ട്രംപിന്റെ രാഷ്ട്രീയ ശക്തി ക്ഷയിച്ചതും ഡെമോക്രാറ്റിക് പാർട്ടിയുടെ കോൺഗ്രസിലെ നിയന്ത്രണവും ഇന്ത്യയ്ക്ക് വ്യാപാര കരാറിൽ കൂടുതൽ അനുകൂലമായ നിലപാടുകൾ ഉറപ്പാക്കാനുള്ള അവസരം നൽകുന്നു. റഷ്യൻ എണ്ണയുടെ പേരിലുള്ള തീരുവ ഭീഷണി തുടരുന്നുവെങ്കിലും, ഇന്ത്യയ്ക്ക് തന്ത്രപരമായ നീക്കങ്ങൾ വഴി സമതുലിതമായ കരാർ നേടാൻ സാധ്യതയുണ്ട്.
യു.എസിലെ രാഷ്ട്രീയമാറ്റവും നിലവിലെ സുപ്രീം കോടതി വിധിയും ഉഭയകക്ഷി വ്യാപാര കരാറിനായുള്ള ഇന്ത്യയുടെ വിലപേശല്‍ശേഷി വര്‍ധിപ്പിക്കുന്നതായി വിലയിരുത്തൽ. എന്നാല്‍ റഷ്യന്‍ എണ്ണയുടെ പേരിലുള്ള അധിക തീരുവ ഭീഷണി തുടരുന്നതിനാല്‍ കരാറിലേക്ക് തിരക്കിട്ടു നീങ്ങുന്നത് തിരിച്ചടിയായേക്കാം.
യു.എസ് ഇടക്കാല തിരഞ്ഞെടുപ്പില്‍ ഭരണകക്ഷിയായ റിപ്പബ്ലിക്കൻ പാർട്ടിക്ക് ഏറ്റ കനത്ത തിരിച്ചടി, തീരുവ ഉയര്‍ത്തുമെന്ന ഭീഷണിയിലൂടെ ഇന്ത്യയെ സമ്മര്‍ദത്തിലാക്കിയിരുന്ന പ്രസി‍ഡന്റ് ഡൊണാൾഡ് ട്രംപിന്റെ രാഷ്ട്രീയ, നിയമപരമായ ശക്തി ക്ഷയിപ്പിച്ചിരിക്കുകയാണ്. എന്നാല്‍ ഇതുകൊണ്ട് മാത്രം ഇന്ത്യയ്ക്ക് അനുകൂലമായ വ്യാപാര കരാര്‍ ഉറപ്പാകില്ല. ട്രംപ് അതിവേഗം കരാറുണ്ടാക്കാന്‍ സമ്മര്‍ദം ശക്തമാക്കാനും സാധ്യതയുണ്ട്. ഈ സാഹചര്യത്തില്‍ ഇന്ത്യയുടെ തന്ത്രം എന്താകണമെന്നതാണ് നിര്‍ണായക ചോദ്യം.
യു.എസ് കോണ്‍ഗ്രസിന്റെ ഇരുസഭകളിലും ഡെമോക്രാറ്റിക് പാർട്ടിക്ക് ലഭിച്ച നിയന്ത്രണം, ട്രംപിന്റെ വ്യാപാരനയങ്ങള്‍ക്കുമേൽ കൂടുതല്‍ നിയന്ത്രണവും പരിശോധനയും കൊണ്ടുവന്നേക്കും. ഇക്കഴിഞ്ഞ ഫെബ്രുവരി 20-ലെ സുപ്രീം കോടതി വിധിയും ട്രംപിന് തിരിച്ചടിയായിരുന്നു. അടിയന്തര സാമ്പത്തികാധികാര നിയമം ഉപയോഗിച്ച് തീരുവ ചുമത്താന്‍ പ്രസിഡന്റിന് അധികാരമില്ലെന്നാണ് യു.എസ് സുപ്രീം കോടതി വ്യക്തമാക്കിയത്. എന്നാല്‍ സെക്ഷന്‍ 232, 301 തുടങ്ങിയ നിയമവഴികള്‍ ഇപ്പോഴും ലഭ്യമാണ്. അതിനാല്‍ തീരുവഭീഷണി പൂര്‍ണമായി ഇല്ലാതായിട്ടില്ല.
ഫെബ്രുവരി 6-ന് നടന്ന പ്രഖ്യാപനം ഇടക്കാല വ്യാപാര കരാറിന്റെ ചട്ടക്കൂട് മാത്രമാണ്. അന്തിമ കരാറിൽ ഇരുരാജ്യങ്ങളും ഒപ്പിട്ടിട്ടില്ല. നിലവിലെ നിര്‍ദേശമനുസരിച്ച് യു.എസിൽ നിന്നുള്ള വ്യാവസായിക, കാര്‍ഷിക ഉല്‍പ്പന്നങ്ങള്‍ക്കുള്ള തീരുവ ഇന്ത്യ കുറയ്ക്കണം. അഞ്ചു വര്‍ഷത്തിനുള്ളില്‍ 50,000 കോടി ഡോളറിന്റെ അമേരിക്കൻ ഉല്‍പ്പന്നങ്ങള്‍ ഇന്ത്യ വാങ്ങാനും ട്രംപ് ലക്ഷ്യമിടുന്നു. എന്നാല്‍ ഇന്ത്യക്കെതിരേയുള്ള നിലവിലെ സാധാരണ ഇറക്കുമതി തീരുവ യു.എസ് നിലനിര്‍ത്തും. ഇന്ത്യക്ക് തുല്യവും നിയമപരമായി ഉറപ്പുള്ളതുമായ ഇളവുകള്‍ ലഭിക്കുന്നില്ലെന്നാണ് സാമ്പത്തിക വിദഗ്ധരുടെ വിമര്‍ശനം.
റഷ്യയിൽ നിന്നും എണ്ണ (ക്രൂഡ് ഓയിൽ) വാങ്ങുന്ന രാജ്യങ്ങളില്‍നിന്നും ഇറക്കുമതി ചെയ്യുന്ന ഉല്‍പ്പന്നങ്ങള്‍ക്ക് 100 ശതമാനം വരെ അധിക തീരുവ ചുമത്താന്‍ യു.എസിന് പ്രത്യേക നിയമാധികാരമുണ്ട്. ഒക്ടോബര്‍ 16-ന് ട്രംപ്, റഷ്യൻ എണ്ണയുടെ വിഷയത്തിൽ ഇളവ് അനുവദിച്ചെങ്കിലും അത് സ്ഥിരമായൊരു സംരക്ഷണമായി കരുതാനാകില്ല. അതുകൊണ്ട് രാജ്യാന്തര വിപണിയിൽ നിന്നും കുറഞ്ഞ വിലയ്ക്ക് എണ്ണ വാങ്ങാനുള്ള ഇന്ത്യയുടെ സ്വാതന്ത്ര്യം, യു.എസുമായുള്ള വ്യാപാര കരാറിന്റെ ഭാഗമായി അടിയറവുവെക്കാതെ നോക്കാനും സാധിക്കണം.
യു.എസുമായുള്ള വ്യാപാര കരാര്‍ വൈകുകയോ വ്യവസ്ഥകൾ അനുകൂലമല്ലാതാകുകയോ ചെയ്താല്‍ ഇന്ത്യക്ക് മുന്നിൽ മൂന്ന് വഴികളാണുള്ളത്. യൂറോപ്പ് ഉള്‍പ്പെടെയുള്ള വിപണികളിലേക്ക് കയറ്റുമതി വൈവിധ്യവല്‍ക്കരിക്കുക. അമേരിക്കന്‍ വിപണിയെ ആശ്രയിക്കുന്ന വസ്ത്രം, ആഭരണം, ചെറുകിട വ്യവസായങ്ങള്‍ക്ക് ബദല്‍ വിപണികളും മത്സരക്ഷമതയും ഉറപ്പാക്കുക. പരസ്പര ഇളവുകളുള്ളതും ലോക വ്യാപാര സംഘടനയുടെ ചട്ടങ്ങള്‍ക്ക് അനുസൃതവുമായ കരാറില്‍ മാത്രം ഒപ്പിടുക.
യു.എസിലെ രാഷ്ട്രീയ മാറ്റമുണ്ടായാലും ആഭ്യന്തര ഉല്‍പ്പാദനത്തിനും വിതരണശൃംഖലാ സുരക്ഷയ്ക്കും ഇരുപാര്‍ട്ടികളുടെയും പിന്തുണയുണ്ട് എന്നതും ശ്രദ്ധേയം.
അതിനാല്‍ ഇന്ത്യയുടെ നേട്ടം വ്യാപാര കരാര്‍ എത്രവേഗം ഒപ്പിടുന്നു എന്നതിലല്ല, കാര്യമായ വിട്ടുവീഴ്ചകൾ ചെയ്യാതെ മികച്ച കരാര്‍ നേടിയെടുക്കുന്നു എന്നതിലാണ്. ട്രംപിന്റെ വിലപേശൽശേഷി കുറയുന്ന സാഹചര്യം ഉപയോഗിച്ച് കൂടുതല്‍ സന്തുലിതമായ വ്യവസ്ഥകള്‍ ഉറപ്പാക്കുകയാണ് ഇന്ത്യയുടെ മുന്നിലുള്ള അവസരം.
The US political shift and Supreme Court ruling could reshape India-US trade negotiations, while Russian oil-related tariff risks and alternative export markets remain key considerations.
Read DhanamOnline in English
Subscribe to Dhanam Magazine