ഇലക്ട്രിക് വാഹന വിപണി കീഴടക്കാൻ മാരുതി സുസുക്കി; YMCയും ₹10 ലക്ഷത്തിന് താഴെയുള്ള കാറും അണിയറയിൽ

ഇന്ത്യയിലെ ഏറ്റവും വലിയ കാർ നിർമ്മാതാക്കളായ മാരുതി സുസുക്കി തങ്ങളുടെ ആദ്യ ഇലക്ട്രിക് എസ്‌യുവിയായ 'ഇവിറ്റാര' (eVitara) ഈ വർഷം പുറത്തിറക്കിയതിന് പിന്നാലെ വിപണിയിൽ കൂടുതൽ ഇലക്ട്രിക് വാഹനങ്ങൾ എത്തിക്കാനുള്ള ഊർജിത ശ്രമത്തിലാണ്. ഇന്ത്യ ഉൾപ്പെടെയുള്ള വിവിധ വിപണികളിൽ ഇലക്ട്രിക് വാഹനങ്ങൾക്ക് വർദ്ധിച്ചുവരുന്ന ജനപ്രീതിയും ഡിമാൻഡും കണക്കിലെടുത്താണ് കമ്പനിയുടെ പുതിയ നീക്കം. വരും വർഷങ്ങളിൽ മാരുതി ഇന്ത്യന്‍ വിപണിയിലിറക്കുമെന്ന് കരുതുന്ന രണ്ട് പുതിയ ഇലക്ട്രിക് കാറുകള്‍ ഏതൊക്കെയാണെന്ന് പരിശോധിക്കാം.

മാരുതി വൈ.എം.സി (YMC - eMPV)

ഇവിറ്റാരയ്ക്ക് ശേഷം മാരുതി പുറത്തിറക്കുന്ന രണ്ടാമത്തെ ഇലക്ട്രിക് വാഹനമാണിത്. ഇവിറ്റാരയുടെ അതേ 'ഹിയര്‍ടെക്ട്-ഇ' (HEARTECT-e) പ്ലാറ്റ്‌ഫോമിനെ അടിസ്ഥാനമാക്കിയാണ് ഈ പുതിയ മൾട്ടി പർപ്പസ് വാഹനം (eMPV) രൂപകൽപ്പന ചെയ്യുന്നത്. നിലവിൽ പരീക്ഷണ ഘട്ടത്തിലുള്ള ഈ വാഹനം 2026 അവസാനത്തോടെയോ അല്ലെങ്കിൽ 2027 ആദ്യത്തോടെയോ വിപണിയിലെത്തുമെന്നാണ് പ്രതീക്ഷിക്കുന്നത്.

എസ്‌യുവിയുടെയും എംപിവിയുടെയും സമ്മിശ്ര രൂപത്തിലുള്ള ആകർഷകമായ ഡിസൈനായിരിക്കും ഇതിനുണ്ടാകുക. ക്ലോസ്ഡ് ഗ്രിൽ, അത്യാധുനിക എൽ.ഇ.ഡി ഹെഡ്‌ലാമ്പുകൾ, എയറോ ഇൻസെർട്ടുകളുള്ള അലോയ് വീലുകൾ എന്നിവ ഇതിന്റെ പ്രത്യേകതകളാണ്. വിശാലമായ ക്യാബിൻ, വലിയ ടച്ച്‌സ്‌ക്രീൻ, ക്യാപ്റ്റൻ സീറ്റുകൾ, 360 ഡിഗ്രി ക്യാമറ, ലെവൽ 2 അഡാസ് (Level 2 ADAS), വയർലെസ് ചാർജിംഗ്, വെന്റിലേറ്റഡ് സീറ്റുകൾ, പവേർഡ് സീറ്റുകൾ, കണക്റ്റഡ് കാർ സാങ്കേതികവിദ്യ, പനോരമിക് അല്ലെങ്കിൽ ഫിക്സഡ് ഗ്ലാസ് റൂഫ് എന്നിവ ഇതിലുണ്ടാകും. ഇതിന്റെ മുൻഭാഗത്താകും ഇലക്ട്രിക് മോട്ടോർ ഘടിപ്പിക്കുക. രണ്ട് ബാറ്ററി ഓപ്ഷനുകളിൽ ലഭിക്കുന്ന ഈ വാഹനത്തിന്റെ 49 kWh ബാറ്ററി വേരിയന്റ് 440 കിലോമീറ്ററും, 61 kWh ബാറ്ററി വേരിയന്റ് 543 കിലോമീറ്ററും ദൂരം ഒരു തവണ ചാർജ് ചെയ്താൽ ഓടുമെന്ന് അവകാശപ്പെടുന്നു. ഇത് പ്രധാനമായും കിയ കാരൻസ് ക്ലവിസ്, മഹീന്ദ്ര XEV 9S എന്നിവയുമായാണ് മത്സരിക്കുക.

10 ലക്ഷത്തിന് താഴെയുള്ള ജനപ്രിയ ഇവി

സാധാരണക്കാരായ ഉപഭോക്താക്കളെ ലക്ഷ്യമിട്ട് 10 ലക്ഷം രൂപയിൽ താഴെ വിലവരുന്ന ഒരു പുത്തൻ ഇലക്ട്രിക് കാറും (Mass-market EV) മാരുതി വികസിപ്പിക്കുന്നുണ്ട്. ഇവിറ്റാരയിൽ നിന്ന് വ്യത്യസ്തമായി മാരുതിയുടെ അരീന (Arena) ഡീലർഷിപ്പുകൾ വഴിയാകും ഇത് വിൽപ്പനയ്‌ക്കെത്തിക്കുക. ഇന്ത്യയിലെ ഏറ്റവും വലിയ പാസഞ്ചർ വാഹന റീട്ടെയിൽ ശൃംഖലയെ ഉപയോഗപ്പെടുത്തി വിൽപന വർദ്ധിപ്പിക്കാൻ ഇത് കമ്പനിയെ സഹായിക്കും.

ഇന്ത്യയിൽ തന്നെ നിർമ്മിച്ച് അന്താരാഷ്ട്ര വിപണിയിലേക്ക് കയറ്റുമതി ചെയ്യാനുദ്ദേശിക്കുന്ന ഈ മോഡൽ പ്രധാനമായും ടാറ്റ ടിയാഗോ ഇവിയുമായിട്ടാകും മത്സരിക്കുക. ഒരു മികച്ച സിറ്റി കാർ ആയി വിഭാവനം ചെയ്തിരിക്കുന്ന ഇതിന് 250-300 കിലോമീറ്റർ റേഞ്ച് നൽകുന്ന ചെറിയ ബാറ്ററി പാക്കാകും ഉണ്ടാവുക. വരും വർഷങ്ങളിൽ ഈ കാർ വിപണിയിലെത്തുമെന്നാണ് പ്രതീക്ഷിക്കുന്നത്.