കേരളം ആസ്ഥാനമായുള്ള വിവിധ സ്വകാര്യ ബാങ്കുകള് 2024-25 സാമ്പത്തിക വര്ഷത്തിലെ അവസാന പാദമായ ജനുവരി-മാര്ച്ചിലെ പ്രാഥമിക പ്രവര്ത്തന കണക്കുകള് വെളിപ്പെടുത്തി.
സ്റ്റോക്ക് എക്സ്ചേഞ്ചുകള്ക്ക് സമര്പ്പിച്ച റിപ്പോര്ട്ടുകള് പ്രകാരം കേരളം ആസ്ഥാനമായുള്ള ബാങ്കുകളെല്ലാം തന്നെ നിക്ഷേപത്തിലും വായ്പകളിലും മുന് വര്ഷത്തെ സമാനപാദത്തെ അപേക്ഷിച്ച് മികച്ച വളര്ച്ച രേഖപ്പെടുത്തുന്നുണ്ട്.
തൃശൂര് ആസ്ഥാനമായ പ്രമുഖ സ്വകാര്യ ബാങ്കായ സൗത്ത് ഇന്ത്യന് ബാങ്ക് (South Indian Bank) ജനുവരി-മാര്ച്ച് പാദത്തില് മൊത്ത വായ്പകളില് 9.97 ശതമാനം വര്ധന രേഖപ്പെടുത്തി. മുന് സാമ്പത്തിക വര്ഷത്തെ സമാനപാദത്തിലെ 80,426 കോടി രൂപയില് നിന്ന് 88,447 കോടി രൂപയായി.
മൊത്തം നിക്ഷേപം 5.50 ശതമാനം വര്ധനയോടെ 1.01 ലക്ഷം കോടി രൂപയില് നിന്ന് 1.07 ലക്ഷം കോടി രൂപയായി.
റീറ്റെയില് നിക്ഷേപങ്ങളില് 7.44 ശതമാനം വര്ധനയുണ്ട്. മുന് വര്ഷത്തെ സമാന പാദത്തിലെ 97,743 കോടി രൂപയില് നിന്ന് 1.05 ലക്ഷം കോടി രൂപയായി.
കറന്റ് അക്കൗണ്ട് സേവിംഗ്സ് അക്കൗണ്ട് നിക്ഷേപം (CASA) 32,693 കോടി രൂപയില് നിന്ന് 3.17 ശതമാനം ഉയര്ന്ന് 33,730 കോടി രൂപയായി. കാസ അനുപാതം 32.08 ശതമാനത്തില് നിന്ന് 31.37 ശതമാനമായി കുറഞ്ഞു. ഡിസംബര് പാദത്തിലെ 31.15 ശതമാനത്തില് നിന്ന് ഇത് മെച്ചപ്പെട്ടുവെന്നത് ബാങ്കിന് ആശ്വാസമാണ്.
തൃശൂര് ആസ്ഥാനമായ മറ്റൊരു സ്വകാര്യ ബാങ്കായ സി.എസ്.ബി ബാങ്കിന്റെ (CSB Bank) മൊത്തം വായ്പകള് മുന്വര്ഷത്തെ സമാനപാദത്തിലെ 24,572 കോടി രൂപയില് നിന്ന് 29.59 ശതമാനം ഉയര്ന്ന് 31,843 കോടി രൂപയായി. മൊത്തം നിക്ഷേപം 27,719 കോടി രൂപയില് നിന്ന് 24.03 ശതമാനം വളര്ച്ചയോടെ 36,861 കോടി രൂപയുമായി.
കറന്റ് അക്കൗണ്ട് സേവിംഗ്സ് അക്കൗണ്ട് നിക്ഷേപം (CASA) 8,085 കോടി രൂപയില് നിന്ന് 10.31 ശതമാനം ഉയര്ന്ന് 8,918 കോടി രൂപയായതും നേട്ടമാണ്.
ടേം ഡെപ്പോസിറ്റുകള് 29.16 ശതമാനം വര്ധനയോടെ 27,943 കോടി രൂപയായി. ബാങ്ക് കൂടുതല് ശ്രദ്ധയൂന്നുന്ന സ്വര്ണ പണയ വായ്പ 35.43 ശതമാനം ഉയര്ന്നു. 14,094 കോടി രൂപയാണ് ബാങ്കിന്റെ സ്വര്ണപ്പണയ വായ്പകള്. മുന് വര്ഷത്തെ സമാനപാദത്തില് ഇത് 10,407 കോടി രൂപയും ഇക്കഴിഞ്ഞ ഒക്ടോബര്-ഡിസംബര് പാദത്തില് 13,018 രൂപയുമായിരുന്നു.
ധനലക്ഷ്മി ബാങ്ക് 2024-25 സാമ്പത്തിക വര്ഷത്തെ അവസാന പാദത്തില് മൊത്ത ബിസിനസില് 14.31 ശതമാനം വര്ധന രേഖപ്പെടുത്തി. 26,443 കോടി രൂപയില് നിന്ന് 28,219 കോടി രൂപയിലേക്കാണ് ബിസിസ് ഉയര്ന്നത്.
മൊത്തം നിക്ഷേപം 14,290 കോടി രൂപയില് നിന്ന് 12.06 ശതമാനം വര്ധനയോടെ 16,013 കോടി രൂപയുമായി.
ബാങ്കിന്റെ കറന്റ് സേവിംഗ്സ് (CASA) നിക്ഷേപം 4,381 കോടി രൂപയില് നിന്ന് 4,602 കോടി രൂപയായി. 6.07 ശതമാനമാണ് വര്ധന.
ബാങ്കിന്റെ മൊത്തം വായ്പകള് 17.40 ശതമാനം വര്ധനയോടെ 12,206 കോടി രൂപയിലെത്തി. മുന് വര്ഷം സമാനപാദത്തിലിത് 10,397 കോടി രൂപയായിരുന്നു.
സ്വര്ണ വായ്പകളിലും ബാങ്ക് മികച്ച പ്രകടനമാണ് കാഴ്ചവച്ചത്. മുന്വര്ഷത്തെ 2,839 കോടി രൂപയില് നിന്ന് സ്വര്ണ വായ്പകള് 33.81 ശതമാനം വര്ധിച്ച് 3,799 കോടി രൂപയായി.
തൃശൂര് ആസ്ഥാനമായ പ്രമുഖ സ്മോള് ഫിനാന്സ് ബാങ്കായ ഇസാഫ് 2024-25 സാമ്പത്തിക വര്ഷത്തെ അവസാന പാദത്തില് റീറ്റെയ്ല് വായ്പകളില് 66.28 ശതമാനം വളര്ച്ച രേഖപ്പെടുത്തി. മുന് വര്ഷത്തെ 5,893 കോടി രൂപയില് നിന്ന് 9,799 കോടി രൂപയായെന്ന് ബാങ്ക് സ്റ്റോക്ക് എക്സ്ചേഞ്ചുകള്ക്ക് സമര്പ്പിച്ച റിപ്പോര്ട്ടില് വ്യക്തമാക്കി. സ്വര്ണ വായ്പ, എം.എസ്.എം.ഇ വായ്പ, കാര്ഷിക വായ് തുടങ്ങിയവ ഉള്പ്പെടുന്നതാണ് ബാങ്കിന്റെ റീറ്റെയ്ല് വായ്പകള്.
ബാങ്കിന്റെ മൊത്തം വായ്പകള് 1.08 ശതമാനം വര്ധിച്ച് 18,975 കോടി രൂപയായി. മൈക്രോ വായ്പകള് 28.75 ശതമാനം കുറഞ്ഞ് 9,716 കോടി രൂപയിലെത്തി. മൊത്തം വായ്പകളില് 51.64 ശതമാനവും റീറ്റെയ്ല് വായ്പകളാണ്.
മൊത്തം നിക്ഷേപം ഇക്കാലയളവില് 17.16 ശതമാനം വര്ധിച്ച് 23,277 കോടി രൂപയിലെത്തി. ടേം ഡെപ്പോസിറ്റുകള് 13.84 ശതമാനം ഉയര്ന്ന് 17,493 കോടി രൂപയായി.
കറന്റ് സേവിംഗ്സ് അക്കൗണ്ട് (CASA) നിക്ഷേപം 28.48 ശതമാനം ഉയര്ന്ന് 5,784 കോടി രൂപയായി. കാസ അനുപാതം (CASA Ratio) 22.66 ശതമാനത്തില് നിന്ന് 24.85 ശതമാനമായി. കാസ മെച്ചപ്പെട്ടത് ബാങ്കിന് നേട്ടമായി. എന്നാല് ഡിസംബര് പാദത്തില് 24.95 ശതമാനമായിരുന്നു കാസ അനുപാതം. കഴിഞ്ഞ പാദത്തിലെ കണക്കു പ്രകാരം മൊത്തം 94.15 ലക്ഷം ഇടപാടുകാരാണ് ബാങ്കിനുള്ളത്.
Read DhanamOnline in English
Subscribe to Dhanam Magazine