ജപ്പാനെ മറികടന്ന് ഇന്ത്യ ലോകത്തിലെ നാലാമത്തെ വലിയ സമ്പദ്വ്യവസ്ഥയായി മാറിയതായി കേന്ദ്ര സർക്കാർ പുറത്തിറക്കിയ 2025 ലെ സാമ്പത്തിക വർഷാവസാന അവലോകന റിപ്പോർട്ട്. ഇന്ത്യയുടെ മൊത്ത ആഭ്യന്തര ഉത്പാദനം (GDP) ഇപ്പോൾ 4.18 ട്രില്യൺ ഡോളറിലെത്തിയിരിക്കുകയാണ്.
അടുത്ത മൂന്ന് വർഷത്തിനുള്ളിൽ ജർമ്മനിയെയും മറികടന്ന് ലോകത്തെ മൂന്നാമത്തെ വലിയ സാമ്പത്തിക ശക്തിയാകാനാണ് ഇന്ത്യ ലക്ഷ്യമിടുന്നത്. പക്ഷെ, 2025 ലെ അന്തിമ കണക്കുകൾ സംബന്ധിച്ച് ഐ.എം.എഫ് 2026 ന്റെ ആദ്യ പകുതിയിൽ പുറത്തുവിടുന്ന ഡാറ്റയെ ആശ്രയിച്ചാണ് അന്തിമ സ്ഥിരീകരണത്തിലെത്താനാകുക.
2026 ഓടെ ഇന്ത്യയുടെ സാമ്പത്തിക വളർച്ച 4.51 ട്രില്യൺ ഡോളറിലെത്തുമെന്നാണ് അന്താരാഷ്ട്ര നാണയ നിധി (IMF) പുറത്തുവിട്ട കണക്കുകൾ സൂചിപ്പിക്കുന്നത്. ആഗോളതലത്തിൽ വ്യാപാര അനിശ്ചിതത്വങ്ങൾ നിലനിൽക്കുമ്പോഴും ഇന്ത്യ കൈവരിച്ച ഈ വളർച്ച രാജ്യത്തിന്റെ സാമ്പത്തിക ഭദ്രതയുടെ നേട്ടമാണ്. 2022 ൽ ബ്രിട്ടനെ മറികടന്ന് അഞ്ചാം സ്ഥാനത്തെത്തിയ ഇന്ത്യ മൂന്ന് വർഷത്തിനുള്ളിലാണ് നാലാം സ്ഥാനത്തേക്ക് കുതിച്ചത്. 2030 ഓടെ 7.3 ട്രില്യൺ ഡോളർ ജിഡിപി കൈവരിക്കാനാണ് രാജ്യം ലക്ഷ്യമിടുന്നത്.
സമ്പദ്വ്യവസ്ഥയുടെ വലിപ്പത്തിൽ വലിയ മുന്നേറ്റം നടത്തിയെങ്കിലും പ്രതിശീർഷ ജിഡിപിയുടെ (Per Capita GDP) കാര്യത്തിൽ ഇന്ത്യ ഇപ്പോഴും വികസിത രാജ്യങ്ങളേക്കാൾ ഏറെ പിന്നിലാണ്. ലോകബാങ്കിന്റെ 2024 ലെ കണക്കുകൾ പ്രകാരം ഇന്ത്യയുടെ പ്രതിശീർഷ ജിഡിപി വെറും 2,694 ഡോളറാണ്. ഇത് ജപ്പാന്റെ (32,487 ഡോളർ) 12 മടങ്ങും ജർമ്മനിയുടെ (56,103 ഡോളർ) 20 മടങ്ങും താഴെയാണ്. ജനസംഖ്യയിലെ വർദ്ധനവാണ് ഈ വലിയ വ്യത്യാസത്തിന് പ്രധാന കാരണം.
രാജ്യത്തെ 140 കോടി ജനങ്ങളിൽ വലിയൊരു ശതമാനം യുവാക്കളാണ്. ഇവർക്ക് അനുയോജ്യമായ ഗുണനിലവാരമുള്ള തൊഴിലവസരങ്ങൾ സൃഷ്ടിക്കുക എന്നത് വലിയൊരു വെല്ലുവിളിയായി തുടരുന്നു. കൂടാതെ രൂപയുടെ മൂല്യത്തകർച്ചയും അമേരിക്കയുമായുള്ള വ്യാപാര തർക്കങ്ങളും ഇന്ത്യൻ സമ്പദ്വ്യവസ്ഥയ്ക്ക് ആശങ്കയുണ്ടാക്കുന്നുണ്ട്.
ലോകത്തെ വലിയ സാമ്പത്തിക ശക്തിയായി മാറിക്കൊണ്ടിരിക്കുമ്പോഴും സാധാരണക്കാരന്റെ വരുമാനത്തിലും ജീവിതനിലവാരത്തിലും വലിയ മാറ്റങ്ങൾ വരുത്തുക എന്നതാണ് ഇന്ത്യ യഥാർത്ഥത്തില് നേരിടുന്ന പരീക്ഷണം.
India becomes the world's fourth-largest economy: Govt, yet faces hurdles like unemployment, rupee depreciation, and trade tensions with the US.
Read DhanamOnline in English
Subscribe to Dhanam Magazine