സംസ്ഥാനത്തെ സ്വര്ണവിലയില് ഇന്നും വര്ധന. ഗ്രാമിന് 60 രൂപ വര്ധിച്ച് 11,960 രൂപയായി. പവന് 480 രൂപ വര്ധിച്ച് 95,680 രൂപയിലുമെത്തി. സ്വര്ണവില അടുത്ത ആഴ്ചകളില് തന്നെ പുതിയ ഉയരങ്ങളിലേക്ക് എത്തുമെന്നാണ് നിലവില് വിദഗ്ധര് പറയുന്നത്. അടുത്ത ദിവസങ്ങളില് പുറത്തുവരുന്ന യു.എസ് സാമ്പത്തിക കണക്കുകള്, യു.എസ് ഫെഡറല് റിസര്വിന്റെയും ഇന്ത്യന് റിസര്വ് ബാങ്കിന്റെയും പണനയ തീരുമാനങ്ങള് എന്നിവയാകും നിര്ണായകമാകുന്നത്.
ഇക്കൊല്ലത്തെ അവസാന മാസത്തിന്റെ തുടക്കത്തിലും സ്വര്ണം ഉയര്ന്ന് തന്നെയാണ് വ്യാപാരം നടക്കുന്നത്. അന്താരാഷ്ട്ര വിപണിയില് ഔണ്സിന് 4,242 ഡോളറെന്ന നിലയിലാണ് നിലവില് വ്യാപാരം പുരോഗമിക്കുന്നത്. ഈ വില അടുത്ത വര്ഷത്തില് 4,500 ഡോളര് കഴിഞ്ഞ് കുതിക്കുമെന്നാണ് മോര്ഗന് സ്റ്റാന്ലിയുടെ വിലയിരുത്തല്. 2026ന്റെ അവസാനം വില 4,900 ഡോളര് കടക്കുമെന്നാണ് ഗോള്ഡ്മാന് സാക്സിന്റെ പ്രവചനം. ഒക്ടോബറില് പവന് 94,920 രൂപയെന്ന വിലയാണ് സംസ്ഥാനത്ത് രേഖപ്പെടുത്തിയ ഏറ്റവും കൂടിയത്.
അടുത്ത ദിവസങ്ങളില് പുറത്തുവരാനിരിക്കുന്ന മാനുഫാക്ചറിംഗ് ആന്ഡ് പി.എം.ഐ ഡാറ്റ, യു.എസ് തൊഴില് കണക്കുകള്, ഉപയോക്തൃ വികാരം തുടങ്ങിയ കണക്കുകള് സ്വര്ണത്തിന്റെ അടുത്ത ആഴ്ചയിലെ വിലയെ സ്വാധീനിക്കും. തിങ്കളാഴ്ച ഫെഡ് ചെയര്മാന് ജെറോം പവല് നടത്തുന്ന പ്രസംഗവും നിര്ണായകമാകും. അതിനൊപ്പം റഷ്യ-യുക്രെയിന് സമാധാന ചര്ച്ചകള്, വെള്ളിയാഴ്ചയിലെ ആര്.ബി.ഐ പണനയ യോഗം എന്നിവയും നിക്ഷേപകര് ഉറ്റുനോക്കുകയാണ്. കേന്ദ്രബാങ്കുകള് സ്വര്ണം വാങ്ങുന്നത് 2025ല് വ്യാപകമായിരുന്നു. വരും വര്ഷവും ഈ ട്രെന്ഡ് തുടരാനാണ് സാധ്യതയെന്നും വിദഗ്ധര് പറയുന്നു.
ഇന്ത്യന് വിപണിയിലാകട്ടെ രൂപയുടെ വിനിമയ നിരക്ക് കുറഞ്ഞ് നില്ക്കുന്നതും പ്രാദേശിക വിപണിയില് മഞ്ഞലോഹത്തിന് മികച്ച ഡിമാന്ഡുള്ളതും വിലയെ സ്വാധീനിക്കുന്നുണ്ട്. ഉത്സവകാലവും വിവാഹ സീസണും മൂല്യം ഉത്തരേന്ത്യയില് ആളുകള് സ്വര്ണം വാങ്ങുന്നത് വര്ധിച്ചിട്ടുണ്ടെന്നാണ് വ്യാപാരികള് പറയുന്നത്.
അതേസമയം, സംസ്ഥാനത്ത് ഇന്ന് ഒരു പവന് സ്വര്ണാഭരണം വാങ്ങാന് 1,03,530 രൂപയെങ്കിലും വേണ്ടി വരും. അഞ്ച് ശതമാനം പണിക്കൂലി, ഹാള്മാര്ക്കിംഗ് ചാര്ജുകള്, നികുതി എന്നിവ ചേര്ത്ത തുകയാണിത്. ആഭരണങ്ങളുടെ ഡിസൈന് അനുസരിച്ച് വിലയിലും പണിക്കൂലിയും മാറ്റമുണ്ടാകും.
Read DhanamOnline in English
Subscribe to Dhanam Magazine