ദുബൈ ആസ്ഥാനമായുള്ള ആഗോള ടെക് കമ്പനിയായ എഫ് 9 ഇന്ഫോടെക് കൊച്ചിയില് പുതിയ കേന്ദ്രം ആരംഭിച്ചു. സൈബര് ആക്രമണങ്ങളില് നിന്ന് ബിസിനസുകളെ സുരക്ഷിതമാക്കുന്നതിനും ലോകമെമ്പാടുമുള്ള കമ്പനികള്ക്ക് നൂതന സാങ്കേതിക പരിഹാരങ്ങള് നല്കുന്നതിനും കമ്പനിയുടെ കേരളത്തിലെ പുതിയ കേന്ദ്രം സഹായിക്കും. ദുബൈക്ക് പുറമെ സൗദി അറേബ്യ, യു.എസ്, കാനഡ, അയര്ലണ്ട്, ഇന്തോനേഷ്യ, കെനിയ എന്നിവിടങ്ങളിലും എഫ് 9 ഇന്ഫോടെക്കിന് സാന്നിധ്യമുണ്ട്.
ഗ്ലോബല് സെന്റര് ഓഫ് എക്സലന്സ് (CoE), സൈബര് ഡിഫന്സ് സെക്യൂരിറ്റി ഓപ്പറേഷന്സ് സെന്റര് (SOC), റീജിയണല് ഹെഡ്ക്വാര്ട്ടേഴ്സ് എന്നിവ ഉള്പ്പെടുന്ന പുതിയ കേന്ദ്രം ഗ്രൂപ്പ് മീരാന് അധ്യക്ഷന് നവാസ് മീരാനും, സി.ഐ.ഐ അധ്യക്ഷയും ഫെഡറല് ബാങ്ക് എക്സിക്യൂട്ടീവ് ഡയറക്ടറുമായ ശാലിനി വാരിയറും ചേര്ന്ന് ഉദ്ഘാടനം ചെയ്തു.
എഫ് 9 ഇന്ഫോടെക്കിന്റെ നൂതന സാങ്കേതികവിദ്യ ഇന്ത്യയിലേക്ക് കൊണ്ടുവരുന്നതിനും പ്രാദേശിക തൊഴിലവസരങ്ങള് സൃഷ്ടിക്കുന്നതിനും ഈ പുതിയ കേന്ദ്രത്തിന് കഴിയുമെന്ന് സഹസ്ഥാപകനായ രാജേഷ് രാധാകൃഷ്ണന് പറഞ്ഞു. കേരളത്തിലെ ടെക് വ്യവസായത്തിന് വളര്ച്ചയുടെ പുതിയ പാതയിലേക്ക് നയിക്കുന്നതിനും പുതിയ കേന്ദ്രം സഹായിക്കുമെന്ന് എക്സിക്യൂട്ടീവ് ഡയറക്ടര് ജയകുമാര് മോഹനചന്ദ്രന് വ്യക്തമാക്കി.
ഏഴ് രാജ്യങ്ങളിലെ ബിസിനസുകള്ക്കും ഗവണ്മെന്റുകള്ക്കും ക്ലൗഡ്, സൈബര് സുരക്ഷ, ഡിജിറ്റല് ട്രാന്സ്ഫോര്മേഷന് സേവനങ്ങള് നല്കുന്ന സ്ഥാപനമാണ് എഫ് 9 ഇന്ഫോടെക്.
Read DhanamOnline in English
Subscribe to Dhanam Magazine