കേരളത്തിന്റെ സ്റ്റാര്‍ട്ടപ്പ് ആവാസവ്യവസ്ഥയ്ക്ക് പുതിയ ദിശാബോധവും വന്‍കിട നിക്ഷേപ അവസരങ്ങളും ഒരുക്കി കേരള സ്റ്റാര്‍ട്ടപ്പ് മിഷന്റെ (KSUM) നേതൃത്വത്തില്‍ സംഘടിപ്പിക്കുന്ന 'ഹഡില്‍ ഗ്ലോബല്‍ 2026' (Huddle Global 2026) എട്ടാം പതിപ്പിന് തിരുവനന്തപുരത്തെ കോവളം വേദിയാകുന്നു. ഏഷ്യയിലെ ഏറ്റവും വലിയ ബീച്ച്-സൈഡ് സ്റ്റാര്‍ട്ടപ്പ് സംഗമമാണ് ഹഡില്‍ ഗ്ലോബല്‍.
നവംബര്‍ 12 മുതല്‍ 14 വരെ ദി റാവിസ് ഹോട്ടലില്‍ നടക്കുന്ന ഈ ആഗോള സ്റ്റാര്‍ട്ടപ്പ് സംഗമത്തില്‍ ഇന്ത്യയ്ക്ക് അകത്തുനിന്നും പുറത്തുനിന്നുമുള്ള പ്രമുഖ സംരംഭകര്‍, നിക്ഷേപകര്‍, നയരൂപകര്‍ത്താക്കള്‍, സാങ്കേതിക വിദഗ്ധര്‍ തുടങ്ങിയവര്‍ പങ്കെടുക്കും.
കേരളത്തെ സാങ്കേതികവിദ്യയിലും നൂതനാശയങ്ങളിലും അധിഷ്ഠിതമായ വിജ്ഞാനാധിഷ്ഠിത വ്യവസായ കേന്ദ്രമാക്കി (Knowledge-based industry hub) മാറ്റുന്നതില്‍ ഹഡില്‍ ഗ്ലോബല്‍ നിര്‍ണായക പങ്കാണ് വഹിക്കുന്നതെന്ന് കെഎസ് യുഎം സിഇഒ അനൂപ് അംബിക പറഞ്ഞു.
ഇത്തവണത്തെ ഹഡില്‍ ഗ്ലോബല്‍ പങ്കാളിത്തം കൊണ്ട് ഏറെ ശ്രദ്ധേയമാണ്. കേരളത്തിന്റെ സംരംഭക അന്തരീക്ഷത്തിലേക്ക് കൂടുതല്‍ അന്താരാഷ്ട്ര മൂലധനവും പങ്കാളിത്തവും ആകര്‍ഷിക്കാന്‍ ഈ പതിപ്പിന് സാധിക്കുമെന്നാണ് പ്രതീക്ഷിക്കുന്നത്.
4,000+ സ്റ്റാര്‍ട്ടപ്പുകള്‍: വിവിധ മേഖലകളില്‍ നിന്നുള്ള തുടക്കക്കാരും വളര്‍ന്നുവരുന്നതുമായ സംരംഭങ്ങള്‍.
150+ ആഗോള നിക്ഷേപകര്‍: തത്സമയ ചര്‍ച്ചകള്‍ക്കും പൈലറ്റ് ഫണ്ടിംഗിനുമായി പ്രമുഖ നിക്ഷേപകരുടെ സാന്നിധ്യം.
200+ എച്ച്എന്‍ഐകളും 200+ കോര്‍പറേറ്റുകളും: വന്‍കിട വ്യക്തിഗത നിക്ഷേപകരും (High Net worth Individuals) പ്രമുഖ കോര്‍പറേറ്റ് സ്ഥാപനങ്ങളും.
300+ മെന്റര്‍മാരും പ്രഭാഷകരും: ലോകോത്തര ബിസിനസ് പ്രമുഖരുടെ മാര്‍ഗ്ഗനിര്‍ദ്ദേശവും പ്രഭാഷണങ്ങളും.
150+ പ്രദര്‍ശകര്‍: അത്യാധുനിക സാങ്കേതികവിദ്യകളും ഉത്പന്നങ്ങളും അവതരിപ്പിക്കുന്ന എക്സിബിഷന്‍.
സ്റ്റാര്‍ട്ടപ്പുകള്‍ക്ക് നേരിട്ട് മൂലധനം സമാഹരിക്കാനും പുതിയ പങ്കാളിത്തങ്ങള്‍ കണ്ടെത്താനും ഉതകുന്ന രീതിയിലാണ് പരിപാടികള്‍ ആസൂത്രണം ചെയ്തിരിക്കുന്നത്.
ഇന്‍വെസ്റ്റര്‍ മാച്ച്മേക്കിംഗ്: 500-ലധികം ഇന്‍വെസ്റ്റര്‍-സ്റ്റാര്‍ട്ടപ്പ് കണക്ട് സെഷനുകള്‍.
ജിസിസി റൗണ്ട് ടേബിള്‍: ജിസിസി പ്രമുഖരുമായുള്ള റൗണ്ട് ടേബിള്‍ ചര്‍ച്ചകള്‍.
ഉത്പന്ന ലോഞ്ചുകളും എക്സ്പോയും: പ്രോഡക്ട് ലോഞ്ചിംഗ്, പ്രോഡക്ട് എക്സ്പോ, ഹഡില്‍ ക്രോസ് സെല്‍, ഹഡില്‍ സ്പീഡ് ഡേറ്റിംഗ് എന്നിവ പ്രധാന ആകര്‍ഷണങ്ങളാണ്.
ഭാവി വ്യവസായങ്ങളെയും വിപണികളെയും പുനര്‍നിര്‍വചിക്കുന്ന സാങ്കേതികവിദ്യകളുടെ വിപുലമായ പ്രദര്‍ശനവും ചര്‍ച്ചകളും ഹഡിലില്‍ നടക്കും.
എഐ & ഡീപ് ടെക്: നിര്‍മ്മിത ബുദ്ധി (AI/ML), ബ്ലോക്ക്ചെയിന്‍, ഇന്റര്‍നെറ്റ് ഓഫ് തിംഗ്സ് (IoT), റോബോട്ടിക്സ്, ഓഗ്മെന്റഡ്/വെര്‍ച്വല്‍ റിയാലിറ്റി (AR/VR).
ലൈഫ് സയന്‍സസും ഹെല്‍ത്തും: ഹെല്‍ത്ത്ടെക്, ലൈഫ് സയന്‍സസ്, ബയോമെഡിക്കല്‍ ഉപകരണങ്ങള്‍.
ഫ്യൂച്ചറിസ്റ്റിക് മേഖലകൾ: സ്പേസ്ടെക്, ഫിൻടെക്, ഗ്രീൻടെക്, ഇ-ഗവേണൻസ്.
ആഗോളതലത്തിലെ സങ്കീര്‍ണമായ വെല്ലുവിളികള്‍ക്ക് പരിഹാരമേകുന്ന ഹ്യൂമനോയിഡ് റോബോട്ടുകള്‍, സ്വയം പ്രവര്‍ത്തിക്കുന്ന ഓട്ടോണമസ് ഡ്രോണുകള്‍, സുസ്ഥിര ഊര്‍ജ്ജ പരിഹാരങ്ങള്‍, സ്മാര്‍ട്ട് സിറ്റി സാങ്കേതികവിദ്യകള്‍ എന്നിവ ഹഡില്‍ എക്സ്പോയില്‍ പ്രദര്‍ശിപ്പിക്കും.
ആശയങ്ങളെ യാഥാര്‍ത്ഥ്യമാക്കാനും ആഗോള വിപണിയിലേക്ക് വളരാനും ആഗ്രഹിക്കുന്ന സംരംഭകര്‍ക്കും സ്റ്റാര്‍ട്ടപ്പ് പ്രേമികള്‍ക്കും പ്രായഭേദമന്യേ ഹഡില്‍ ഗ്ലോബലില്‍ പങ്കെടുക്കാം. താല്പര്യമുള്ളവര്‍ക്ക് https://www.huddleglobal.co.in/ എന്ന ഔദ്യോഗിക വെബ്സൈറ്റ് വഴി രജിസ്റ്റര്‍ ചെയ്യാവുന്നതാണ്.
Kerala Startup Mission’s flagship event Huddle Global 2026 will bring together over 4,000 startups, 150+ global investors, and top innovators at Kovalam to boost the state's knowledge economy.
Read DhanamOnline in English
Subscribe to Dhanam Magazine