ഗ്രൂപ്പിന്റെ ഗ്രീന്‍ ട്രെന്‍ഡ്സ്, നാച്വറല്‍സ് സലൂണ്‍ ആന്‍ഡ് സ്പാതുടങ്ങിയ പ്രമുഖ ബ്രാന്‍ഡുകള്‍ക്കൊപ്പം അദ്ദേഹം പ്രവര്‍ത്തിച്ചിട്ടുണ്ട്. നിലവില്‍ 'Franchising Rightway' എന്ന കമ്പനി നടത്തുന്നു. 'Hairs Culture' എന്ന സ്ഥാപനത്തിന്റെ സഹ-സ്ഥാപകന്‍ കൂടിയാണ്.
ഫോണ്‍: 9884051455, ഇമെയില്‍: chacko@franchisingrightway.com
(Originally published in Dhanam Magazine July 15, 2026 issue.)
Read DhanamOnline in English
Subscribe to Dhanam Magazine
