പുണ്യ മാസമായ കർക്കിടകത്തിൽ ഭക്തർക്കായി സവിശേഷമായ തീർത്ഥാടന പാക്കേജുകൾ ഒരുക്കി കെഎസ്ആർടിസി ബജറ്റ് ടൂറിസം സെൽ (BTC) വൻ മുന്നേറ്റം നടത്തുന്നു. കേരളത്തിലെ വിവിധ ഡിപ്പോകളിൽ നിന്ന് നാലമ്പല ദർശനത്തിനും പഞ്ച പാണ്ഡവ ക്ഷേത്ര ദർശനത്തിനുമായി ആയിരക്കണക്കിന് ഭക്തരാണ് കെഎസ്ആർടിസിയെ ആശ്രയിക്കുന്നത്. സാധാരണക്കാർക്ക് കുറഞ്ഞ ചെലവിൽ സുരക്ഷിതമായി ക്ഷേത്ര ദർശനം നടത്താനുള്ള സൗകര്യം ഒരുക്കിയതാണ് ഈ പദ്ധതിയുടെ വിജയത്തിന് പിന്നിലെ പ്രധാന ഘടകം.
കെഎസ്ആർടിസി ബജറ്റ് ടൂറിസം സെല്ലിന്റെ കർക്കിടക മാസത്തെ പാക്കേജുകളിൽ ഏറ്റവും കൂടുതൽ ജനശ്രദ്ധ ആകർഷിച്ചത് പഞ്ച പാണ്ഡവ ക്ഷേത്ര ദർശനമാണ്. ആറന്മുള വള്ളസദ്യയുമായി ബന്ധപ്പെടുത്തി നടത്തുന്ന ഈ യാത്രയ്ക്ക് ഭക്തരിൽ നിന്ന് വലിയ പ്രതികരണമാണ് ലഭിക്കുന്നത്. തൃച്ചിറ്റാറ്റ്, തിരുപ്പുലിയൂർ, തിരുവാറൻമുള, തിരുവൻവണ്ടൂർ, തൃക്കൊടിത്താനം എന്നിവയാണ് ഈ പാണ്ഡവ ക്ഷേത്രങ്ങൾ. ജൂലൈ 19-ന് ആരംഭിച്ച ഈ സർവീസുകൾ സെപ്റ്റംബർ 16 വരെ നീണ്ടുനിൽക്കും.
പഞ്ച പാണ്ഡവ ക്ഷേത്ര ദർശനത്തിനായി ഇതിനോടകം തന്നെ നൂറിലധികം ട്രിപ്പുകൾ (98-103 ട്രിപ്പുകൾ) നടന്നു കഴിഞ്ഞു. ഏകദേശം 15,000-ൽ അധികം യാത്രക്കാർ ഈ പാക്കേജ് പ്രയോജനപ്പെടുത്തി. വരുമാനത്തിന്റെ കാര്യത്തിലും ഈ പാക്കേജ് മുൻപന്തിയിലാണ്; ഏതാണ്ട് 60 മുതൽ 65 ലക്ഷം രൂപ വരെ ഇതിലൂടെ കെഎസ്ആർടിസിക്ക് ലഭിച്ചു. പള്ളിയോട സേവാസംഘവുമായി സഹകരിച്ച് 2022 മുതൽ കെഎസ്ആർടിസി മാത്രമാണ് ഇത്തരമൊരു യാത്ര സംഘടിപ്പിക്കുന്നത് എന്നത് ഈ പദ്ധതിയുടെ സവിശേഷതയാണ്. ആറൻമുള വള്ള സദ്യയിലെ ചടങ്ങുകൾ കാണുന്നതിനും, കരക്കാർക്ക് മാത്രം നൽകുന്ന 20 വിഭവങ്ങൾ ഒഴികെയുള്ള മറ്റ് 44 വിഭവങ്ങൾ ഉൾപ്പെടുന്ന സദ്യയിലും തീർത്ഥാടകർക്ക് പങ്കെടുക്കാം.
ഭക്തിയുടെ വഴികളിലൂടെ കർക്കിടക മാസത്തിൽ വടക്ക് മുതൽ തെക്ക് വരെ വിവിധ നാലമ്പലങ്ങളിലേക്ക് കെഎസ്ആർടിസി പ്രത്യേക സർവീസുകൾ നടത്തുന്നുണ്ട്. എറണാകുളം (പിറവം), തൃശ്ശൂർ, കണ്ണൂർ നാലമ്പലങ്ങളാണ് പ്രധാനമായും ഈ പാക്കേജിൽ ഉൾപ്പെടുന്നത്.
തൃശ്ശൂർ നാലമ്പലം: തൃപ്രയാർ ശ്രീരാമ ക്ഷേത്രം, ഇരിങ്ങാലക്കുട കൂടൽമാണിക്യം ഭരതക്ഷേത്രം, മൂഴിക്കുളം ശ്രീ ലക്ഷ്മണ പെരുമാൾ ക്ഷേത്രം, പായമ്മൽ ശത്രുഘ്ന ക്ഷേത്രം എന്നിവയാണ് സന്ദർശിക്കുന്ന നാല് ക്ഷേത്രങ്ങൾ. തൃശ്ശൂർ നാലമ്പല ദർശനത്തിനായി ഇതുവരെ 115 ട്രിപ്പുകൾ നടത്തിയിട്ടുണ്ട്. ഏകദേശം 9,000 യാത്രക്കാർ പങ്കെടുത്ത ഈ യാത്രകളിൽ നിന്ന് 30 ലക്ഷം രൂപയോളം വരുമാനം ലഭിച്ചു.
എറണാകുളം (പിറവം) നാലമ്പലം: മാമലശ്ശേരി ശ്രീ രാമ സ്വാമി ക്ഷേത്രം, മേമുറി ശ്രീ ഭരത സ്വാമി ക്ഷേത്രം, മുളക്കുളം ശ്രീ ലക്ഷ്മണ സ്വാമി ക്ഷേത്രം, നെടുങ്ങോട്ട് ശ്രീ ശത്രുഘ്ന സ്വാമി ക്ഷേത്രം എന്നിവ സന്ദർശിക്കുന്ന രീതിയിലാണ് ഈ പാക്കേജ് ക്രമീകരിച്ചിരിക്കുന്നത്. 45 ഓളം ട്രിപ്പുകളിലായി 2,000-ൽ അധികം പേർ യാത്ര ചെയ്യുകയും 11 ലക്ഷം രൂപയ്ക്ക് മുകളിൽ വരുമാനം ലഭിക്കുകയും ചെയ്തു.
കണ്ണൂർ നാലമ്പലം: നീർവേലി ശ്രീരാമസ്വാമി ക്ഷേത്രം, ഇളയാവൂർ ഭരത ക്ഷേത്രം, പെരിഞ്ചേരി ലക്ഷ്മണ സ്വാമി ക്ഷേത്രം, പായം ശത്രുഘ്ന സ്വാമി ക്ഷേത്രം എന്നിവയാണ് ഇവിടുത്തെ ദർശന ക്രമം. 25-ലധികം ട്രിപ്പുകളിലായി ആയിരത്തോളം പേർ ഈ പാക്കേജ് ഉപയോഗപ്പെടുത്തി. ഇതിലൂടെ അഞ്ച് ലക്ഷം രൂപയിലധികം വരുമാനം ലഭിച്ചു.
കെഎസ്ആർടിസി ബജറ്റ് ടൂറിസം സെല്ലിന്റെ ഈ വൻ വിജയത്തിന് പിന്നിൽ കൃത്യമായ ആസൂത്രണമുണ്ട്. കേരളത്തിലുടനീളമുള്ള 93 യൂണിറ്റുകളിൽ നിന്നും യാത്രക്കാർക്ക് ഈ സർവീസുകൾ പ്രയോജനപ്പെടുത്താം എന്നതാണ് ഏറ്റവും വലിയ പ്രത്യേകത. ഭക്തർക്ക് തങ്ങളുടെ വീടിനടുത്തുള്ള കെഎസ്ആർടിസി യൂണിറ്റിൽ നിന്ന് തന്നെ യാത്ര പുറപ്പെടാനും ദർശനം കഴിഞ്ഞ് അവിടെത്തന്നെ തിരിച്ചെത്താനുമുള്ള സാഹചര്യം ഒരുക്കിയത് സാധാരണക്കാരെ ഇതിലേക്ക് ആകർഷിച്ചു.
ഓരോ മേഖലയ്ക്കും പ്രത്യേകം കോർഡിനേറ്റർമാരെ നിയോഗിച്ചുകൊണ്ട് വളരെ വ്യവസ്ഥാപിതമായാണ് ഈ യാത്രകൾ നിയന്ത്രിക്കുന്നത്. കുറഞ്ഞ ചെലവിൽ സുരക്ഷിതമായ യാത്രയും കൃത്യമായ സമയക്രമീകരണവും ഭക്തർക്ക് വലിയ ആശ്വാസമാണ് നൽകുന്നത്. കർക്കിടക മാസത്തിലെ ഈ തീർത്ഥാടന യാത്രകൾ കെഎസ്ആർടിസിക്ക് സാമ്പത്തികമായി വലിയ ഊർജമാണ് പകരുന്നത്.
മൂന്ന് പകലും രണ്ട് രാത്രിയും നീണ്ടുനിൽക്കുന്ന ആകർഷകമായ ഹൈദരാബാദ് പാക്കേജ് അവതരിപ്പിക്കുകയാണ് കെഎസ്ആർടിസി ബജറ്റ് ടൂറിസം സെൽ. ഈ പാക്കേജിന്റെ ആദ്യ ട്രിപ്പ് അടുത്ത മാസം ഏഴിന് തിരുവനന്തപുരത്ത് നിന്ന് ആരംഭിക്കും. കേരളത്തിലെ എല്ലാ ജില്ലകളിൽ നിന്നും ഈ സേവനം ലഭ്യമാണ്.
ഹൈദരാബാദിന്റെ ചരിത്രപരവും വിനോദപരവുമായ പ്രധാന കാഴ്ചകളെല്ലാം ഉൾക്കൊള്ളിച്ചുകൊണ്ടുള്ള ഈ പാക്കേജ് സഞ്ചാരികൾക്ക് മികച്ചൊരു അവസരമാണ്. നെഹ്റു സുവോളജിക്കൽ പാർക്ക്, ബിർള മന്ദിർ, എൻ.ടി.ആർ ഗാർഡൻ, അംബേദ്കർ പ്രതിമ, അമർജ്യോതി സ്മാരകം, ലുമ്പിനി പാർക്ക്, ഹുസൈൻ സാഗർ തടാകം , ലോകപ്രശസ്തമായ രാമോജി റാവു ഫിലിം സിറ്റി, ഹൈടെക് സിറ്റി, ഗോൾകൊണ്ട കോട്ട, സാലർ ജംഗ് മ്യൂസിയം, ചൗമഹൽ പാലസ്, മെക്കാ മസ്ജിദ്, ചാർമിനാർ തുടങ്ങിയ സ്ഥലങ്ങളാണ് സന്ദര്ശനത്തില് ഉള്പ്പെടുത്തിയിരിക്കുന്നത്.
Read DhanamOnline in English
Subscribe to Dhanam Magazine