കേരളത്തിലെ അഭിമാന സ്ഥാപനമായ ഫെര്ട്ടിലൈസേഴ്സ് ആന്റ് കെമിക്കല്സ് ട്രാവന്കൂര് (FACT) ലിമിറ്റഡ് പുതിയ ഉയരങ്ങളില്. ഓഹരി വിപണിയുടെ പൊതുവായ തകര്ച്ചക്കിടയിലും കഴിഞ്ഞ അഞ്ച് വ്യാപാര ദിവസങ്ങളില് 30% വരെയാണ് ഓഹരി വില കുതിച്ചുയര്ന്നത്. വ്യാഴാഴ്ച രാവിലത്തെ വ്യാപാരത്തില് നാലു ശതമാനത്തോളം താഴ്ന്നുവെന്നു മാത്രം. കമ്പനി ഉടന് തന്നെ 'മിനി രത്ന' പദവി നേടാനിടയുണ്ടെന്ന പ്രതീക്ഷയാണ് വിപണിയില്.
കമ്പനി അധികൃതരുടെ അഭിപ്രായത്തില്, മിനി രത്ന പദവി നേടാന് ആവശ്യമായ പ്രധാന മാനദണ്ഡങ്ങളില് ഭൂരിഭാഗവും FACT ഇതിനകം തന്നെ പാലിച്ചിട്ടുണ്ട്. ഇനി ചില നടപടിക്രമങ്ങള് പൂര്ത്തിയാക്കുന്നതാണ് ബാക്കി. കേന്ദ്ര പൊതുമേഖലാ സ്ഥാപനങ്ങളില് സ്ഥിരമായ ലാഭം, സാമ്പത്തിക ശക്തി, നല്ല പ്രവര്ത്തനക്ഷമത എന്നിവ തെളിയിക്കുന്ന സ്ഥാപനങ്ങള്ക്കാണ് മിനി രത്ന പദവി നല്കുന്നത്. ഈ പദവി ലഭിച്ചാല് കമ്പനികള്ക്ക് നിക്ഷേപ തീരുമാനങ്ങളിലും വിപുലീകരണ പദ്ധതികളിലും കൂടുതല് സ്വാതന്ത്ര്യം ലഭിക്കും.
കഴിഞ്ഞ ഏതാനും വര്ഷങ്ങളായി കമ്പനിയുടെ സാമ്പത്തിക പ്രകടനം ഗണ്യമായി മെച്ചപ്പെട്ടിട്ടുണ്ട്. തുടര്ച്ചയായി മൂന്ന് വര്ഷം സര്ക്കാരിന് ഡിവിഡന്ഡ് നല്കി. ഏഴ് വര്ഷമായി ലാഭത്തിലുണ്ട്. അഞ്ച് വര്ഷമായി പോസിറ്റീവ് നെറ്റ്വര്ത്ത് നിലനിര്ത്തുന്നു. ഈ നേട്ടങ്ങള് കമ്പനിയെയും മിനി രത്ന പദവിയിലേക്കുള്ള ശക്തമായ സ്ഥാനത്തേക്ക് എത്തിച്ചതായാണ് വിലയിരുത്തല്. കമ്പനിയുടെ ഭാവി സാധ്യതകളില് നിക്ഷേപകര്ക്ക് ആത്മവിശ്വാസം വര്ധിച്ചതോടെ FACT ഓഹരിയില് ശക്തമായ വാങ്ങലാണ് നടക്കുന്നത്.
1943ല് ആരംഭിച്ച FACT ഇന്ത്യയിലെ ഏറ്റവും പഴക്കമുള്ള വള നിര്മ്മാണ കമ്പനികളിലൊന്നാണ്. പിന്നീട് ഇത് കേന്ദ്ര സര്ക്കാരിന്റെ കീഴിലുള്ള പൊതുമേഖലാ സ്ഥാപനമായി മാറി. ഇന്ന് കേരളത്തില് ആസ്ഥാനം ഉള്ള ഏറ്റവും വലിയ കേന്ദ്ര പൊതുമേഖലാ സ്ഥാപനങ്ങളില് ഒന്നാണ് FACT. അമോണിയം സള്ഫേറ്റ്, അമോണിയം ഫോസ്ഫേറ്റ്, അമോണിയ, കാപ്രോളാക്ടം തുടങ്ങിയ വളങ്ങളും രാസവസ്തുക്കളും കമ്പനി നിര്മിക്കുന്നു. രാജ്യത്തെ കൃഷി മേഖലയ്ക്ക് ആവശ്യമായ വളങ്ങളുടെ വിതരണത്തില് FACT വലിയ പങ്ക് വഹിക്കുന്നു.
മിനി രത്ന പദവി ലഭിച്ചാല് FACTയ്ക്ക്
നിക്ഷേപ തീരുമാനങ്ങളില് കൂടുതല് സ്വാതന്ത്ര്യം
പുതിയ പദ്ധതികള് ആരംഭിക്കാന് കൂടുതല് സാമ്പത്തിക അധികാരം
സംയുക്ത സംരംഭങ്ങള് തുടങ്ങാനുള്ള സൗകര്യം എന്നിവ ലഭിക്കും.
ഇത് കമ്പനിയുടെ വളര്ച്ചയ്ക്ക് കൂടുതല് വേഗം നല്കുമെന്നും നിക്ഷേപകരുടെ ആത്മവിശ്വാസം ഉയര്ത്തുമെന്നും വിപണി വിലയിരുത്തുന്നു.
ഓഹരി വില കുത്തനെ ഉയരുന്നത് ചില പ്രധാന കാരണങ്ങളാലാണ്.
സര്ക്കാരിന്റെ ഗ്യാസ് വിതരണ നയം: ഇന്ത്യന് സര്ക്കാര് അടുത്തിടെ പ്രകൃതിവാതക വിതരണവുമായി ബന്ധപ്പെട്ട പുതിയ ഉത്തരവ് പുറത്തിറക്കി. വള നിര്മാണ കമ്പനികള്ക്ക് ആവശ്യമായ പ്രകൃതിവാതകത്തിന്റെ വലിയ പങ്ക് ഉറപ്പാക്കി നല്കും എന്നതാണ് ഇതിന്റെ പ്രാധാന്യം. വള നിര്മാണത്തില് ഗ്യാസ് പ്രധാന അസംസ്കൃത വസ്തുവാണ്. അതിനാല് ഗ്യാസ് ലഭ്യത ഉറപ്പായാല് ഉല്പാദനവും ലാഭ സാധ്യതയും വര്ധിക്കും. ഈ പ്രഖ്യാപനത്തെ തുടര്ന്ന് വള കമ്പനികളുടെ ഓഹരികളില് ശക്തമായ വാങ്ങല് ഉണ്ടായി.
FACT മാത്രം അല്ല, മറ്റ് വള കമ്പനികളുടെ ഓഹരികളും ഉയര്ന്നു. RCF, Chambal Fertilisers, GSFC തുടങ്ങിയ കമ്പനികളിലും ശക്തമായ മുന്നേറ്റം. ഒരു മേഖലയെക്കുറിച്ചുള്ള നല്ല വാര്ത്തകള് വന്നാല് ആ മേഖലയിലെ പല ഓഹരികളും ഒരുമിച്ച് കുതിക്കാറുണ്ട്.
ഇറാന് ഉള്പ്പെടുന്ന പശ്ചിമേഷ്യയിലെ സംഘര്ഷം മൂലം വള നിര്മാണത്തിനുള്ള ചില അസംസ്കൃത വസ്തുക്കളുടെ വിതരണം അനിശ്ചിതത്വത്തിലാവുന്നു. ഇതോടെ വള വില ഉയര്ന്നേക്കുമെന്ന പ്രതീക്ഷ വിപണിയില് ഉണ്ടാകുന്നു. അത് വള കമ്പനികളുടെ ഓഹരികളില് നിക്ഷേപകരുടെ താല്പര്യം വര്ധിപ്പിക്കുന്നു.
Read DhanamOnline in English
Subscribe to Dhanam Magazine