ലുലു ഗ്രൂപ്പ് കൊച്ചി സ്മാര്ട്ട് സിറ്റിയില് നിര്മിക്കുന്ന കേരളത്തിലെ ഏറ്റവും വലിയ ഇരട്ട ടവറുകള് ഉദ്ഘാടനത്തിന് സജ്ജമായി. അടുത്ത മാസത്തോടെ പൂര്ണമായും തുറന്നു പ്രവര്ത്തിക്കാനാകുമെന്നാണ് സൂചന. 12.74 ഏക്കറില് 33 ലക്ഷം ചതുരശ്ര അടിയില് 30 നിലകളിലായി ഒരുങ്ങുന്ന ഇരട്ട ടവറിന്റെ നിര്മാണ പ്രവര്ത്തനങ്ങള് നിര്വഹിക്കുന്നത് ലുലു ഐ.ടി ഇന്ഫ്ര ബില്ഡ് പ്രൈവറ്റ് ലിമിറ്റഡ് ആണ്. 1,500 കോടി രൂപയാണ് പദ്ധതിയുടെ ചെലവ്.
ലുലു ഇരട്ട ഐ.ടി ടവറിന്റെ പൂര്ണ വീഡിയോ കാണാം
പഞ്ചനക്ഷത്രഹോട്ടലുകളുടെ സൗകര്യങ്ങളോട് കിടപിടിക്കുന്ന രീതിയിലാണ് 153 മീറ്റര് ഉയരമുള്ള ഇരട്ടടവറുകള് ഒരുക്കിയിരിക്കുന്നത്. 25,000 ഐ.ടി പ്രൊഫഷണലുകള്ക്ക് ഇവിടെ ജോലി ചെയ്യാനാകും.
ഗ്രാന്ഡ് എന്ട്രി ലൗഞ്ച് മുതല് എല്ലായിടങ്ങളും വളരെ മനോഹരമായാണ് ഒരുക്കുന്നത്. 2,000ത്തോളം പേര്ക്കിരിക്കാവുന്ന ഫുഡ് കോര്ട്ട്, കുട്ടികള്ക്കായുള്ള ക്രഷ് സൗകര്യം, ജിം, റീറ്റെയ്ല് സ്പേസ്, കഫേ, ഇലക്ട്രിക് വെഹിക്കിള് ചാര്ജിംഗ് പോയിന്റുകള്, ഡേറ്റ സെന്റര് സൗകര്യം, അതിവേഗ ലിഫ്റ്റുകള്,വമ്പന് ഓഡിറ്റോറിയം കേന്ദ്രീകൃത എ.സി, മാലിന്യ സംസ്കരണ പ്ലാന്റ്, മഴവെള്ള സംഭരണി തുടങ്ങിയവയെല്ലാം ഇരട്ട ടവറുകളിലുണ്ടാകും.
3000ത്തില് പരം കാറുകള്ക്കുള്ള റോബോട്ടിക് കാര് പാര്ക്കിംഗ് സൗകര്യമാണ് മറ്റൊരു പ്രത്യേകത. കാര് പാര്ക്കിംഗ് പരിമിതികള് ഒഴിവാക്കാനായി നൂതന സംവിധാനമാണ് ഒരുക്കിയിരിക്കുന്നത്. പല നിലകളിലായി കാറുകള് പാര്ക്ക് ചെയ്യുന്നതു പോലെ വിവിധ റാക്കുകളിലായി കാറുകള് പാര്ക്ക് ചെയ്യാനാകും. മൊത്തം ടവറില് 4,400 ഓളം കാറുകള് പാര്ക്ക് ചെയ്യാനാകും.
ദക്ഷിണേന്ത്യയിലെ തന്നെ ഏറ്റവും ഐക്കോണിക് ആയ ഐ.ടി ടവര് കൊച്ചിയില് തുറക്കുക എന്ന ലുലുവിന്റെ സ്വപ്നമാണ് ഇതോടെ യാഥാര്ത്ഥ്യമായിരിക്കുന്നത്.
രാജ്യാന്തര കമ്പനികള് പലതും ഇവിടെ ഓഫീസ് തുറക്കാന് പദ്ധതിയിടുന്നുണ്ട്. രണ്ട് കമ്പനികള് അവരുടെ ഓഫീസ് ഒരുക്കുന്നതിന്റെ പണികള് നടത്തി വരുന്നു. ഇതില് ഒരു കമ്പനി മെയ് മാസം തന്നെ പ്രവര്ത്തനം തുടങ്ങിയേക്കും. അടുത്തത് ജൂണിലും പ്രവര്ത്തനമാരംഭിക്കാനാണ് ഉദ്ദേശിക്കുന്നതെന്ന് അറിയുന്നു. കൂടാതെ ആറോളം കമ്പനികള് ഓഫീസ് ആരംഭിക്കുന്നതിന് ലുലുവുമായി ചര്ച്ചകള് പുരോഗമിക്കുന്നു.
അടുത്ത അഞ്ച് വര്ഷത്തിനുള്ളില് ഒരുലക്ഷം ഐ.ടി പ്രൊഫഷണലുകള്ക്ക് ജോലി ചെയ്യാവുന്ന ലെവലിലേക്ക് ലുലു ഐ.ടി പാര്ക്കിനെ ഉയര്ത്തുകയാണ് ലുലു ഗ്രൂപ്പിന്റെ ലക്ഷ്യം.
Read DhanamOnline in English
Subscribe to Dhanam Magazine