രാജ്യത്തെ പ്രമുഖ ആശുപത്രി ശൃംഖലയായ മണിപ്പാല് ഹെല്ത്ത് എന്റര്പ്രൈസസ് അടുത്ത ആഴ്ച ആദ്യം ഐപിഒയുമായി ഓഹരി വിപണിയിലേക്ക് വരാനിരിക്കുകയാണ്. ഏകദേശം 8,000 കോടി രൂപയുടെ ഫ്രെഷ് ഇഷ്യൂവും 20-25 ദശലക്ഷം ഓഹരികളുടെ ഒ.എഫ്.എസ് വഴിയുള്ള വിറ്റഴിക്കലുമാണ് പദ്ധതി. ടെമാസെക് ഉള്പ്പെടെയുള്ള പ്രധാന നിക്ഷേപകര് വിഹിതം കുറയ്ക്കും. സമാഹരിക്കുന്ന തുക പുതിയ മെഡിക്കല് ക്ലസ്റ്ററുകള്ക്കും ആശുപത്രി വികസനത്തിനും ഉപയോഗിക്കും.
രാജ്യത്തെ പ്രമുഖ ആശുപത്രി ശൃംഖലകളിലൊന്നായ മണിപ്പാല് ഹെല്ത്ത് എന്റര്പ്രൈസസിന്റെ (മണിപ്പാല് ഹോസ്പിറ്റല്സ്) പ്രാഥമിക ഓഹരി വില്പ്പന (IPO) അടുത്ത ആഴ്ച ആദ്യം തന്നെ ഉണ്ടായേക്കുമെന്ന് റിപ്പോര്ട്ട്.
ഐപിഒയിലൂടെ ഏകദേശം 8,000 കോടി രൂപയുടെ പുതിയ ഓഹരികളും (Fresh issue), നിലവിലുള്ള ഓഹരി ഉടമകളുടെ 20-25 ദശലക്ഷം ഇക്വിറ്റി ഓഹരികളുടെ ഓഫര് ഫോര് സെയിലും (OFS) ഉണ്ടാകും. ആകെ ഐപിഒ തുക 1 ബില്യണ് ഡോളറിന് (ഏകദേശം ₹9600 കോടി) അടുത്തായിരിക്കുമെന്നാണ് പ്രതീക്ഷിക്കുന്നതെന്ന് എന്ഡിടിവി പ്രോഫിറ്റ് റിപ്പോര്ട്ട് ചെയ്യുന്നു. എന്നാല് വിപണിയിലെ സാഹചര്യങ്ങള്ക്കും നിക്ഷേപകരുടെ ആവശ്യകതയ്ക്കും അനുസരിച്ച് അന്തിമ തുകയില് മാറ്റം വരാം.
ലക്ഷ്യം യാഥാര്ത്ഥമായാല് നടപ്പു സാമ്പത്തിക വര്ഷത്തിലെ ഏറ്റവും വലിയ ഐ.പി.ഒകളില് ഒന്നായിരിക്കും ഇത്.
ഓഫര് ഫോര് സെയില് (OFS) വഴിയാണ് പ്രധാനമായും ഓഹരികള് വിറ്റഴിക്കുന്നത്. ആഗോള നിക്ഷേപ സ്ഥാപനമായ ടെമാസെക് (Temasek) ആയിരിക്കും ഒ.എഫ്.എസിലൂടെ ഏറ്റവും കൂടുതല് ഓഹരികള് വിറ്റഴിക്കുക.
മണിപ്പാല് ഗ്രൂപ്പും പ്രൈവറ്റ് ഇക്വിറ്റി സ്ഥാപനമായ ടിപിജിയും (TPG) വിഹിതം കുറച്ചേക്കും. സെവന്റി സെക്കന്ഡ് ഇന്വെസ്റ്റ്മെന്റ്, നോവോ ഹോള്ഡിംഗ്സ്, ഫീനിക്സ് ബെയര് ഇന്വെസ്റ്റ്മെന്റ്സ് എന്നിവരും ഓഹരികള് വില്ക്കുന്നവരില് ഉള്പ്പെടുന്നു.
മണിപ്പാല് ഹെല്ത്തില് നിലവില് ഏറ്റവും വലിയ പങ്കാളിത്തമുള്ള നിക്ഷേപകരാണ് സിംഗപ്പൂര് സര്ക്കാരിന് കീഴിലുള്ള ടെമാസെക്. മുന്പ് 59 ശതമാനം ഓഹരി പങ്കാളിത്തമുണ്ടായിരുന്ന ടെമാസെക്, അടുത്തിടെ കുറച്ച് ഓഹരികള് മറ്റ് നിക്ഷേപകര്ക്ക് കൈമാറിയിരുന്നു. ഇതിന്റെ തുടര്ച്ചയായാണ് ഐ.പി.ഒ വഴിയും ഓഹരികള് വിറ്റഴിച്ച് ലാഭമെടുക്കാന് കമ്പനി ലക്ഷ്യമിടുന്നത്. പ്രൊമോട്ടര്മാരായ പൈ കുടുംബവും ഒരു വിഹിതം ഓഹരികള് ഒ.എഫ്.എസ് വഴി വിപണിയിലെത്തിച്ചേക്കും.
ഇന്ത്യയിലുടനീളം ശൃംഖലയുള്ള മണിപ്പാല് ഹോസ്പിറ്റല്സ് അടുത്ത കാലത്തായി മറ്റ് പ്രമുഖ ആശുപത്രികളെ ഏറ്റെടുത്ത് പ്രവര്ത്തനം വിപുലീകരിച്ചിരുന്നു. അടുത്ത ഘട്ട വളര്ച്ച ലക്ഷ്യമിട്ടാണ് കമ്പനി ഇപ്പോള് പൊതുവിപണിയിലേക്ക് പ്രവേശിക്കുന്നത്. ഐ.പി.ഒ വഴി സമാഹരിക്കുന്ന തുക പുതിയ മെഡിക്കല് ക്ലസ്റ്ററുകള് സ്ഥാപിക്കുന്നതിനും നിലവിലുള്ള ആശുപത്രികളുടെ സേവനങ്ങള് വിപുലീകരിക്കുന്നതിനുമായി ഉപയോഗിക്കാനാണ് കമ്പനിയുടെ തീരുമാനം. ആശുപത്രികളില് കൂടുതല് ആധുനിക സൗകര്യങ്ങള് ഏര്പ്പെടുത്തുന്നതിനും കടബാധ്യതകള് കുറയ്ക്കുന്നതിനും ഈ തുക സഹായകരമാകും.
Manipal Health Enterprises is set to launch its IPO early next week, with global investor Temasek selling a major portion of its stake through an Offer for Sale.
Read DhanamOnline in English
Subscribe to Dhanam Magazine