സംസ്ഥാനത്ത് സ്വർണവില മൂന്നാം ദിവസവും ഉയർന്നു. 22 കാരറ്റ് സ്വർണത്തിന്റെ ഒരു പവന് 200 രൂപ വർധിച്ച് 1,02,600 രൂപയായി. യു.എസ് ഇടക്കാല തിരഞ്ഞെടുപ്പ് ഫലങ്ങൾ സ്വർണവിലയിൽ കൂടുതൽ മാറ്റങ്ങൾ വരുത്തുമെന്നു അനലിസ്റ്റുകൾ വിലയിരുത്തുന്നു.
സംസ്ഥാനത്ത് സ്വർണ വില വീണ്ടും വർധിച്ചു. ഇന്ന് (നവംബർ 4) വ്യാപാരം തുടങ്ങിയപ്പോൾ 22 കാരറ്റ് സ്വർണത്തിന്റെ ഒരു ഗ്രാമിന് 25 രൂപ വർധന രേഖപ്പെടുത്തി. ഇതോടെ പുതുക്കിയ വിപണി വില ഗ്രാമിന് 12,825 രൂപയിലേക്ക് ഉയർന്നു. ആനുപാതികമായി 22 കാരറ്റ് സ്വർണത്തിന്റെ ഒരു പവന് 200 രൂപ കൂടി പുതിയ വിപണി വില 1,02,600 രൂപയിലേക്ക് എത്തിച്ചേർന്നു. ഇത് തുടർച്ചയായ മൂന്നാം ദിവസമാണ് സംസ്ഥാനത്ത് സ്വർണ നിരക്കുകളിൽ വർധന കുറിക്കുന്നത്.
നവംബർ ഒന്നിന് 22 കാരറ്റ് സ്വർണത്തിന്റെ വില ഗ്രാമിന് 12,730 രൂപയും ഒരു പവന് 1,01,840 രൂപയും എന്ന നാല് മാസത്തെ താഴ്ചയിലേക്ക് വീണിരുന്നു. അവിടെനിന്നും സാവധാനം കരകയറാനുള്ള ശ്രമങ്ങളാണ് സ്വർണത്തിൽ പ്രകടമാകുന്ന‌ത്.
അതുപോലെ ചെറുകാരറ്റ് സ്വർണത്തിന്റെ നിരക്കുകളിലും ഇന്ന് ആനുപാതിക വർധന രേഖപ്പെടുത്തി. 18 കാരറ്റ് സ്വർണത്തിന്റെ ഒരു ഗ്രാമിന് 20 രൂപ ഉയർന്ന് 10,495 രൂപയായും 14 കാരറ്റ് സ്വർണത്തിന്റെ ഒരു ഗ്രാമിന് 15 രൂപ കൂടി 8,210 രൂപയായും 9 കാരറ്റ് സ്വർണത്തിന്റെ ഒരു ഗ്രാമിന് 10 രൂപ വർധിച്ച് 5,295 രൂപയായും കുറിച്ചു.
അതേസമയം വെള്ളി വിലയിൽ ഇന്നും മാറ്റമില്ല. ഒരു ഗ്രാം വെള്ളിയുടെ വിപണി വില 200 രൂപയിൽ തുടരുന്നു. സമാനമായി 10 ഗ്രാം വെള്ളിക്ക് 2,000 രൂപയും 100 ഗ്രാം വെള്ളിയുടെ നിരക്ക് 20,000 രൂപയും ഒരു കിലോഗ്രാം വെള്ളിക്ക് 2,00,000 രൂപയായും കുറിച്ചു.
രാജ്യാന്തര വിപണിയിൽ കുറിക്കുന്ന വിലവ്യതിയാനങ്ങളുടെ ചുവടുപിടിച്ചാണ് ആഭ്യന്തര വിപണിയിലേയും സ്വർണത്തിലെ നീക്കങ്ങൾ. ഇന്ന് പുറത്തുവരുന്ന യു.എസ് ഇടക്കാല തിരഞ്ഞെടുപ്പ് ഫലം സ്വർണ വിപണിയിലും പ്രതിഫലിക്കുമെന്നാണ് വിലയിരുത്തൽ.
നിലവിലെ പ്രതിപക്ഷമായ ഡെമോക്രാറ്റുകൾക്ക് യു.എസ് കോൺഗ്രസിൽ മുൻതൂക്കം ലഭിച്ചാൽ ട്രംപിന്റെ ഭരണത്തിന് വെല്ലുവിളിയുയരുകയും സുഗമമായ ഭരണത്തിൽ അനിശ്ചിതത്വം നേരിടേണ്ടിവരുന്നപക്ഷം സ്വർണവില ഉയരാമെന്നാണ് അനലിസ്റ്റുകളുടെ വിലയിരുത്തൽ. ഡോളറിന്റെ ശക്തിക്ഷയിക്കുമെന്ന നിഗമനത്തിലാണ് ഈ അനുമാനം. നിലവിൽ ഒരു ട്രോയ് ഔൺസ് സ്വർണം 0.60% നേട്ടത്തോടെ 3,959 ഡോളർ നിലവാരത്തിലാണ് വ്യാപാരം പുരോഗമിക്കുന്നത്.
ഇന്ന് രാവിലെ കുറിച്ച 22 കാരറ്റ് സ്വർണത്തിന്റെ പുതിയ വിപണി വിലക്കൊപ്പം ഏറ്റവും ചുരുങ്ങിയത് അഞ്ച് ശതമാനം പണിക്കൂലി, സ്വര്‍ണത്തിനും പണിക്കൂലിക്കും മേൽ ചുമത്തുന്ന മൂന്ന് ശതമാനം ജിഎസ്ടി നികുതി, ഹാള്‍മാര്‍ക്ക് ചാര്‍ജ് ഇനത്തിൽ ഈടാക്കുന്ന 45 രൂപ, അതിന്മേലുള്ള 18 ശതമാനം ജി.എസ്.ടി എന്നിവയെല്ലാം കൂട്ടിച്ചേര്‍ത്ത് ഒരു പവന് സ്വര്‍ണാഭരണം ഇപ്പോൾ വാങ്ങുന്നതിന് 1,11,153 രൂപയെങ്കിലും ജ്വല്ലറികളിൽ ചെലവാക്കേണ്ടിവരും. അതേസമയം ആഭരണങ്ങളുടെ ഡിസൈനിൽ വരുന്ന മാറ്റമനുസരിച്ച് പണിക്കൂലിയിലും വ്യത്യാസം നേരിടാമെന്നതും ഓർക്കുക.
Gold prices in Kerala are reported to have risen, while investors watch the US midterm election outcome and global market trends for further direction.
Read DhanamOnline in English
Subscribe to Dhanam Magazine