കേരളത്തിലെ 4 പ്രമുഖ സ്ഥാപനങ്ങളുമായി റൂഫ്ടോപ് സോളാർ പദ്ധതികളുടെ പങ്കാളിത്തത്തിനായി എലിസ്റ്റോ എനർജീസ് കരാറുകൾ ഒപ്പുവെച്ചു. ബ്രൊക്കേഡ് ഇന്ത്യ പോളിടെക്സ്, ഹൈലൈറ്റ് ബിസിനസ് പാർക്ക്, ഹൈലൈറ്റ് ബൊലേവാർഡ്, കാമറി ഐസ്ക്രീംസ് എന്നിവയുടെ വ്യവസായ, വാണിജ്യ, ഭക്ഷ്യ നിർമ്മാണ യൂണിറ്റുകളിൽ സൗരോർജ്ജം സംയോജിപ്പിച്ച് പ്രതിവർഷം 40 ലക്ഷം യൂണിറ്റ് വൈദ്യുതി ഉൽപ്പാദിപ്പിക്കാനും 2,700 ടൺ കാർബൺ ഡൈഓക്സൈഡ് കുറയ്ക്കാനുമാണ് പദ്ധതിയുടെ ലക്ഷ്യം.
കോഴിക്കോട് കേന്ദ്രമായി പ്രവർത്തിക്കുന്ന റിന്യൂവബിൾ എനർജി സ്ഥാപനമായ എലിസ്റ്റോ എനർജീസ് (Eallisto Energies) കേരളത്തിലെ പ്രമുഖരായ നാല് ബിസിനസ് സ്ഥാപനങ്ങളുമായി സഹകരണ കരാറുകളിൽ ഒപ്പുവെച്ചു. ബ്രൊക്കേഡ് ഇന്ത്യ പോളിടെക്സ് (Brocade India Polytex), ഹൈലൈറ്റ് ബിസിനസ് പാർക്ക് (HiLITE Business Park), ഹൈലൈറ്റ് ബൊലേവാർഡ് (HiLITE Boulevard), കാമറി ഐസ്ക്രീംസ് (Camerry Ice Creams) എന്നിവയുമായാണ് വ്യവസായ-വാണിജ്യ-ഭക്ഷണ നിർമ്മാണ മേഖലകളിൽ റൂഫ്ടോപ് സോളാർ (Rooftop Solar) വ്യാപിപ്പിക്കാൻ കരാറായത്.
കോഴിക്കോട്ടെ എലിസ്റ്റോ ഓഫീസിൽ നടന്ന ചടങ്ങിലാണ് പങ്കാളിത്തം ഔദ്യോഗികമായി പ്രഖ്യാപിച്ചത്. പദ്ധതികൾ യാഥാർത്ഥ്യമാകുന്നതോടെ പ്രതിവർഷം ഏകദേശം 40 ലക്ഷം യൂണിറ്റ് സോളാർ വൈദ്യുതി ഉൽപ്പാദിപ്പിക്കപ്പെടും. വാർഷികമായി 2,700 ടൺ കാർബൺ ഡൈഓക്സൈഡ് മലിനീകരണം ഒഴിവാക്കാനും ഇതിലൂടെ സാധിക്കും.
പാലക്കാടുള്ള നിർമ്മാണ യൂണിറ്റിൽ റൂഫ്ടോപ് സോളാർ സംവിധാനം സ്ഥാപിക്കുന്നതോടെ ബ്രൊക്കേഡ് ഇന്ത്യ പോളിടെക്സ് തങ്ങളുടെ വ്യവസായ പ്രവർത്തനങ്ങളിൽ നേരിട്ട് സൗരോർജ്ജം സംയോജിപ്പിക്കും. ഹൈലൈറ്റ് ഗ്രൂപ്പിന്റെ ഭാഗമായ ഹൈലൈറ്റ് ബിസിനസ് പാർക്കും ഹൈലൈറ്റ് ബൊലേവാർഡും തങ്ങളുടെ വാണിജ്യ കെട്ടിടങ്ങളിലും സോളാർ ശേഷി വ്യാപിപ്പിക്കുകയാണ്. വലിയ തോതിലുള്ള റിയൽ എസ്റ്റേറ്റ്, ഇൻഫ്രാസ്ട്രക്ചർ വികസനങ്ങളിൽ ക്ലീൻ എനർജിയുടെ പങ്ക് വർദ്ധിക്കുന്നതിനാണ് ഇത് അടിവരയിടുന്നത്.
ഭക്ഷണ നിർമ്മാണ മേഖലയിൽ റഫ്രിജറേഷൻ അടക്കമുള്ള ഊർജ്ജ ഉപഭോഗം കൂടുതലുള്ള പ്രവർത്തനങ്ങൾക്ക് പുതുശക്തിപകരാനാണ് കാമറി ഐസ്ക്രീംസ് റൂഫ്ടോപ് സോളാർ സ്വീകരിക്കുന്നത്. പരമ്പരാഗത ഗ്രിഡ് പവറിനെ ആശ്രയിക്കുന്നത് കുറയ്ക്കാനും കെട്ടിട ഇൻഫ്രാസ്ട്രക്ചർ കൂടുതൽ കാര്യക്ഷമമായി ഉപയോഗിക്കാനും കമ്പനി ലക്ഷ്യമിടുന്നു.
സോളാർ ഊർജ്ജത്തെ പാരിസ്ഥിതിക മാർഗ്ഗമായി മാത്രമല്ല, ദീർഘകാല ഓപ്പറേഷണൽ പ്ലാനിംഗിന്റെ ഭാഗമായി കേരളത്തിലെ ബിസിനസുകൾ കാണുന്നു. "ബിസിനസുകൾ ഇന്ന് സുസ്ഥിരതയ്ക്ക് കൂടുതൽ മുൻഗണന നൽകുന്നുണ്ട്. വിശ്വസനീയമായ ക്ലീൻ എനർജി സൊല്യൂഷനുകൾ വഴി പ്രായോഗികമായ മാറ്റം കൊണ്ടുവരികയാണ് ഇയാലിസ്റ്റോ ലക്ഷ്യമിടുന്നത്," എന്ന് എലിസ്റ്റോ ഗ്രൂപ്പ് മാനേജിംഗ് ഡയറക്ടർ ഷഹാദ് ബംഗ്ല പറഞ്ഞു.
ഓരോ സ്ഥാപനത്തിന്റെയും ആവശ്യങ്ങൾക്കനുസൃതമായി രൂപകൽപ്പന ചെയ്ത സൊല്യൂഷനുകളാണ് എലിസ്റ്റോ നൽകുന്നത്. വരും നാളുകളിൽ കൂടുതൽ കോർപ്പറേറ്റ് പങ്കാളിത്തങ്ങളിലൂടെ കേരളത്തിന്റെ സുസ്ഥിര ഊർജ്ജ ഭൂമികയ്ക്ക് കരുത്തുപകരാനാണ് കമ്പനിയുടെ ലക്ഷ്യം.
Read DhanamOnline in English
Subscribe to Dhanam Magazine