കേരള ഗ്രാമീണ ബാങ്കിന് പുതിയ ലോഗോ: ഗവർണ്ണർ അനാച്ഛാദനം ചെയ്തു

കേരള ഗ്രാമീണ ബാങ്കിന്റെ ഔദ്യോഗിക പുനർനാമകരണത്തിന്റെയും ഏകീകൃത ലോഗോയുടെയും പ്രകാശനം കേരള ഗവർണർ രാജേന്ദ്ര വിശ്വനാഥ് ആർലേക്കർ നിർവഹിച്ചു. തിരുവനന്തപുരത്തെ കേരള ലോക് ഭവനിൽ നടന്ന പ്രൗഢമായ ചടങ്ങിലാണ് ബാങ്കിന്റെ പുതിയ മുഖം അവതരിപ്പിച്ചത്.

റിസർവ് ബാങ്ക് ജനറൽ മാനേജർ മുഹമ്മദ്‌ സാജിദ് പി.കെ, നബാർഡ് ചീഫ് ജനറൽ മാനേജർ നാഗേഷ് കുമാർ അനുമാല, കേരള ഗ്രാമീണ ബാങ്ക് ചെയർപേഴ്സൺ വിമല വിജയഭാസ്കർ, ജനറൽ മാനേജർ പ്രദീപ്‌ പദ്മൻ, തിരുവനന്തപുരം റീജിയണൽ മാനേജർ സുബ്രഹ്മണ്യൻ പോറ്റി, മാർക്കറ്റിംഗ് സെൽ ചീഫ് മാനേജർ രാജീവ്‌ ആർ. തുടങ്ങിയവർ ചടങ്ങിൽ പങ്കെടുത്തു.

കേരള ഗ്രാമീണ ബാങ്കിന്റെ ജനക്ഷേമപരമായ പ്രവർത്തനങ്ങളെ ഗവർണർ പ്രശംസിച്ചു. സാമ്പത്തികമായി പിന്നോക്കം നിൽക്കുന്നവരെ മുഖ്യധാരയിലേക്ക് കൊണ്ടുവരുന്ന ഫിനാൻഷ്യൽ ഇൻക്ലൂഷൻ പോലെയുള്ള സുപ്രധാന മേഖലകളിലെ ബാങ്കിന്റെ പ്രവർത്തനം ശ്രദ്ധേയമാണെന്നും അദ്ദേഹം പറഞ്ഞു.

ഗവൺമെന്റ് സ്പോൺസർ ചെയ്യുന്ന വിവിധ സബ്സിഡി സ്കീമുകൾ ജനങ്ങളിലേക്ക് കൃത്യമായി എത്തിക്കുന്നതിൽ കേരളാ ഗ്രാമീണ ബാങ്ക് വഹിക്കുന്ന പങ്ക് നിസ്തുലമാണ്. വർധിച്ചു വരുന്ന സൈബർ കുറ്റകൃത്യങ്ങൾ തടയാൻ എല്ലാ ബാങ്കുകളും ആവശ്യമായ മുൻകരുതലുകൾ എടുക്കണമെന്നും രാജേന്ദ്ര ആർലേക്കർ ആവശ്യപ്പെട്ടു.

പ്രാദേശിക ഗ്രാമീൺ ബാങ്കുകൾക്ക് രാജ്യവ്യാപകമായി ഒരു പൊതുവായ ബ്രാൻഡിംഗ് കൊണ്ടുവരുന്നതിന്റെ അടിസ്ഥാനത്തിൽ മുൻപ് 'കേരള ഗ്രാമീൺ ബാങ്ക്' എന്നായിരുന്ന പേര് കേന്ദ്ര സർക്കാർ ഉത്തരവ് പ്രകാരമാണ് 'കേരള ഗ്രാമീണ ബാങ്ക്' എന്ന് പുനർനാമകരണം ചെയ്തത്. പൊതുവായ ലോഗോ നടപ്പിലാക്കുകയും ചെയ്തു. 1976 ൽ സ്ഥാപിതമായ ബാങ്കിന് നിലവിൽ കേരളത്തിൽ 635 ശാഖകളും 12 റീജിയണൽ ഓഫീസുകളുമുണ്ട്.

_{Governor unveils new logo for Kerala Grameena Bank.}