എൽ നിനോയും സമുദ്രോഷ്ണ തരംഗങ്ങളും: കേരളത്തിലെ മത്സ്യമേഖലയ്ക്ക് മുന്നറിയിപ്പുമായി സി.എം.എഫ്.ആർ.ഐ

കേരളത്തിന്റെ 600 കിലോമീറ്ററിലധികം ദൈർഘ്യമുള്ള തീരപ്രദേശം ലക്ഷക്കണക്കിന് മത്സ്യത്തൊഴിലാളികളുടെ ഉപജീവനമാർഗവും സംസ്ഥാനത്തിന്റെ സാമ്പത്തിക അടിത്തറയുമാണ്. എന്നാൽ കാലാവസ്ഥാ വ്യതിയാനവും എൽ നിനോ (El Niño) പോലുള്ള ആഗോള പ്രതിഭാസങ്ങളും ഇന്ന് ഈ മേഖലയ്ക്ക് വലിയ വെല്ലുവിളികൾ ഉയർത്തുന്നു. ഈ പശ്ചാത്തലത്തിൽ, സമുദ്ര വിഭവങ്ങളുടെ സുസ്ഥിരമായ പരിപാലനത്തിനായി കേന്ദ്ര സമുദ്രമത്സ്യ ഗവേഷണ സ്ഥാപനം (CMFRI) നൂതന പദ്ധതികളുമായി ക്രിയാത്മകമായ ഇടപെടലുകളാണ് നടത്തുന്നത്.

എൽ നിനോ ഉയർത്തുന്ന വെല്ലുവിളികൾ

പസഫിക് സമുദ്രത്തിൽ രൂപപ്പെടുന്ന എൽ നിനോ പ്രതിഭാസം ഇന്ത്യൻ മഹാസമുദ്രത്തിലെ താപനിലയെയും മത്സ്യലഭ്യതയെയും കാര്യമായി ബാധിക്കുന്നതായി സിഎംഎഫ്ആർഐ ഡയറക്ടർ ഡോ. ഗ്രിൻസൺ ജോർജ് ധനം ഓണ്‍ലൈനോട് പറഞ്ഞു. ഇത്തവണ രൂപപ്പെടുന്ന എൽ നിനോ അതീവ ശക്തമാണ്. നവംബർ-ഡിസംബർ മാസങ്ങളിൽ പസഫിക്കിൽ ശക്തിപ്രാപിക്കുന്ന ഈ പ്രതിഭാസം, അന്തരീക്ഷത്തിലെ വായുപ്രവാഹം വഴി നാല് മുതൽ ആറ് മാസത്തെ ഇടവേളയിൽ വടക്കൻ ഇന്ത്യൻ മഹാസമുദ്രത്തിലേക്ക് അധിക താപം എത്തിക്കുന്നു. ഇതിന്റെ ഫലമായി ഏപ്രിൽ-മെയ് മാസങ്ങളിൽ സമുദ്ര താപനില ഗണ്യമായി വർദ്ധിക്കുകയും 'മറൈൻ ഹീറ്റ് വേവ്' (Marine Heatwave) അഥവാ സമുദ്രോഷ്ണ തരംഗങ്ങൾ ഉണ്ടാകുകയും ചെയ്യുന്നതായും ഡോ. ഗ്രിൻസൺ ജോർജ് പറഞ്ഞു.

ഈ താപവർദ്ധനവ് സമുദ്രത്തിലെ ആവാസവ്യവസ്ഥയെ, പ്രത്യേകിച്ച് പവിഴപ്പുറ്റുകളെ (Coral Bleaching) ദോഷകരമായി ബാധിക്കുന്നു. ഇത് മത്സ്യങ്ങളുടെ ലഭ്യതയെ, പ്രത്യേകിച്ചും കേരളത്തിന്റെ പ്രധാന മത്സ്യമായ ചാളയുടെ (Sardine) ലഭ്യതയെ വലിയ തോതിൽ ബാധിക്കുമെന്ന് സിഎംഎഫ്ആർഐ (CMFRI) മുന്നറിയിപ്പ് നൽകുന്നു. എല്ലാ മീനുകളെയും ഇത് ഒരുപോലെ ബാധിക്കില്ല. നമുക്ക് ഏകദേശം 1200 ഓളം ഇനങ്ങളാണ് ഉളളത്. മത്സ്യബന്ധനയില്‍ ഈ വ്യതിയാനം ചെറിയൊരു കുറവുണ്ടാക്കാമെങ്കിലും മൊത്തം മത്സ്യ ലഭ്യതയില്‍ വലിയൊരു കുറവിന് സാധ്യതയില്ല.

ചാളക്ക് വില കൂടുമോ?

ചാളയുടെ കുറവ് മറ്റ് ഇനം മത്സ്യങ്ങള്‍ നികത്തുമെന്ന വിലയിരുത്തലാണ് ഉളളത്. ചാളയുടെ ലഭ്യത കുറയുമ്പോൾ ആ സ്ഥലം അയലയോ കൊഴുവയോ കൈക്കലാക്കാൻ സാധ്യതയുണ്ട്. കേരള-കൊങ്കണ്‍ തീരത്ത് (കന്യാകുമാരി മുതല്‍ രത്നഗിരി വരെയുളള പ്രദേശങ്ങളില്‍) ചാള ലഭ്യതയുളള പ്രദേശങ്ങളാണ്. കൂടാതെ, കാലാവസ്ഥാ വ്യതിയാനം മൂലം ചാളകൾ കേരള തീരത്ത് നിന്ന് ഗുജറാത്ത്, തമിഴ്‌നാട്, ആന്ധ്ര തുടങ്ങിയ മറ്റ് സംസ്ഥാനങ്ങളുടെ തീരങ്ങളിലേക്ക് വ്യാപിക്കുന്നതായും (Extension of spread) നിരീക്ഷിക്കപ്പെടുന്നു. ഒരു സ്ഥലത്ത് കുറയുമ്പോള്‍ മറ്റൊരു സ്ഥലത്ത് ലഭ്യത കൂടിയാല്‍ കോള്‍ഡ് ചെയിന്‍ സംവിധാനങ്ങള്‍ വഴി മത്സ്യങ്ങള്‍ നാട്ടിലേക്ക് കൊണ്ടു വരാന്‍ സാധിക്കുമെന്നും ഡോ. ഗ്രിൻസൺ ജോർജ് പറഞ്ഞു.

മത്തി വില അടുത്തിടെ 400 രൂപ വരെ എത്തിയിരുന്നു. കേരള തീരത്ത് ലഭ്യത കുറഞ്ഞാല്‍ മറ്റ് സ്ഥലങ്ങളില്‍ നിന്ന് മത്തി സംസ്ഥാനത്തേക്ക് എത്തിക്കാന്‍ സാധിക്കും. ഇതിനാല്‍ അനിയന്ത്രിതമായ രീതിയില്‍ മത്സ്യത്തിന്റെ വില ഉയരുന്നത് തടയാന്‍ സാധിക്കുമെന്നാണ് കരുതുന്നത്.

മത്സ്യബന്ധന ദിവസങ്ങളിലെ കുറവ്

അടുത്ത കാലത്തായി ആവർത്തിച്ചുണ്ടാകുന്ന ചുഴലിക്കാറ്റുകളും സമുദ്രക്ഷോഭവും കാരണം മത്സ്യബന്ധനത്തിന് കടലിൽ ഇറങ്ങാൻ സാധിക്കുന്ന ദിവസങ്ങളുടെ എണ്ണത്തിൽ വലിയ കുറവുണ്ടാകുന്നുണ്ട്. ഇത് പരമ്പരാഗത മത്സ്യത്തൊഴിലാളികളുടെ വരുമാനത്തെയും ജീവിതനിലവാരത്തെയും നേരിട്ട് ബാധിക്കുന്നു. ഈ പ്രതിസന്ധി മറികടക്കാൻ മത്സ്യത്തൊഴിലാളികൾക്ക് സബ്‌സിഡിയും ഇൻഷുറൻസും ഉൾപ്പെടെയുള്ള പിന്തുണ സർക്കാർ വാഗ്ദാനം ചെയ്യുന്നു.

സിഎംഎഫ്ആർഐ നടപ്പാക്കുന്ന പദ്ധതികൾ

മത്സ്യ ഉൽപ്പാദനവും കർഷകരുടെ വരുമാനവും വർദ്ധിപ്പിക്കുന്നതിനായി സിഎംഎഫ്ആർഐ നിരവധി സാങ്കേതികവിദ്യകൾ വികസിപ്പിച്ചിട്ടുണ്ട്:

സമുദ്ര മത്സ്യകൃഷി (Mariculture): കൂട് മത്സ്യകൃഷി (Cage Farming), കല്ലുമക്കായ കൃഷി എന്നിവ ഇതിൽ പ്രധാനമാണ്.

ഇന്റഗ്രേറ്റഡ് മൾട്ടി ട്രോഫിക് അക്വാകൾച്ചർ (IMTA): കൂട് മത്സ്യകൃഷിയോടൊപ്പം തന്നെ കക്ക വർഗങ്ങളും കടൽ പായലുകളും (Seaweed) കൃഷി ചെയ്യുന്ന രീതിയാണിത്. ഇത് കൂടുകളിൽ നിന്നുള്ള അവശിഷ്ടങ്ങൾ പ്രകൃതിദത്തമായി സംസ്കരിക്കാനും അധിക വരുമാനം നൽകാനും സഹായിക്കുന്നു.

ബ്ലാക്ക് സോൾജിയർ ഫ്ലൈ (BSF) സാങ്കേതികവിദ്യ: മത്സ്യ സംസ്കരണ വേളയിൽ ഉണ്ടാകുന്ന ജൈവമാലിന്യങ്ങൾ സംസ്കരിക്കാൻ ഈ സാങ്കേതികവിദ്യ ഉപയോഗിക്കുന്നു. ഈ ഈച്ചകളുടെ ലാർവകൾ മാലിന്യം ഭക്ഷിക്കുകയും, അവയിൽ നിന്ന് ഉയർന്ന ഗുണമേന്മയുള്ള പ്രോട്ടീൻ അടങ്ങിയ മത്സ്യത്തീറ്റയും ജൈവവളവും നിർമ്മിക്കുകയും ചെയ്യുന്നു.

പ്രത്യേക പദ്ധതികൾ: എസ്‌സി/എസ്ടി വിഭാഗങ്ങൾക്കായി ട്രൈബൽ സബ് പ്ലാൻ (TSP), ഷെഡ്യൂൾഡ് കാസ്റ്റ് സബ് പ്ലാൻ (SCSP) എന്നിവയിലൂടെ സിഎംഎഫ്ആർഐ നേരിട്ട് സാങ്കേതിക സഹായം നൽകുന്നു.

പൊതുജനങ്ങൾക്ക് എങ്ങനെ സേവനം പ്രയോജനപ്പെടുത്താം?

സിഎംഎഫ്ആർഐ നൽകുന്ന പരിശീലന പരിപാടികളെക്കുറിച്ചും സാങ്കേതികവിദ്യകളെക്കുറിച്ചുമുള്ള വിവരങ്ങൾ അവരുടെ ഔദ്യോഗിക വെബ്‌സൈറ്റിലും സോഷ്യൽ മീഡിയ പേജുകളിലും ലഭ്യമാണ്. താല്പര്യമുള്ള കർഷകർക്കും വിദ്യാർത്ഥികൾക്കും ഈ പ്ലാറ്റ്‌ഫോമുകൾ വഴി രജിസ്റ്റർ ചെയ്ത് പരിശീലനങ്ങളിൽ പങ്കുചേരാം. കൂടാതെ, പൊതുജനങ്ങൾക്ക് മത്സ്യമേഖലയെക്കുറിച്ച് നേരിട്ട് മനസിലാക്കാൻ 'ഫിഷ് വാക്ക്' (Fish Walk) എന്ന പേരിൽ ഗൈഡഡ് ടൂറുകളും സ്ഥാപനം സംഘടിപ്പിക്കുന്നുണ്ട്.

കേന്ദ്ര ഗവൺമെന്റിന്റെ പ്രധാനമന്ത്രി മത്സ്യ സമ്പദ യോജന (PMMSY), സാഗർമാല തുടങ്ങിയ പദ്ധതികളുമായി ചേർന്ന് നീല സമ്പദ്‌വ്യവസ്ഥയെ ശക്തിപ്പെടുത്താനാണ് കേരളം ലക്ഷ്യമിടുന്നത്. സുസ്ഥിരമായ മത്സ്യബന്ധന രീതികളും അത്യാധുനിക കൃഷി രീതികളും അവലംബിക്കുന്നതിലൂടെയാണ് കാലാവസ്ഥാ വെല്ലുവിളികളെ നമുക്ക് അതിജീവിക്കാൻ സാധിക്കുക.