യു.പി.ഐ, ഡിജിലോക്കർ, അക്കൗണ്ട് അഗ്രഗേറ്റർ, യൂണിഫൈഡ് ലെൻഡിംഗ് ഇന്റർഫേസ് എന്നിവയെ ആധാരമാക്കി എ.ഐ ബാങ്കിംഗ് സേവനങ്ങൾ സമൂഹത്തിലെ അവസാന വ്യക്തിയിലേക്കും എത്തിക്കാമെന്ന് ആർ.ബി.ഐ ഗവർണർ. തട്ടിപ്പുകൾ തടയൽ, സേവന മികവ്, ചെലവ് കുറയ്ക്കൽ എന്നിവയിലൂടെ എ.ഐ വലിയ അവസരങ്ങൾ സൃഷ്ടിക്കുമ്പോഴും ബ്ലാക്ക് ബോക്സ്, ബയാസ്, ഡാറ്റ പ്രൈവസി, സൈബർ സുരക്ഷ, ഉത്തരവാദിത്തം തുടങ്ങിയ 7 റിസ്കുകൾ ജാഗ്രതയോടെ കൈകാര്യം ചെയ്യണമെന്നും സഞ്ജയ് മൽഹോത്ര മുന്നറിയിപ്പ് നൽകി.
ആർട്ടിഫിഷ്യൽ ഇന്റലിജൻസ് (AI) എന്നത് വെറുമൊരു സാങ്കേതികവിദ്യയല്ല, മറിച്ച് ബാങ്കുകളുടെ പ്രവർത്തനരീതിയെ മാറ്റിമറിക്കുന്ന പുതിയൊരു വഴിത്താരയാണെന്ന് ഭാരതീയ റിസർവ് ബാങ്ക് (RBI) ഗവർണർ സഞ്ജയ് മൽഹോത്ര. മുംബൈയിൽ നടന്ന ഫിബാക് (FIBAC) 2026 കോൺഫറൻസിൽ സംസാരിക്കവേയാണ് അദ്ദേഹം ബാങ്കിംഗ് മേഖലയിലെ എ.ഐ തരംഗത്തെ കുറിച്ചും അതിൻ്റെ റിസ്ക് ഘടകങ്ങളെ കുറിച്ചും വിശദീകരിച്ചത്.
1990-കളിലെ സാമ്പത്തിക ഉദാരവൽക്കരണത്തിനും 2010-കളിലെ ഡിജിറ്റലൈസേഷനും തുല്യമായ മാറ്റമാണ് എ.ഐ ബാങ്കിംഗ് മേഖലയിൽ സൃഷ്ടിക്കുന്നത്. പണമിടപാടുകളിൽ യു.പി.ഐ (UPI) വരുത്തിയ വിപ്ലവകരമായ മാറ്റം പോലെ, സാമ്പത്തിക തീരുമാനങ്ങളും വായ്പ സേവനങ്ങളും ഒക്കെ സമൂഹത്തിലെ അവസാന വ്യക്തിയിലേക്ക് വരെ എത്തിക്കാൻ യു.പി.ഐ, ഡിജിലോക്കർ, അക്കൗണ്ട് അഗ്രഗേറ്റർ, യൂണിഫൈഡ് ലെൻഡിംഗ് ഇന്റർഫേസ് (ULI) എന്നിവയിൽ അധിഷ്ഠിതമായ എ.ഐ സാങ്കേതികവിദ്യക്ക് സാധിക്കുമെന്നും സഞ്ജയ് മൽഹോത്ര പറഞ്ഞു.
വായ്പാ മേഖലയിലെ മാറ്റങ്ങൾ: കൃത്യമായ സാമ്പത്തിക ചരിത്രമില്ലാത്ത ചെറുകിട കച്ചവടക്കാർ, ഗിഗ് തൊഴിലാളികൾ എന്നിവരുടെ ജി.എസ്.ടി ഫയലിംഗുകൾ, ക്യാഷ് ഫ്ലോ, യൂട്ടിലിറ്റി സേവനങ്ങൾക്കുള്ള ഫീസ് അടയ്ക്കുന്നത് എന്നിവയൊക്കെ വിലയിരുത്തി ബാങ്കിംഗ് സേവനങ്ങൾ നൽകാൻ എ.ഐ മോഡലുകൾ സഹായിക്കും.
തട്ടിപ്പുകൾ തടയൽ: വഞ്ചനാപരമായ ഇടപാടുകൾ തത്സമയം തിരിച്ചറിഞ്ഞ് തടയാൻ എ.ഐ സിസ്റ്റങ്ങൾക്ക് സാധിക്കും.
സേവന മികവും ചെലവ് കുറയ്ക്കലും: ഉപഭോക്തൃ സേവനങ്ങൾ വേഗത്തിലാക്കാനും മാന്വൽ രേഖ പരിശോധനകൾ എളുപ്പമാക്കാനും എ.ഐ സഹായകരമാകും.
എ.ഐ ഉപയോഗിക്കുമ്പോൾ ബാങ്കുകൾ ശ്രദ്ധിക്കേണ്ട ഏഴ് പ്രധാന വെല്ലുവിളികളും ആർ.ബി.ഐ ഗവർണർ ചൂണ്ടിക്കാട്ടി:
ബ്ലാക്ക് ബോക്സ് പ്രോബ്ലം (Black Box): പല എ.ഐ സിസ്റ്റങ്ങൾക്കും ഒരു വായ്പ നിരസിക്കാനുള്ള കൃത്യമായ കാരണം വിശദീകരിക്കാൻ സാധിക്കുന്നില്ല. ഇത് അംഗീകരിക്കാനാകില്ല.
ഡാറ്റയിലെ അസമത്വം (Bias): പഴയ കാലത്തെ ഡാറ്റയെ മാത്രം ആശ്രയിക്കുമ്പോൾ ചില മേഖലകളെയോ വിഭാഗങ്ങളെയോ ഒഴിവാക്കുന്ന രീതി എ.ഐ തുടർന്നേക്കാം.
കേന്ദ്രീകരണത്തിലെ അപകടം (Concentration Risk): എല്ലാ ബാങ്കുകളും ഒരേ എ.ഐ വെണ്ടർമാരെയോ മോഡലുകളെയോ ആശ്രയിക്കുന്നത് സാമ്പത്തിക മേഖലയിലാകെ വലിയ ആഘാതം സൃഷ്ടിച്ചേക്കാം.
തേർഡ് പാര്ട്ടി ആശ്രയത്വം: കരാറുകളിൽ കൃത്യമായ ഉത്തരവാദിത്തവും ഓഡിറ്റ് അവകാശങ്ങളും ഉൾപ്പെടുത്തണം.
ഡാറ്റാ പ്രൈവസി: ഉപഭോക്താക്കളുടെ വിവരങ്ങളുടെ സുരക്ഷ പൂർണ്ണമായി ഉറപ്പാക്കണം.
സൈബർ സുരക്ഷാ ഭീഷണികൾ: എ.ഐ മോഡലുകളെ കൃത്രിമമായി മാറ്റം വരുത്തുന്ന പ്രവണത തടയണം.
ഉത്തരവാദിത്തം (Accountability): "മോഡൽ എടുത്ത തീരുമാനമാണ്" എന്ന കാരണം പറഞ്ഞ് ഉപഭോക്താക്കൾക്കോ റഗുലേറ്റർമാർക്കോ മുന്നിൽ ബാങ്കുകൾക്ക് ഒഴഴിയാൻ കഴിയില്ല.
ഏറ്റവും കൂടുതൽ എ.ഐ ഉപയോഗിക്കുന്നവരാകില്ല, മറിച്ച് തങ്ങൾ ഉപയോഗിക്കുന്ന സാങ്കേതികവിദ്യ കൃത്യമായി മനസ്സിലാക്കി ഉപഭോക്തൃ വിശ്വാസം സംരക്ഷിക്കുന്ന ബാങ്കുകളായിരിക്കും എ.ഐ യുഗത്തിൽ വിജയിക്കുകയെന്നും ആർ.ബി.ഐ ഗവർണർ സഞ്ജയ് മൽഹോത്ര കൂട്ടിച്ചേർത്തു.
Read DhanamOnline in English
Subscribe to Dhanam Magazine