ഇന്ത്യൻ ഓട്ടോ മൊബൈൽ വ്യവസായ രംഗത്ത് ചരിത്രത്തിലാദ്യമായി പ്രതിമാസ പാസഞ്ചർ വാഹന (PV) വിൽപ്പന 5 ലക്ഷം യൂണിറ്റുകൾ പിന്നിട്ടു. 2026 ഒക്ടോബറിൽ രാജ്യത്തെ മൊത്തം കാർ വിൽപ്പന 5.25 ലക്ഷത്തിനും 5.30 ലക്ഷത്തിനും ഇടയിലെത്തിയെന്നാണ് കണക്കാക്കുന്നത്. 2025 ഒക്ടോബറിൽ രേഖപ്പെടുത്തിയ 4,60,739 യൂണിറ്റുകളിൽ നിന്നാണ് ഈ വൻ മുന്നേറ്റം. ജിഎസ്ടി 2.0 നിലവിൽ വന്ന ശേഷമുള്ള ഉയർന്ന മുൻവർഷ അടിത്തറ (High Base) നിലനിൽക്കെയാണ് ഈ റെക്കോർഡ് നേട്ടം എന്നതും ശ്രദ്ധേയമാണ്.
മാരുതി സുസൂക്കി ഇന്ത്യ, ടാറ്റാ മോട്ടോഴ്‌സ് പാസഞ്ചര്‍ വെഹിക്കിള്‍സ്, മഹീന്ദ്ര ആന്‍ഡ് മഹീന്ദ്ര, ഹ്യുണ്ടായ് മോട്ടോര്‍ ഇന്ത്യ, കിയാ ഇന്ത്യ എന്നീ കമ്പനികള്‍ ചരിത്രത്തിലെ ഏറ്റവും ഉയര്‍ന്ന പ്രതിമാസ ആഭ്യന്തര വിതരണമാണ് ഒക്ടോബറില്‍ രേഖപ്പെടുത്തിയത്.
മാരുതി സുസൂക്കി കുതിപ്പിൽ
വിപണി നായകരായ മാരുതി സുസൂക്കി ഇന്ത്യ ലിമിറ്റഡ് (MSIL) ഒക്ടോബറിൽ 2.76 ലക്ഷം വാഹനങ്ങളുടെ മൊത്തം വിൽപ്പന നടത്തി 25 ശതമാനം വാർഷിക വളർച്ച നേടി. മാരുതിയുടെ ആഭ്യന്തര വിൽപ്പന 20 ശതമാനം ഉയർന്ന് 2.12 ലക്ഷം യൂണിറ്റിലെത്തി. കയറ്റുമതി 60 ശതമാനത്തോളം വർധിച്ച് 49,872 യൂണിറ്റുകളായി.
ചെറുകാറുകൾ: ചെറുകാർ വിഭാഗത്തിലെ വിൽപ്പന 38 ശതമാനം വർധിച്ച് 40,646 യൂണിറ്റുകളായി.
എസ്‌യുവി വിപണി: കമ്പനിയുടെ ചരിത്രത്തിലെ ഏറ്റവും ഉയർന്ന എസ്‌യുവി (SUV) വിൽപ്പനയാണ് ഒക്ടോബറിൽ കുറിച്ചത് — 73,058 യൂണിറ്റുകൾ.
സിഎൻജി വാഹനങ്ങൾ: 87,000 സിഎൻജി വാഹനങ്ങൾ വിറ്റഴിച്ചു. മാരുതിയുടെ ആകെ വിൽപ്പനയുടെ 40 ശതമാനവും സിഎൻജി മോഡലുകളാണ്.
ഉയർന്ന ആവശ്യകത കാരണം നിലവിൽ മാരുതിയുടെ ഡീലർ നെറ്റ്‌വർക്കിൽ 12 ദിവസത്തേക്കുള്ള സ്റ്റോക്ക് മാത്രമാണ് ശേഷിക്കുന്നത്. 2.45 ലക്ഷം വാഹനങ്ങളുടെ ബുക്കിംഗുകൾ തീർപ്പാകാനുമുണ്ട്.
ഹ്യുണ്ടായ് (HMIL): പ്രതിമാസ വിൽപ്പനയിൽ എക്കാലത്തെയും ഉയർന്ന നേട്ടമായ 82,299 യൂണിറ്റുകൾ (ആഭ്യന്തരം + കയറ്റുമതി) സ്വന്തമാക്കി. 17.7 ശതമാനമാണ് വാർഷിക വളർച്ച. ആഭ്യന്തര വിൽപ്പന 62,799 യൂണിറ്റുകളും (16.7% വളർച്ച) കയറ്റുമതി 19,500 യൂണിറ്റുകളുമാണ് (21.1% വളർച്ച). ശക്തമായ ഉത്സവ സീസൺ ഡിമാൻഡാണ് നേട്ടത്തിന് പിന്നിലെന്ന് ഹ്യുണ്ടായ് വ്യക്തമാക്കി.
ടാറ്റ മോട്ടോഴ്‌സ്: ആകെ 75,426 വാഹനങ്ങൾ വിറ്റഴിച്ചു; 23 ശതമാനം വാർഷിക വളർച്ച. ആഭ്യന്തര വിപണിയിൽ 21 ശതമാനം വർധനവോടെ 73,894 യൂണിറ്റുകൾ വിറ്റഴിച്ച് രണ്ടാമത്തെ വലിയ വിഹിതം സ്വന്തമാക്കി.
മഹീന്ദ്ര & മഹീന്ദ്ര (M&M): ആഭ്യന്തര വിപണിയിൽ 73,338 പാസഞ്ചർ വാഹനങ്ങൾ വിറ്റഴിച്ചു (2% വളർച്ച). കയറ്റുമതി ഉൾപ്പെടെ മൊത്തം 74,904 വാഹനങ്ങളാണ് വിറ്റത്. ഉത്സവ സീസണും പുതിയ മോഡലുകളും ആവശ്യകത കൂട്ടിയതായി എം ആൻഡ് എം ഓട്ടോമോട്ടീവ് ബിസിനസ് പ്രസിഡന്റ് വേലുസാമി ആർ പറഞ്ഞു. കമ്പനിയുടെ ആദ്യ സിഎൻജി മോഡലായ 'XUV 3XO ZNG' വിപണിയിൽ മികച്ച പ്രതികരണമാണ് നേടുന്നത്.
ഇരുചക്ര വാഹന മേഖലയിൽ, ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യയുടെ ആഭ്യന്തര വിൽപ്പന ഒക്ടോബറിൽ 11% വർധിച്ച് 6.65 ലക്ഷം യൂണിറ്റിലെത്തി. മുൻവർഷം ഇതേ കാലയളവിൽ ഇത് 5.99 ലക്ഷം യൂണിറ്റായിരുന്നു. ടിവിഎസ് മോട്ടോർ കമ്പനിയുടെ ആഭ്യന്തര ഇരുചക്ര വാഹന വിതരണം 4.22 ലക്ഷം യൂണിറ്റിൽ നിന്ന് 22.09% വർധിച്ച് 5.15 ലക്ഷം യൂണിറ്റിലെത്തി.
റോയൽ എൻഫീൽഡിന്റെ ആഭ്യന്തര വിൽപ്പന 1.17 ലക്ഷം യൂണിറ്റിൽ നിന്ന് 4.01% വർധിച്ച് 1.21 ലക്ഷം യൂണിറ്റായി
Fueled by festive demand, India’s auto industry achieved a historic milestone in October 2026 with over 5.25 lakh monthly car dispatches, led by Maruti Suzuki's record SUV and CNG sales.
Read DhanamOnline in English
Subscribe to Dhanam Magazine