യുപിഐ ചതിച്ചാശാനേ; എസ്ബിഐ ഉള്‍പ്പെടെയുള്ള പ്രമുഖ ബാങ്കുകളുടെ സേവനം തടസപ്പെട്ടു

രാജ്യത്തെ ഡിജിറ്റല്‍ ഇടപാടുകളുടെ നട്ടെല്ലായ യൂണിഫൈഡ് പേയ്മെന്റ് ഇന്റര്‍ഫേസ് (UPI) സേവനങ്ങളില്‍ വ്യാപകമായ തടസം നേരിടുന്നതായി റിപ്പോര്‍ട്ട്. സ്റ്റേറ്റ് ബാങ്ക് ഓഫ് ഇന്ത്യ (SBI), യുക്കോ ബാങ്ക് (UCO Bank) തുടങ്ങിയ പ്രമുഖ ബാങ്കുകളുടെ ഉപഭോക്താക്കളാണ് പണമിടപാടുകള്‍ നടത്താന്‍ കഴിയാതെ ബുദ്ധിമുട്ടുന്നത്.

ബുധനാഴ്ച ഉച്ചയോടെയാണ് സേവനങ്ങളില്‍ തടസം നേരിട്ടു തുടങ്ങിയത്. ഗൂഗിള്‍ പേ (Google Pay), ഫോണ്‍ പേ (PhonePe), പേയ്ടിഎം (Paytm) തുടങ്ങിയ ജനപ്രിയ ആപ്പുകള്‍ വഴി ഇടപാടുകള്‍ നടത്തുമ്പോള്‍ 'സെര്‍വര്‍ ബിസി' (Server Busy) സന്ദേശമാണ് പലര്‍ക്കും ലഭിക്കുന്നത്. പേയ്മെന്റുകള്‍ പരാജയപ്പെടുന്നതിനൊപ്പം അക്കൗണ്ട് ബാലന്‍സ് പരിശോധിക്കാനും സാധിക്കുന്നില്ലെന്ന് ഉപഭോക്താക്കള്‍ സോഷ്യല്‍ മീഡിയ പ്ലാറ്റ്ഫോമുകളിലൂടെ പരാതിപ്പെട്ടു.

എസ്ബിഐ, യുക്കോ ബാങ്ക് എന്നിവയ്ക്ക് പുറമെ മറ്റ് ചില പൊതുമേഖലാ ബാങ്കുകളിലെയും സ്വകാര്യ ബാങ്കുകളിലെയും ഇടപാടുകളെ ബാധിച്ചിട്ടുണ്ട്.

കാരണം വ്യക്തമല്ല

നാഷണല്‍ പേയ്മെന്റ് കോര്‍പ്പറേഷന്‍ ഓഫ് ഇന്ത്യയുടെ (NPCI) സെര്‍വറിലുണ്ടായ സാങ്കേതിക തകരാറാണോ അതോ ബാങ്കുകളുടെ സിസ്റ്റത്തിലെ പ്രശ്‌നമാണോ എന്ന കാര്യത്തില്‍ ഔദ്യോഗിക സ്ഥിരീകരണം വന്നിട്ടില്ല.

അതേസമയം, നേരത്തെ നിശ്ചയിച്ചിരുന്ന അറ്റകുറ്റപ്പണികളുടെ (maintenance activity) സമയം രാവിലെ 11:00 മുതല്‍ 12.30 വരെയായി പുതുക്കിയതായി എസ്ബിഐ (SBI) അറിയിച്ചിരുന്നു.

ഈ സമയത്ത് യുപിഐ, ഐഎംപിഎസ്, യോനോ, ഇന്റര്‍നെറ്റ് ബാങ്കിംഗ്, എന്‍ഇഎഫ്ടി, ആര്‍ടിജിഎസ് എന്നീ സേവനങ്ങളില്‍ തടസങ്ങള്‍ അനുഭവപ്പെട്ടേക്കാമെന്നും എക്‌സിലെ (X) പോസ്റ്റിലൂടെ എസ്ബിഐ അറിയിച്ചു. ഈ സമയയളവില്‍ യുപിഐ ലൈറ്റ് (UPI Lite), എടിഎം സേവനങ്ങള്‍ എന്നിവ ഉപയോഗിക്കാനും ബാങ്ക് ഉപഭോക്താക്കളോട് നിര്‍ദ്ദേശിച്ചിരുന്നു.

കച്ചവടക്കാരും പ്രതിസന്ധിയില്‍

പലയിടങ്ങളിലും പണം അക്കൗണ്ടില്‍ നിന്ന് കുറയുന്നുണ്ടെങ്കിലും വ്യാപാരികള്‍ക്ക് ലഭിക്കുന്നില്ലെന്ന പരാതിയും ഉയരുന്നുണ്ട്.

തകരാറുകള്‍ നിരീക്ഷിക്കുന്ന പ്ലാറ്റ്ഫോമായ 'ഡൗണ്‍ ഡിറ്റക്ടര്‍' (Downdetector), പരാതികളില്‍ വന്‍ വര്‍ധനവുണ്ടായതായി സൂചിപ്പിച്ചു. സേവനം തടസപ്പെട്ട സ്ഥാപനങ്ങളില്‍ സ്റ്റേറ്റ് ബാങ്ക് ഓഫ് ഇന്ത്യയിലാണ് വലിയ തോതിലുള്ള പരാതികള്‍ ഉയര്‍ന്നത്; അഞ്ഞൂറിലധികം ഉപഭോക്താക്കളാണ് പണമിടപാടുമായി ബന്ധപ്പെട്ട പ്രശ്‌നങ്ങള്‍ റിപ്പോര്‍ട്ട് ചെയ്തത്.

ഡിജിറ്റല്‍ സമ്പദ്വ്യവസ്ഥയിലേക്ക് രാജ്യം അതിവേഗം മാറിക്കൊണ്ടിരിക്കെ, യുപിഐ പ്ലാറ്റ്ഫോമിലുണ്ടാകുന്ന ഇത്തരം ഇടയ്ക്കിടെയുള്ള തകരാറുകള്‍ ചെറുകിട വ്യാപാരികളെയും സാധാരണക്കാരെയും ഒരുപോലെ പ്രതിസന്ധിയിലാക്കുന്നുണ്ട്. സാങ്കേതിക പ്രശ്‌നങ്ങള്‍ പരിഹരിക്കാനുള്ള നടപടികള്‍ യുദ്ധകാലാടിസ്ഥാനത്തില്‍ നടന്നുവരികയാണെന്നാണ് വിവരം.

സേവനങ്ങള്‍ പുനഃസ്ഥാപിക്കുന്നത് വരെ നെറ്റ് ബാങ്കിംഗ് (Net Banking) അല്ലെങ്കില്‍ കാര്‍ഡ് പേയ്മെന്റുകള്‍ (Card Payments) ഉപയോഗിക്കാന്‍ വിദഗ്ധര്‍ നിര്‍ദ്ദേശിക്കുന്നു.

UPI services face major disruption affecting SBI and other banks, causing transaction failures across digital payment apps.