സ്വർണവിലയിൽ ഇന്നും റെക്കോഡ് മുന്നേറ്റം; പവന് 3,000 രൂപ വർധിച്ചു; വെള്ളി വിലയിലും കുതിപ്പ്

സംസ്ഥാനത്ത് സ്വർണ നിരക്കുകളിൽ ഇന്നും (2026 ജനുവരി 26) വൻ വർധന. സ്വർണാഭരണങ്ങൾ തയ്യാറാക്കുന്ന 22 കാരറ്റ് പരിശുദ്ധിയുള്ള ഒരു ​ഗ്രാം സ്വർണത്തിന്റെ വിലയിൽ ഇന്ന് 375 രൂപയുടെ വർധന രേഖപ്പെടുത്തി. ഇതോടെ 14,915 രൂപയിലാണ് ഒരു ​ഗ്രാം സ്വർണം ഇന്ന് രാവിലെ റീട്ടെയിൽ ആഭരണ വിപണിയിൽ വ്യാപാരം ചെയ്യപ്പെടുന്നത്. ആനുപാതികമായി 22 കാരറ്റ് പരിശുദ്ധിയുള്ള ഒരു പവൻ സ്വർണത്തിന് 3,000 രൂ വർധിച്ച് 1,19,320 രൂപയിലേക്കും എത്തിച്ചേർന്നു.

സമാനമായി 18 കാരറ്റ് പരിശുദ്ധിയുള്ള ഒരു ​ഗ്രാം സ്വർണത്തിന്റെ വില തിങ്കളാഴ്ച രാവിലെ 310 രൂപ വർധിച്ച് 12,255 രൂപയിലെത്തി. ഇതിന്റെ ഒരു പവൻ സ്വർണത്തിന് 2,480 രൂപ ഉയർന്ന് 98,040 രൂപയായും രേഖപ്പെടുത്തി. അതുപോലെ 14 കാരറ്റ് സ്വർണത്തിന്റെ ഒരു ​ഗ്രാമിന് ഇന്ന് 235 രൂപ വർധിച്ച് 9,540 രൂപയായും ഇതിന്റെ ഒരു പവന് 1,880 രൂപ കൂടി 76,320 രൂപയായും ഇന്നത്തേക്ക് കുറിച്ചു. 9 കാരറ്റ് സ്വർണത്തിന്റെ ഒരു ​ഗ്രാമിന് 150 രൂപ കൂടി 6,150 രൂപയും ഇതിന്റെ ഒരു പവന് 1,200 രൂപ വർധിച്ച് 49,200 രൂപയായും രേഖപ്പെടുത്തി. വെള്ളി വില 10 ​ഗ്രാമിന് 345 രൂപയിലേക്ക് എത്തിച്ചേർന്നു. ഇന്ന് 10 രൂപയുടെ വർധന.

രാജ്യാന്തര വിപണിയിൽ 5,000 ഡോളർ കടന്നു

ചരിത്രത്തിലാദ്യമായി രാജ്യാന്തര വിപണിയിൽ ഒരു ഔൺസ് (31.1 ​ഗ്രാം) സ്വർണത്തിന്റെ വില 5,000 ഡോളർ നിലവാരം മറികടന്നു. രണ്ട് ശതമാനത്തിലേറെ ഉയർന്ന് 5,093 ഡോളർ നിലവാരത്തിലേക്ക് എത്തിച്ചേർന്ന് പുതിയ സർവകാല റെക്കോഡ‍ും കുറിച്ചു. 5,080 ഡോളർ നിലവാരത്തിലാണ് സ്വർണം ഇപ്പോൾ വ്യാപാരം ചെയ്യപ്പെടുന്നത്. സമാനമായി വെള്ളി വിലയിലും ഇന്ന് വൻ മുന്നേറ്റമാണ് പ്രകടമാകുന്നത്. രാജ്യാന്തര വിപണിയിൽ ഒരു ഔൺസ് വെള്ളിയുടെ വില അഞ്ച് ശതമാനത്തിലേറെ വർധനയോടെ 108 ഡോളർ നിലവാരത്തിലാണ് ഇപ്പോൾ വ്യാപാരം പുരോ​ഗമിക്കുന്നത്.

എന്തുകൊണ്ട് മുന്നേറ്റം?

യുഎസ് പ്രസിഡന്റ് ഡൊണൾഡ് ട്രംപിന്റെ താരിഫ് നയങ്ങൾ ആ​ഗോള വ്യാപാരമേഖലയിൽ സൃഷ്ടിക്കുന്ന പ്രതിസന്ധികളും ജിയോപൊളിറ്റിക്കൽ സംഘർഷങ്ങളുടെ പശ്ചാത്തലത്തിലുള്ള അനിശ്ചിതാവസ്ഥയും കാരണം സുരക്ഷിത നിക്ഷേപമെന്ന നിലയിലുള്ള ഡിമാൻഡ് ഉയരുന്നതാണ് സ്വർണവില കുതിക്കാനുള്ള മുഖ്യ ഘടകങ്ങൾ. ഇതിന് പുറമെ യുഎസ് ഡോളർ സൂചിക നാല് മാസത്തെ താഴ്ന്ന നിലയിലേക്ക് എത്തിച്ചേർന്നു. ഡോളറിന്റെ മൂല്യം ഇടിയുന്നത് സ്വർണം, വെള്ളി വില വർധിക്കാൻ പ്രേരിപ്പിക്കുന്ന ഘടകങ്ങളാണ്. കൂടാതെ ചൈന സ്വർണം വാങ്ങുന്നത് തുടരുന്നതും രാജ്യാന്തര വിപണിയിൽ സ്വർണവില ഉയർത്തുന്നു. ഈ മാറ്റങ്ങളുടെ പ്രതിഫലനമാണ് ആഭ്യന്തര വിപണിയിലും കാണാനാകുന്നത്.

സ്വർണാഭരണം വാങ്ങുന്നതിന് എത്രയാകും?

22 കാരറ്റ് സ്വർണത്തിന്റെ വിപണി വില 1,19,320 രൂപ നിലവാരത്തിലേക്ക് ഉയർന്നതോടെ ചുരുങ്ങിയത് അഞ്ച് ശതമാനം നിരക്കിൽ പണിക്കൂലി, സ്വര്‍ണ വിലയിലും പണിക്കൂലിയിലും ഈടാക്കുന്ന മൂന്ന് ശതമാനം വീതം ജിഎസ്ടി നികുതി, ഹാള്‍മാര്‍ക്കിങ് ചാര്‍ജ് ഇനത്തിലുള്ള 45 രൂപ, ഇതിന്മേലുള്ള 18 ശതമാനം ജിഎസ്ടി നികുതി എന്നിവ കൂടി ചേര്‍ത്ത് 1,29,217 രൂപയെങ്കിലും നല്‍കിയാലാണ് ഒരു പവന്‍റെ സ്വർണാഭരണം തിങ്കളാഴ്ച കടയില്‍ നിന്നും വാങ്ങാനാകുക. ഡിസൈന്‍ അനുസരിച്ച് പണിക്കൂലിയിൽ വ്യത്യാസമുണ്ടാകുമെന്നതും ശ്രദ്ധിക്കുക.