പകുതി വാഹനങ്ങൾക്കും തേർഡ് പാർട്ടി ഇൻഷുറൻസില്ല; എന്താണ് ഇതിന്റെ പ്രസക്തി? നിങ്ങൾ എത്ര തുക അടയ്ക്കണം?

1988 ലെ മോട്ടോർ വാഹന നിയമപ്രകാരം ഇന്ത്യയിൽ തേർഡ് പാർട്ടി മോട്ടോർ ഇൻഷുറൻസ് നിർബന്ധമാണ്. റോഡപകടങ്ങൾ മൂലമുണ്ടാകുന്ന നിയമപരവും സാമ്പത്തികവുമായ ബാധ്യതകളിൽ നിന്ന് വാഹന ഉടമയെ സംരക്ഷിക്കുക എന്നതാണ് ഇതിന്റെ പ്രധാന ലക്ഷ്യം. 'തേർഡ് പാർട്ടി' എന്നത് കൊണ്ട് ഉദ്ദേശിക്കുന്നത് വാഹന ഉടമയോ ഡ്രൈവറോ അല്ലാത്ത മൂന്നാമതൊരാളെയാണ്; ഉദാഹരണത്തിന് കാൽനടയാത്രക്കാർ, മറ്റൊരു വാഹനത്തിലെ യാത്രക്കാർ തുടങ്ങിയവർ ഇതിൽ ഉൾപ്പെടുന്നു. ഇന്ത്യൻ റോഡുകളിലുള്ള 50 ശതമാനം വാഹനങ്ങൾക്കും തേർഡ് പാർട്ടി ഇൻഷുറൻസ് പരിരക്ഷയില്ലെന്ന് ഇൻഷുറൻസ് റെഗുലേറ്റർ ഐ.ആർ.ഡി.എ.ഐ ചൂണ്ടിക്കാട്ടുന്നു.

എന്തൊക്കെയാണ് പരിരക്ഷ ലഭിക്കുന്നത്?

ഈ പോളിസി പ്രധാനമായും താഴെ പറയുന്ന കാര്യങ്ങൾക്കാണ് പരിരക്ഷ നൽകുന്നത്

• മൂന്നാമതൊരാൾക്ക് സംഭവിക്കുന്ന ശാരീരിക പരിക്കുകൾ അല്ലെങ്കിൽ മരണം.

• മൂന്നാമതൊരാളുടെ വസ്തുവകകൾക്കുണ്ടാകുന്ന നാശനഷ്ടങ്ങൾ.

• ക്ലെയിമുകൾ നേരിടുന്നതിനായുള്ള നിയമപരമായ ചെലവുകൾ. എന്നാൽ, ഈ ഇൻഷുറൻസ് ഇൻഷ്വർ ചെയ്ത വാഹനത്തിനുണ്ടാകുന്ന കേടുപാടുകൾക്ക് (Own damage) പരിരക്ഷ നൽകില്ല എന്നത് പ്രത്യേകം ശ്രദ്ധിക്കേണ്ടതാണ്.

പ്രീമിയം തുക എത്രയാണ്?

തേർഡ് പാർട്ടി ഇൻഷുറൻസ് പ്രീമിയങ്ങൾ റെഗുലേറ്റഡും എല്ലാ ഇൻഷുറൻസ് കമ്പനികളിലും ഏകീകൃതവുമാണ്.

• ഇരുചക്ര വാഹനങ്ങൾ: വാർഷിക പ്രീമിയം സാധാരണയായി 500 രൂപ മുതൽ 3,000 രൂപ വരെയാണ്.

• സ്വകാര്യ കാറുകൾ: വാർഷിക പ്രീമിയം 2,000 രൂപ മുതൽ 8,000 രൂപ വരെയാണ്.

പുതിയ വാഹനങ്ങൾക്ക് മൂന്ന് വർഷം (കാറുകൾ) അല്ലെങ്കിൽ അഞ്ച് വർഷം (ഇരുചക്ര വാഹനങ്ങൾ) എന്നിങ്ങനെ ദീർഘകാല പോളിസികളും ലഭ്യമാണ്. ഇൻഷുറൻസ് ഇല്ലെങ്കിൽ അപകടമുണ്ടായാൽ വലിയ സാമ്പത്തിക ബാധ്യത വാഹന ഉടമ നേരിട്ട് വഹിക്കേണ്ടി വരുമെന്ന കാര്യം പ്രത്യേകം ഓര്‍ക്കുക.

_{Half of Indian vehicles lack mandatory third-party insurance, raising serious legal and financial concerns.}