2026 ഒക്ടോബർ 1 മുതൽ എസ്ബിഐയുടെ ബേസിക് സേവിംഗ്സ് ബാങ്ക് ഡിപ്പോസിറ്റ് അക്കൗണ്ടുകളിൽ പ്രതിമാസം എ.ടി.എം, ബ്രാഞ്ച് ഉൾപ്പെടെ 4 പണം പിൻവലിക്കൽ മാത്രം സൗജന്യം; അതിന് മുകളിലുള്ള ഓരോ ഇടപാടിനും 15 രൂപയും ജി.എസ്.ടി യും ഈടാക്കും. ഓഗസ്റ്റ് 15 മുതൽ 3 കോടി രൂപയ്ക്കു മുകളിലുള്ള ബൾക്ക് എഫ്.ഡികളുടെ പലിശ നിരക്ക് 0.10% മുതൽ 0.25% വരെ കുറച്ചു. എന്നാൽ ചെറുകിട റീട്ടെയിൽ എഫ്.ഡികളുടെ പലിശ നിരക്കിന് മാറ്റമില്ല.
രാജ്യത്തെ ഏറ്റവും വലിയ വാണിജ്യ ബാങ്കും പൊതുമേഖല ധനകാര്യ സ്ഥാപനവുമായ സ്റ്റേറ്റ് ബാങ്ക് ഓഫ് ഇന്ത്യ (SBI) ചില സ്ഥിര നിക്ഷേപ പദ്ധതികളുടെ പലിശ നിരക്കുകൾ കുറയ്ക്കുകയും ബേസിക് സേവിംഗ്സ് ബാങ്ക് ഡിപ്പോസിറ്റ് (BSBD) അക്കൗണ്ട് ഉടമകൾക്ക് പണം പിൻവലിക്കുന്നതിന് പുതിയ ഫീസ് ഏർപ്പെടുത്തുകയും ചെയ്തു. രണ്ട് വ്യത്യസ്ത ഉപഭോക്തൃ വിഭാഗങ്ങളെ ബാധിക്കുന്ന മാറ്റങ്ങളാണ് വ്യത്യസ്ത സമയങ്ങളിലായി ബാങ്ക് നടപ്പിലാക്കുന്നത്.
2026 ഓഗസ്റ്റ് 15 മുതൽ പ്രാബല്യത്തിൽ വന്ന മാറ്റങ്ങൾ പ്രകാരം 3 കോടി രൂപയോ അതിനു മുകളിലോ ഉള്ള ബൾക്ക് സ്ഥിര നിക്ഷേപങ്ങളുടെ (Bulk FD) പലിശ നിരക്കാണ് എസ്.ബി.ഐ കുറച്ചത്. 3 കോടി രൂപയിൽ താഴെയുള്ള ചെറുകിട റീട്ടെയിൽ എഫ്.ഡികളുടെ നിരക്കുകളിൽ മാറ്റമില്ല.
കുറച്ച നിരക്കുകൾ: 7-14 ദിവസം, 15-45 ദിവസം, 46-179 ദിവസം വരെയുള്ള നിക്ഷേപങ്ങളുടെ പലിശ നിരക്ക് 25 ബേസിസ് പോയിന്റ് (0.25%) കുറച്ച് യഥാക്രമം 4.25%, 4.75%, 4.85% ആക്കി.
മറ്റ് കാലാവധികൾ: 180-210 ദിവസത്തെ നിക്ഷേപങ്ങൾക്ക് 10 ബേസിസ് പോയിന്റ് (0.10%) കുറച്ച് 5.50% ആക്കി. എന്നാൽ 211 ദിവസത്തിന് മുകളിലുള്ള നിക്ഷേപങ്ങൾക്കും 1 മുതൽ 3 വർഷം വരെയുള്ള ദീർഘകാല നിക്ഷേപങ്ങൾക്കും പലിശ നിരക്ക് മാറ്റമില്ലാതെ തുടരും.
പിഴ: കാലാവധി തികയുന്നതിന് മുൻപ് ബൾക്ക് നിക്ഷേപങ്ങൾ പിൻവലിച്ചാൽ 1 ശതമാനം പിഴ ഈടാക്കുമെന്നും ബാങ്ക് വ്യക്തമാക്കിയിട്ടുണ്ട്.
2026 ഒക്ടോബർ 1 മുതൽ ബേസിക് സേവിംഗ്സ് ബാങ്ക് ഡിപ്പോസിറ്റ് (BSBD) അക്കൗണ്ടുകളിൽ നിന്ന് പണം പിൻവലിക്കുന്നതിനുള്ള നിയമങ്ങളിൽ മാറ്റം വരും.
സൗജന്യ പരിധി: പ്രതിമാസം എ.ടി.എം (ATM), ബ്രാഞ്ച് ഇടപാടുകൾ ഉൾപ്പെടെ 4 പണം പിൻവലിക്കലിന് (Cash Withdrawal) സൗജന്യമായിരിക്കും.
അധിക ചാർജ്: 4 തവണയിൽ കൂടുതൽ പണം പിൻവലിക്കുമ്പോൾ ഓരോ ഇടപാടിനും 15 രൂപയും ജി.എസ്.ടിയും ഫീസായി ഈടാക്കും.
ഡിജിറ്റൽ ഇടപാടുകൾ: യു.പി.ഐ (UPI), എൻ.ഇ.എഫ്.ടി (NEFT), ആർ.ടി.ജി.എസ് (RTGS), ഐ.എം.പി.എസ് (IMPS) വഴിയുള്ള ഡിജിറ്റൽ ഇടപാടുകൾക്ക് ഈ പരിധി ബാധകമല്ല; അവ തുടർന്നും സൗജന്യമായിരിക്കും.
കച്ചവടക്കാരെയും ദിവസവേതനക്കാരെയും ബാധിക്കുന്ന ഈ അധിക ഫീസ് ഒഴിവാക്കാൻ പരമാവധി ഡിജിറ്റൽ ഇടപാടുകൾ പ്രയോജനപ്പെടുത്തുക എന്നതാണ് മുന്നിലുള്ള മാർഗ്ഗം.
Read DhanamOnline in English
Subscribe to Dhanam Magazine