യു.എസ്-ഇറാന് യുദ്ധവും അതിനെ തുടര്ന്നുണ്ടായ ക്രൂഡ് ഓയില് വില വര്ധനയുമടക്കമുളള പല ബിസിനസുകളെയും വലിയ തോതില് ബാധിച്ചിരിക്കുകയാണ്. കയറ്റുമതിയെ ആശ്രയിക്കുന്ന ചെറുകിട-ഇടത്തരം സംരംഭങ്ങള്ക്ക് കനത്ത പ്രഹരമാണ് പ്രതിസന്ധി സൃഷ്ടിച്ചിരിക്കുന്നത്. ഈ സാഹചര്യത്തെ നേരിടാന് വന് ക്രെഡിറ്റ് ഗ്യാരണ്ടി പദ്ധതിയുമായി അവതരിപ്പിക്കാന് ഒരുങ്ങുകയാണ് കേന്ദ്ര സര്ക്കാര്. 2.5 ലക്ഷം കോടി രൂപയുടെ വായ്പാ ഗ്യാരണ്ടി പദ്ധതിയുമായി ബന്ധപ്പെട്ട കാബിനറ്റ് നോട്ട് തയാറായിക്കഴിഞ്ഞതായി മണികണ്ട്രോള് റിപ്പോര്ട്ട് ചെയ്യുന്നു.
നിര്മ്മല സീതാരാമന് കീഴിലുളള ധനമന്ത്രാലയത്തിലെ എക്സ്പെൻഡിച്ചർ ഫിനാൻസ് കമ്മിറ്റി (EFC) ഇതിനകം തന്നെ ഈ പദ്ധതിക്ക് അംഗീകാരം നൽകിയിട്ടുണ്ട്. വിവിധ മന്ത്രാലയങ്ങളുമായി പദ്ധതി സംബന്ധിച്ച കൂടിയാലോചനകൾ പൂർത്തിയായിട്ടുണ്ട്. ഉടൻ തന്നെ കേന്ദ്ര കാബിനറ്റിന്റെ പരിഗണനയ്ക്ക് ഈ വിഷയം എത്തും. കാബിനറ്റ് അംഗീകാരം ലഭിക്കുന്നതോടെ പദ്ധതിയുടെ അന്തിമ രൂപരേഖയും നടപ്പിലാക്കുന്ന തീയതിയും പുറത്തുവിടും.
പശ്ചിമേഷ്യയിലെ യുദ്ധം മൂലം വിദേശ ഡിമാൻഡിലുണ്ടായ കുറവും ഇറക്കുമതിയെ ആശ്രയിക്കുന്ന ബിസിനസുകൾ നേരിടുന്ന പണലഭ്യത (Liquidity) പ്രശ്നങ്ങളും പരിഹരിക്കാനാണ് ഈ വൻ വായ്പാ ഗ്യാരണ്ടി പദ്ധതി ലക്ഷ്യമിടുന്നത്. പശ്ചിമേഷ്യയിലെ സംഘർഷങ്ങളും ലോകത്തിലെ ഏറ്റവും പ്രധാനപ്പെട്ട സമുദ്ര വ്യാപാര പാതയായ ഹോർമുസ് കടലിടുക്കിലെ ഗതാഗത തടസങ്ങളുമാണ് ഇന്ത്യൻ വ്യവസായങ്ങളെ വലിയ തോതിൽ ബാധിക്കുന്നത്. സമുദ്രപാതകളിലെ അനിശ്ചിതത്വം കാരണം ഇന്ത്യയുടെ ലോജിസ്റ്റിക്സ്, കയറ്റുമതി മേഖലകൾ വലിയ പ്രതിസന്ധിയാണ് നേരിടുന്നത്.
സ്റ്റീൽ, നിർമ്മാണ മേഖലകൾ
ഇന്ധന ക്ഷാമം: സ്റ്റീൽ കമ്പനികൾക്ക് ആവശ്യമായ ഇന്ധന ലഭ്യത കുറയുകയും ചെലവ് കൂടുകയും ചെയ്തു.
വ്യാപാര തടസങ്ങൾ: കടൽ കടന്നുള്ള അസംസ്കൃത വസ്തുക്കളുടെ ഇറക്കുമതി വൈകുന്നത് സ്റ്റീൽ ഉത്പാദനത്തെ ബാധിക്കുന്നു.
മറ്റ് കയറ്റുമതി മേഖലകൾ
വ്യാപാര പങ്കാളിത്തം: ഇന്ത്യയ്ക്ക് ഇറാനുമായി മികച്ച കയറ്റുമതി വ്യാപാരമുണ്ട്. സംഘർഷങ്ങൾ കാരണം ബസുമതി അരി, തേയില എന്നിവയുടെ ഉൾപ്പെടെയുള്ള കയറ്റുമതിയുടെ താളം തെറ്റി.
ചെറുകിട വ്യവസായങ്ങൾ: ഗ്യാസ് ലഭ്യത കുറഞ്ഞതിനെ തുടർന്ന് ഗുജറാത്തിലെ ടൈൽസ്, സിറാമിക്സ് വ്യവസായങ്ങൾ വരെ ഉത്പാദനം നിർത്തിവെക്കേണ്ടി വന്നിട്ടുണ്ട്.
കൃഷിയും വളം നിർമ്മാണവും
വളം ക്ഷാമം: യൂറിയ ഉൾപ്പെടെയുള്ള രാസവളങ്ങളുടെ വിതരണ ശൃംഖല തടസപ്പെട്ടത് ഖാരിഫ് കൃഷിയിറക്കുന്ന സമയത്ത് ഇന്ത്യയിൽ വലിയ വളം ക്ഷാമത്തിന് കാരണമാകുന്നു.
അസംസ്കൃത വസ്തുക്കളുടെ വിലക്കയറ്റം: പ്രകൃതിവാതകത്തിന്റെ വില ഉയർന്നത് വളം നിർമ്മാണ മേഖലയെയും ബാധിച്ചു.
വിമാനക്കമ്പനികളും ലോജിസ്റ്റിക്സും
പ്രവർത്തനച്ചെലവ് വർധിച്ചു: വിമാന ഇന്ധനത്തിന്റെ (ATF) വില കൂടിയത് വിമാനക്കമ്പനികളുടെ പ്രവർത്തനച്ചെലവ് കുത്തനെ കൂട്ടി.
വർദ്ധിച്ചുവരുന്ന ഇന്ധനവിലയും പ്രവർത്തന തടസങ്ങളും കാരണം കടുത്ത സമ്മർദ്ദത്തിലായ ഏവിയേഷൻ മേഖലയ്ക്ക് പദ്ധതിക്ക് കീഴിൽ പ്രത്യേക വായ്പാ വിൻഡോ ലഭിക്കും. 2020 ലെ കോവിഡ് കാലത്ത് നടപ്പിലാക്കിയ എമർജൻസി ക്രെഡിറ്റ് ലൈൻ ഗ്യാരണ്ടി സ്കീമിന്റെ (ECLGS) മാതൃകയിലായിരിക്കും ഇതിന്റെയും പ്രവർത്തനം. വിതരണ തടസങ്ങൾ, ഉയർന്ന ഇൻപുട്ട് ചെലവുകൾ, ആഗോള അനിശ്ചിതത്വം എന്നിവ മൂലം വായ്പ തിരിച്ചടവ് മുടങ്ങുന്നത് തടയാനും വിപണിയിലേക്ക് വായ്പാ ഒഴുക്ക് തടസമില്ലാതെ ഉറപ്പാക്കാനും ഈ സർക്കാർ സഹായം ഉപകരിക്കുമെന്നാണ് അധികൃതര് വിലയിരുത്തുന്നത്.
Read DhanamOnline in English
Subscribe to Dhanam Magazine