ഓക്സ്ഫഡ് ഇക്കണോമിക്സിന്റെ 2026 ഗ്ലോബൽ സിറ്റീസ് ഇൻഡക്സിൽ ന്യൂയോർക്ക്, ലണ്ടൻ, പാരീസ് തുടങ്ങിയ ലോകനഗരങ്ങളോടൊപ്പം കേരളത്തിൽ നിന്ന് ഏഴ് നഗരങ്ങൾ ഇടം നേടി. കൊച്ചിയെ മറികടന്ന് തൃശൂർ 477-ാം റാങ്കോടെ സംസ്ഥാനത്ത് ഒന്നാമതെത്തി. കൊച്ചി, കോഴിക്കോട്, കൊല്ലം, തിരുവനന്തപുരം, കോട്ടയം, കണ്ണൂർ എന്നിവയും പട്ടികയിൽ. സാമ്പത്തിക ശേഷി, ജീവിതനിലവാരം, പരിസ്ഥിതി, ഭരണനിർവഹണം തുടങ്ങിയ മാനദണ്ഡങ്ങളാണ് വിലയിരുത്തൽ.
ഓക്സ്ഫഡ് ഇക്കണോമിക്സ് (Oxford Economics) പുറത്തുവിട്ട 2026-ലെ ഗ്ലോബല് സിറ്റീസ് ഇന്ഡക്സില് (Global Cities Index 2026) ന്യൂയോര്ക്ക്, ലണ്ടന്, പാരീസ്, സീയാറ്റില്, സാന്ഫ്രാന്സിസ്കോ, ഡബ്ലിന്, ബോസ്റ്റണ്, സാന്ജോ, ടോക്കിയോ, സുറിച്ച് എന്നീ നഗരങ്ങളുടെ പട്ടികയിലേക്ക് കേരളത്തില് നിന്ന് ഏഴ് നഗരങ്ങളും ഇടപിടിച്ചു.
സംസ്ഥാനത്തെ വാണിജ്യ കേന്ദ്രമായ കൊച്ചിയെ പിന്തള്ളിയാണ് തൃശൂരാണ് കേരള നഗരങ്ങളില് ഒന്നാം സ്ഥാനത്ത് എന്നതാണ് ശ്രദ്ധേയം. ലോകമെമ്പാടുമുള്ള 1,000 പ്രമുഖ നഗരങ്ങളെ സാമ്പത്തിക ശേഷി (Economics), ഹ്യൂമന് ക്യാപിറ്റല് (Human Capital), ജീവിതനിലവാരം (Quality of Life), പരിസ്ഥിതി (Environment), ഭരണനിര്വഹണം (Governance) എന്നീ അഞ്ച് പ്രധാന മേഖലകളെ അടിസ്ഥാനമാക്കിയാണ് റാങ്ക് ചെയ്തിരിക്കുന്നത്.
ആഗോളതലത്തില് 477-ാം റാങ്ക് നേടിക്കൊണ്ടാണ് തൃശൂര് കേരളത്തിലെ നഗരങ്ങളില് ഒന്നാം സ്ഥാനം സ്വന്തമാക്കിയത്. 489-ാം റാങ്കുമായി കൊച്ചിയും 499-ാം റാങ്കോടെ കോഴിക്കോടും തൊട്ടുപിന്നിലുണ്ട്. കൊല്ലം(623), തിരുവനന്തപുരം (624), കോട്ടയം (696), കണ്ണൂര് (772) എന്നിവയാണ് പട്ടികയില് ഇടം പിടിച്ച മറ്റ് കേരള നഗരങ്ങള്.
തൃശൂര് സാമ്പത്തിക ശേഷിയില് (Economics) 334-ാം റാങ്കും, ഹ്യൂമന് ക്യാപിറ്റലില് 611-ാം റാങ്കും, ജീവിതനിലവാരത്തില് 584-ാം റാങ്കും, പരിസ്ഥിതി മേഖലയില് 468-ാം റാങ്കും, ഭരണനിര്വഹണത്തില് 415-ാം റാങ്കും കരസ്ഥമാക്കി. ശക്തമായ ധനകാര്യ സ്ഥാപനങ്ങള്, സ്വര്ണ വ്യവസായ മേഖല, പ്രവാസി നിക്ഷേപങ്ങളുടെ (NRI) സ്വാധീനം എന്നിവയാണ് തൃശൂരിന്റെ മികച്ച പ്രകടനത്തിന് ആധാരമായത്.
ഇന്ത്യയിലെ മറ്റ് പല സംസ്ഥാനങ്ങളിലെ വൻനഗരങ്ങളെ അപേക്ഷിച്ച് കേരളത്തിലെ നഗരങ്ങളിൽ സാക്ഷരത, ആരോഗ്യ സേവനങ്ങൾ, ആയുർദൈർഘ്യം എന്നിവ ഉയർന്ന തോതിലായതിനാൽ 'Quality of Life' വിഭാഗത്തിൽ കേരള നഗരങ്ങൾ മികച്ച പോയിന്റുകൾ നേടി. കേരളത്തിലെ നഗരങ്ങൾ കേവലം ഒരു കേന്ദ്രത്തിൽ മാത്രം കേന്ദ്രീകരിക്കപ്പെടാതെ, വിവിധ ജില്ലകളിലായി സന്തുലിതമായി വികസിക്കുന്നു എന്നതിന്റെ തെളിവാണ് ഈ അന്താരാഷ്ട്ര നേട്ടം.
ഇന്ത്യന് നഗരങ്ങളില് ഏറ്റവും മികച്ച ആഗോള റാങ്കിംഗ് കരസ്ഥമാക്കിയത് രാജ്യതലസ്ഥാനമായ ഡല്ഹിയാണ് (268-ാം റാങ്ക്). ഹ്യൂമന് ക്യാപിറ്റല് വിഭാഗത്തില് ലോകതലത്തില് തന്നെ 13-ാം സ്ഥാനം സ്വന്തമാക്കാന് ഡല്ഹിക്കായി. ബെംഗളൂരു (311), മുംബൈ (330), ചൈന്നൈ(381), ഹൈദരാബാദ് (421), പൂനെ (427) എന്നിവയും ലിസ്റ്റിലുണ്ട്.
ആഗോളതലത്തില് യു.എസ് നഗരമായ ന്യൂയോര്ക്ക് ഒന്നാം സ്ഥാനം നിലനിര്ത്തി. ലണ്ടന് രണ്ടാമതും പാരിസ് മൂന്നാമതുമാണ്. സിയാറ്റില്, സാന് ഫ്രാന്സിസ്കോ, ടോക്കിയോ, ഡബ്ലിന്, ബോസ്റ്റണ്, സാന് ജോസ്, സൂറിച്ച് എന്നിവയാണ് ആദ്യ പത്തിലുള്ള മറ്റ് പ്രമുഖ നഗരങ്ങള്. ആഗോളതലത്തില് ടോപ് 100 റാങ്കിംഗില് 78 സ്ഥാനങ്ങളും വടക്കേ അമേരിക്കന്, യൂറോപ്യന് നഗരങ്ങള് കൈയടക്കിയെങ്കിലും വരും വര്ഷങ്ങളില് ചൈനീസ്, ഇന്ത്യന് നഗരങ്ങള് വന് സാമ്പത്തിക മുന്നേറ്റം നടത്തുമെന്നാണ് പഠനം വിലയിരുത്തുന്നത്.
Thrissur has emerged as Kerala's highest-ranked city in the Oxford Economics Global Cities Index 2026, overtaking Kochi, while Delhi leads Indian metropolises and New York retains its global supremacy.
Read DhanamOnline in English
Subscribe to Dhanam Magazine