ബാറ്ററി മാലിന്യ കയറ്റുമതിക്ക് ഇന്ത്യയുടെ വിലക്ക്. ഉപയോഗം കഴിഞ്ഞ ബാറ്ററികളില്‍ നിന്ന് ലിഥിയം, നിക്കല്‍, കോബാള്‍ട്ട് തുടങ്ങിയ വിലയേറിയ ലോഹങ്ങള്‍ വീണ്ടെടുക്കാം. ഈ ലോഹങ്ങള്‍ വേര്‍തിരിച്ചെടുക്കാന്‍ ഉപയോഗിക്കുന്ന 'ബ്ലാക്ക് മാസ്' ഉള്‍പ്പെടെയുള്ള ചില ബാറ്ററി മാലിന്യങ്ങളുടെ കയറ്റുമതിയാണ് ഇന്ത്യ വിലക്കിയത്. ഇവ രാജ്യത്ത് തന്നെ സംസ്‌കരിക്കാന്‍ കൂടുതല്‍ അസംസ്‌കൃത വസ്തു ലഭിക്കുമെന്നതാണ് തീരുമാനത്തിന്റെ സാധ്യതയുള്ള നേട്ടം.
ലെഡ്, കാഡ്മിയം, മെര്‍ക്കുറി എന്നിവ അടങ്ങിയിട്ടില്ലാത്തതും തരംതിരിക്കാത്തതുമായ നിര്‍ദിഷ്ട ബാറ്ററി മാലിന്യങ്ങള്‍ക്കും സ്‌ക്രാപ്പിനുമാണ് വിലക്ക്. ലിഥിയം അയണ്‍ ബാറ്ററി ബ്ലാക്ക് മാസ് ഇതില്‍ ഉള്‍പ്പെടും. നവംബര്‍ 10ന് ഡയറക്ടറേറ്റ് ജനറല്‍ ഓഫ് ഫോറിന്‍ ട്രേഡ് (ഡിജിഎഫ്ടി) പുറത്തിറക്കിയ വിജ്ഞാപനപ്രകാരം, ഐടിസി (എച്ച്എസ്) കോഡ് 85491400ല്‍ വരുന്ന വസ്തുക്കളുടെ കയറ്റുമതിക്ക് നേരത്തേ സ്വതന്ത്ര അനുമതിയുണ്ടായിരുന്നു. വിലക്ക് ഉടന്‍ പ്രാബല്യത്തില്‍ വന്നു. ഇനിയൊരു ഉത്തരവുണ്ടാകുന്നതുവരെ തുടരും.
ഉപയോഗം കഴിഞ്ഞ ലിഥിയം അയണ്‍ ബാറ്ററികള്‍ പൊടിച്ച് സംസ്‌കരിക്കുമ്പോള്‍ ലഭിക്കുന്ന ഇരുണ്ട പൊടിമിശ്രിതമാണ് ബ്ലാക്ക് മാസ്. ബാറ്ററിയുടെ ഘടനയനുസരിച്ച് ഇതില്‍ ലിഥിയം, നിക്കല്‍, കോബാള്‍ട്ട് തുടങ്ങിയ ലോഹങ്ങള്‍ ഉണ്ടാകും. തുടര്‍സംസ്‌കരണത്തിലൂടെ ഇവ വേര്‍തിരിച്ചെടുത്ത് പുതിയ ബാറ്ററികള്‍ക്കാവശ്യമായ വസ്തുക്കള്‍ നിര്‍മിക്കാന്‍ ഉപയോഗിക്കാം.
വിലക്കിന്റെ കാരണം ഡിജിഎഫ്ടി വിജ്ഞാപനത്തില്‍ വിശദീകരിച്ചിട്ടില്ല. എന്നാല്‍ നിര്‍ണായക ധാതുക്കളുടെ ഇറക്കുമതി ആശ്രിതത്വം കുറയ്ക്കാന്‍ ആഭ്യന്തര റീസൈക്ലിങ് ശേഷി വര്‍ധിപ്പിക്കുകയാണ് കേന്ദ്രത്തിന്റെ പ്രഖ്യാപിത ലക്ഷ്യം. ഇതിനായി ദേശീയ നിര്‍ണായക ധാതു ദൗത്യത്തിനു കീഴില്‍ 1,500 കോടി രൂപയുടെ പ്രോത്സാഹന പദ്ധതിയുണ്ട്. ബ്ലാക്ക് മാസില്‍ നിന്ന് ലോഹങ്ങള്‍ വേര്‍തിരിച്ചെടുക്കുന്ന റീസൈക്ലിങ് യൂണിറ്റുകള്‍ക്കും ഈ പദ്ധതിയുടെ പ്രയോജനം ലഭിക്കും.
ബ്ലാക്ക് മാസ് വിദേശത്തേക്ക് പോകുന്നത് തടയുന്നതോടെ ആഭ്യന്തര റീസൈക്ലിങ് കമ്പനികള്‍ക്ക് കൂടുതല്‍ അസംസ്‌കൃത വസ്തു ലഭിച്ചേക്കും. അതില്‍ നിന്ന് എത്രത്തോളം ലോഹം ഇന്ത്യയില്‍ വീണ്ടെടുക്കാനാകുമെന്നത് രാജ്യത്തെ സംസ്‌കരണ ശേഷിയെ ആശ്രയിച്ചിരിക്കുന്നു.
Read DhanamOnline in English
Subscribe to Dhanam Magazine