2025-26 സാമ്പത്തിക വര്ഷത്തിലെ ജൂലൈ-സെപ്റ്റംബര് പാദത്തില് പൊതുമേഖലാ ബാങ്കായ ബാങ്ക് ഓഫ് ബറോഡയ്ക്ക് 4,809 കോടി രൂപയുടെ ലാഭം. തൊട്ടു മുന്പാദത്തേക്കാള് 5.9 ശതമാനം വര്ധനയുണ്ട്. അതേസമയം, കഴിഞ്ഞ സാമ്പത്തിക വര്ഷത്തെ സമാനപാദത്തിലെ 5,238 കോടി രൂപയില് നിന്ന് ലാഭം 8.2 ശതമാനം ഇടിഞ്ഞു. സാമ്പത്തിക വര്ഷത്തിന്റെ ആദ്യ പാതിയില് (H1) ലാഭം 9,351 കോടി രൂപയാണ്.
പലിശ ഇതര വരുമാനം 32 ശതമാനം ഇടിഞ്ഞതാണ് ലാഭത്തില് പ്രതിഫലിച്ചത്. പലിശ ഇതര വരുമാനം കഴിഞ്ഞ വര്ഷത്തെ സമാനപാദത്തിലെ 5,166 കോടി രൂപയില് നിന്ന് 3,515 കോടി രൂപയായി കുറഞ്ഞു.
അറ്റപലിശ വരുമാനം തൊട്ട് മുന് പാദത്തേക്കാള് 4.5 ശതമാനം വര്ധിച്ച് 11,954 കോടി രൂപയുമായി. വാര്ഷികാടിസ്ഥാനത്തില് 2.7 ശതമാനത്തിന്റെ നേരിയ വളര്ച്ചയുമുണ്ട്. പ്രവര്ത്തന ലാഭം 20.1 ശതമാനം ഇടിഞ്ഞ് 7,576 കോടി രൂപയായി. തൊട്ട് മുന് വര്ഷം സെപ്റ്റംബര് പാദത്തില് ഇത് 9,477 കോടി രൂപയായിരുന്നു.
ബാങ്കിന്റെ ആസ്തി നിലവാരം മെച്ചപ്പെട്ടിട്ടുണ്ട്. മൊത്ത നിഷ്ക്രിയ ആസ്തി (GNPA) 2.50 ശതമാനത്തില് നിന്ന് 2.16 ശതമാനമായി. അറ്റ നിഷ്ക്രിയ ആസ്കി 0.60 ശതമാനത്തില് നിന്ന് 0.57 ശതമാനത്തിലേക്കും കുറഞ്ഞു.
ബാങ്കിന്റെ ആഗോള വായ്പകള് 11.9 ശതമാനവും ആഭ്യന്തര വായ്പകള് 11.5 ശതമാനവും വളര്ച്ച രേഖപ്പെടുത്തി. ചെറുകിട വായ്പകളിലുണ്ടായ വളര്ച്ചയാണ് ഇതിന് സഹായകമായത്. റീറ്റെയ്ല് വായ്പകള് 17.6 ശതമാനം വളര്ച്ച നേടി. മോര്ട്ഗേജ് വായ്പകള് 19.8 ശതമാനവും വാഹന വായ്പകള് 17.7 ശതമാനവും ഭവന വായ്പകള് 16.5 ശതമാനവും വിദ്യാഭ്യാസ വായ്പകള് 14 ശതമാനവും വ്യക്തിഗത വായ്പകള് 18.6 ശതമാനവും വര്ധിച്ചു.
ഇന്നലെ വിപണി സമയം അവസാനിച്ചതിനു ശേഷമാണ് ബാങ്ക് പ്രവര്ത്തനഫലങ്ങള് പുറത്തുവിട്ടത്. ഓഹരി വില രണ്ട് ശതമാനത്തോളം ഉയര്ന്ന് 278 രൂപയിലാണ് ബാങ്ക് ഓഫ് ഇന്ത്യ വ്യാപാരം അവസാനിപ്പിച്ചത്.
Read DhanamOnline in English
Subscribe to Dhanam Magazine