രക്തച്ചൊരിച്ചിൽ ഒഴിവാക്കാം; ​ഗ്രീൻലാൻഡ് പണം നൽകി വാങ്ങാനും തയ്യാറെന്ന് ട്രംപ്; ഈ ഓഫറിന് യുഎസ് എന്ത് വില നൽകേണ്ടി വരും?

ഒരിടവേളയ്ക്ക് ശേഷം ആർട്ടിക് മേഖലയിലുള്ള 80,000 ചതുരശ്ര മൈൽ വിസ്തൃതിയുള്ള ​ഗ്രീൻലാൻഡ് ഏറ്റെടുക്കുന്നതിനുള്ള നീക്കത്തിന് വീണ്ടും ചരടുവലിച്ച് യുഎസ് പ്രസിഡന്റ് ഡൊണാൾ‌ഡ് ട്രംപ്. ​രക്തച്ചൊരിച്ചിൽ ഒഴിവാക്കാൻ പണം നൽകി വാങ്ങാനും തയ്യാറാണെന്നാണ് പ്രസിഡന്റ് ട്രംപ് ഇപ്പോൾ നൽകുന്ന സൂചന. ഇതിന്റെ ഭാ​ഗമായി ​ഗ്രീൻലാൻഡ് വാങ്ങുന്നതിനുള്ള അണിയറ നീക്കത്തിലേക്കും യുഎസ് കടന്നുവെന്നാണ് റിപ്പോർട്ട്.

ഗ്രീൻലാൻഡ് വാങ്ങൽ - എത്ര ചെലവ് വരും?

വിവിധ രം​ഗങ്ങളിൽ നിന്നുള്ള വിദ​ഗ്ധർ ഉൾപ്പെടുന്ന യുഎസിന്റെ ആഭ്യന്തര സമിതിയുടെ നി​ഗമനം അനുസരിച്ച് ​ഗ്രീൻലാൻഡ് പണം നൽകി വാങ്ങുന്നതിനായി 70,000 കോടി ഡോളർ വരെ ചെലവിടേണ്ടി വരാമെന്നാണ് കണക്കുക്കൂട്ടൽ. എന്നാൽ ​ഗ്രീൻലാൻഡിലെ പ്രകൃതി വിഭവങ്ങളുടെ മൂല്യം നോക്കിയാൽ യുഎസിന്റെ ഭാ​ഗത്തു നിന്നുള്ള ഓഫർ തീരെ ചെറുതാണെന്നാണ് മറ്റൊരു വിഭാഗം വിദ​ഗ്ധർ ചൂണ്ടിക്കാട്ടുന്നത്. ​​ഗ്രീൻലാൻഡിലെ അപൂർവ ധാതുക്കളുടെ മൂല്യം മാത്രം 4,40,000 കോടി ഡോളർ വരുമെന്നും അതിനാൽ പണം നൽകി ദ്വീപ് വാങ്ങാനാണെങ്കിൽ യുഎസിന് 2,80,000 കോടി ഡോളർ എങ്കിലും ചെലവിടേണ്ടി വരുമെന്നും വിദ​ഗ്ധർ ചൂണ്ടിക്കാട്ടുന്നു. ഇതിന് മുൻപ് 1946-ലും ​ഗ്രീൻലാൻഡ് വാങ്ങുന്നതിനായുള്ള ഓഫർ യുഎസ് മുന്നോട്ട് വെച്ചിരുന്നെങ്കിലും ഡെൻമാർക്ക് അത് നിരസിക്കുകയായിരുന്നു.

പ്രസിഡന്റ് ഡൊണാൾഡ് ട്രംപിന്റെ ​ഗ്രീൻലാൻഡ് കരസ്ഥമാക്കാനുള്ള പദ്ധതിയുമായി സഹകരിക്കുന്ന ഉ​ദ്യോ​ഗസ്ഥരിൽ നിന്നും ലഭിച്ച സൂചനകൾ അടിസ്ഥാനമാക്കി എൻബിസി ന്യൂസ് ആണ് ഇതുസംബന്ധിച്ച വാർത്ത റിപ്പോ‌ർട്ട് ചെയ്തിരിക്കുന്നത്. യുദ്ധം ഒഴിവാക്കാൻ കഴിയും എന്നതിനാൽ പണം നൽകി ഗ്രീൻലാൻഡ് വാങ്ങുന്നതിനുള്ള നീക്കത്തിന് പ്രസിഡന്റ് ട്രംപ് മുൻ​ഗണന നൽകുന്നുണ്ട്. ദ്വീപ് വാങ്ങുന്നതിനായുള്ള പദ്ധതി തയ്യാറാക്കുന്നതിനായി വിദേശകാര്യ സെക്രട്ടറി മാർക്കോ റൂബിയോ നി‍‌ർദേശം നൽകിയിട്ടുണ്ടെന്ന വിവരം മുതി‌ർന്ന വൈറ്റ് ഹൗസ് ഉദ്യോ​ഗസ്ഥൻ സ്ഥിരകരിച്ചിട്ടുണ്ട്.

ഗ്രീൻലാൻഡിനായി യുഎസ് പിടിവാശി കൂട്ടുന്നത് എന്തുകൊണ്ട്?

ആർട്ടിക് മേഖലയിലെ തന്ത്രപ്രധാനമായ സ്ഥാനത്താണ് ​ഗ്രീൻലാൻഡ് സ്ഥിതിചെയ്യുന്നത്. അതിനാൽ യുഎസിന്റെ എതിരാളികളായ റഷ്യക്കും ചൈനയ്ക്കും ഇടയിൽ ഒരു ബഫർ മേഖലയെന്ന നിലയിലും പ്രധാന ശത്രുരാജ്യങ്ങളിൽ നിന്നുള്ള ഭീഷണിക്കുള്ള പ്രതിരോധം തീർക്കുന്നതിനും മിസൈൽ ട്രാക്കിങ് ശൃംഖലകൾ മറ്റ് സ്വാധീനശക്തികളുടെ വലയിലാകാതെ എപ്പോഴും സജ്ജമായി നിലനി‌ർത്തുന്നതിനും ​ഗ്രീൻലാൻഡിലെ സൈനിക താവളം മുതൽക്കൂട്ടാകുമെന്നാണ് യുഎസ് വിലയിരുത്തൽ. അതായത്, ദേശീയ സുരക്ഷ മുൻനിർത്തിയാണ് ​ഗ്രീൻലാൻഡ് തങ്ങളുടെ കീഴിൽ വരണമെന്ന് പ്രസിഡന്റ് ട്രംപ് ശഠിക്കുന്നതെന്ന് സാരം. യുഎസ് ​ഇപ്പോൾ കരസ്ഥമാക്കിയില്ലെങ്കിൽ ചൈനയോ റഷ്യയോ ​ഗ്രീൻലാൻഡ് വരുതിയിലാക്കിയേക്കാമെന്നും ഡൊണാൾഡ് ട്രംപ് ചൂണ്ടിക്കാട്ടുന്നു.

എന്നാൽ യുഎസ് നിർദേശത്തെ ശക്തിയുക്തം എതിർക്കുകയാണ് ഡെൻമാർക്ക്. യുഎസിന്റെ നേതൃത്വത്തിലുള്ള സൈനിക സഖ്യമായ നേറ്റോയിലും (NATO) യൂറോപ്യൻ രാജ്യങ്ങളുടെ കൂട്ടായ്മയായ യൂറോപ്യൻ യൂണിയനിലും (EU) ​ഡെൻമാർക്കും അതിന്റെ കീഴിൽ വരുന്ന സ്വയംഭരണ പ്രദേശവും ലോകത്തെ ഏറ്റവും വലിയ ദ്വീപുമായ ​ഗ്രീൻലാൻഡും അം​ഗങ്ങളാണ്. അതിനാൽ ​ഗ്രീൻലാൻഡ് വിഷയത്തിൽ സൈനിക ശക്തി പ്രയോ​ഗിച്ചാൽ അത് നേറ്റോ സഖ്യത്തിന്റെയും യൂറോപ്യൻ യൂണിയന്റേയും നിലനിൽപ്പിനും കടുത്ത വെല്ലുവിളി ഉയർത്തുന്നതായിരിക്കും. അതുകൊണ്ടാണ് പണം വാങ്ങി ​ഗ്രീൻലാൻഡ് കരസ്ഥമാക്കാനുള്ള ഓപ്ഷന് യുഎസ് ഭരണകൂടം മുൻ​ഗണന നൽകുന്നത്.

_{Trump says he is ready to buy Greenland for money; What price will the US have to pay for this offer?}