സ്വര്‍ണവില കൂടുമോ, കുറയുമോ? നിക്ഷേപകര്‍ ശ്രദ്ധിക്കേണ്ട കാര്യങ്ങള്‍ എന്തെല്ലാം? പ്രിന്‍സ് ജോര്‍ജ് പറയുന്നു
സംസ്ഥാനത്ത് സ്വര്‍ണവില ഈ മാസത്തെ ഏറ്റവും കുറഞ്ഞ നിരക്കിലെത്തിയിരിക്കുകയാണ്. സ്വര്‍ണ വിലയില്‍ ചാഞ്ചാട്ടം തുടരുമ്പോള്‍ നിക്ഷേപകര്‍ക്കറിയേണ്ടത് ഇനി വില കൂടാനിടയുണ്ടോ എന്നാണ്. ഇതാ സ്വര്‍ണത്തിന്റെ ട്രെന്‍ഡ് വ്യക്തമാക്കുകയാണ് ഡിബിഎഫ്എസ് മാനേജിംഗ് ഡയറക്റ്റര്‍ പ്രിന്‍സ് ജോര്‍ജ്. ഒപ്പം ഇപ്പോള്‍ സ്വര്‍ണത്തില്‍ നിക്ഷേപിക്കുന്നവര്‍ അറിയേണ്ട കാര്യങ്ങളും.
സ്വര്‍ണം രാജ്യാന്തര വിപണിയില്‍ ഒരു ഔണ്‍സിന് 2000 ഡോളറിന് മുകളില്‍ വന്നിരുന്നു. ഇന്ന് അത് ഏകദേശം 1710 ഡോളറിലേക്ക് എത്തിയിരിക്കുകയാണ്. ഈ ഉയർച്ച താഴ്ചകൾക്ക് കാരണങ്ങൾ പലതാണ്. കോവിഡ് പ്രതിസന്ധിയില്‍ സെന്‍ട്രല്‍ ബാങ്കുകള്‍ നല്‍കിയ സ്റ്റിമുലസ് പായ്‌ക്കേജുകളില്‍ ഒരു ഭാഗം സ്വര്‍ണത്തിലേക്കാണ് ഒഴുകി എത്തിയിരുന്നത്. കോവിഡ് പ്രതിസന്ധി ഉയരത്തിലായിരുന്ന കാലഘട്ടത്തില്‍ സ്റ്റിമുലസ് പാക്കേജുകളിലെ സ്വര്‍ണത്തിലേക്കുള്ള ഒഴുക്കാണ് ബഹുശക്തമായ ഒരു റാലിയുണ്ടായത്. എന്നാല്‍ പിന്നീട് സ്റ്റിമുലസ് പാക്കേജുകള്‍ കുറഞ്ഞു, ലോകമെമ്പാടുമുള്ളവരിലേക്ക് വാക്‌സിന്‍ എത്തിത്തുടങ്ങിയപ്പോള്‍ സ്ഥിതിഗതികള്‍ മാറിത്തുടങ്ങി. അമേരിക്കയില്‍ 38 ശതമാനം ജനങ്ങളും വാക്‌സിന്‍ എടുത്തു കഴിഞ്ഞു. ഇന്ത്യയുള്‍പ്പെടെ പല വികസിത രാജ്യങ്ങളിലും വാക്‌സിന്‍ വേഗത്തിലാക്കിയിട്ടുമുണ്ട്. ഇനി അത്തരത്തിലുള്ള ഒരു റാലി തിരികെ എത്താനും സാധ്യത കുറവാണ്.
'യൂണിവേഴ്‌സലി അക്‌സപ്റ്റഡ് കറന്‍സി'യായിട്ടാണ് സ്വര്‍ണത്തെ ആഗോള വിപണി കാണുന്നത്. ലോകത്തുള്ള മുഴുവന്‍ സ്വര്‍ണത്തിന്റെ 19 ശതമാനവും അമേരിക്കയുടെ ഫെഡറല്‍ റിസര്‍വിലാണുള്ളത്. അത് പോലെയാണ് ലോകമെമ്പാടുമുള്ള സ്ഥലങ്ങളിലും. എന്നാല്‍ ഇന്ത്യയിലും ചൈനയിലുമാണ് ആഭരണങ്ങളുടെ രൂപത്തില്‍ വാങ്ങി സൂക്ഷിക്കുന്ന അസറ്റ് ആയി സ്വര്‍ണത്തെ കാണുന്നത്.