ഇൻഷുറൻസ് തർക്കങ്ങൾ: ഓംബുഡ്‌സ്മാന് പരാതികള്‍ നല്‍കുന്നത് എങ്ങനെ? അറിയേണ്ട കാര്യങ്ങൾ

ഇൻഷുറൻസ് ക്ലെയിമുകൾ സംബന്ധിച്ച തർക്കങ്ങൾ പരിഹരിക്കുന്നതിനുള്ള ഒരു സ്വതന്ത്ര സംവിധാനമാണ് ഇൻഷുറൻസ് ഓംബുഡ്‌സ്മാൻ. ഇൻഷുറൻസ് കമ്പനികളിൽ നിന്ന് നീതി ലഭിക്കാത്ത പോളിസി ഉടമകൾക്ക് ഓംബുഡ്‌സ്മാനെ സമീപിക്കാം.

എപ്പോഴാണ് ഓംബുഡ്‌സ്മാനെ സമീപിക്കേണ്ടത്?

ആദ്യം, പരാതി രേഖാമൂലം ഇൻഷുറൻസ് കമ്പനിയുടെ ഗ്രീവൻസ് റിഡ്രസൽ ഓഫീസർക്ക് (GRO) നൽകണം. കമ്പനി ഒരു മാസത്തിനകം മറുപടി നൽകിയില്ലെങ്കിലോ അല്ലെങ്കിൽ നൽകിയ മറുപടിയിൽ തൃപ്തരല്ലെങ്കിലോ ഓംബുഡ്‌സ്മാനെ സമീപിക്കാം. കമ്പനിയുടെ പ്രതികരണം ലഭിച്ച് ഒരു വർഷത്തിനകം പരാതി നൽകിയിരിക്കണം. നഷ്ടപരിഹാരമായി ആവശ്യപ്പെടുന്ന തുക 50 ലക്ഷം രൂപയിൽ കൂടരുത്. പരാതി നൽകുന്നതിന് മുമ്പ് ഇതേ വിഷയത്തിൽ കോടതിയിലോ മറ്റ് ഫോറങ്ങളിലോ കേസ് നൽകിയിട്ടില്ല എന്നും ഉറപ്പാക്കണം.

പരാതി നൽകേണ്ട രീതി

പരാതി എഴുതി സമർപ്പിക്കാം, അല്ലെങ്കിൽ ഓൺലൈനായോ ഇമെയിൽ വഴിയോ നൽകാം. കൗൺസിൽ ഫോർ ഇൻഷുറൻസ് ഓംബുഡ്‌സ്മാന്റെ ഔദ്യോഗിക വെബ്സൈറ്റ് (www.cioins.co.in) വഴി ഓൺലൈനായി പരാതി നൽകാൻ സൗകര്യമുണ്ട്.

പരാതിയോടൊപ്പം ഉൾപ്പെടുത്തേണ്ട രേഖകൾ:

പോളിസിയുടെ പകർപ്പ്.

ക്ലെയിം സംബന്ധിച്ച രേഖകൾ (ബില്ലുകൾ, മെഡിക്കൽ റിപ്പോർട്ടുകൾ).

ഇൻഷുറൻസ് കമ്പനിക്ക് നൽകിയ പരാതിയുടെയും അതിന് ലഭിച്ച മറുപടിയുടെയും (ലഭ്യമാണെങ്കിൽ) പകർപ്പുകൾ.

തിരിച്ചറിയൽ രേഖയുടെ പകർപ്പ്.

പരാതി ലഭിച്ചാൽ ഓംബുഡ്‌സ്മാൻ ഒരു നിഷ്പക്ഷ മധ്യസ്ഥനായി പ്രവർത്തിക്കുകയും വസ്തുതകളുടെ അടിസ്ഥാനത്തിൽ ഇരു കക്ഷികൾക്കും സ്വീകാര്യമായ ഒരു ഒത്തുതീർപ്പ് ശുപാർശ ചെയ്യുകയും ചെയ്യും. ഇത് അംഗീകരിച്ചാൽ 15 ദിവസത്തിനകം കമ്പനി നഷ്ടപരിഹാരം നൽകണം. ഓംബുഡ്‌സ്മാൻ വഴി പരാതി നൽകാൻ ഫീസ് ഈടാക്കുന്നില്ല. ഒത്തുതീർപ്പിൽ എത്താൻ കഴിഞ്ഞില്ലെങ്കിൽ ഓംബുഡ്‌സ്മാൻ വിധി പ്രഖ്യാപിക്കും. ഈ വിധി ഇൻഷുറൻസ് കമ്പനികള്‍ക്ക് ബാധകമാണ്.

_{How to file a complaint with the Insurance Ombudsman for claim-related disputes in India.}