റിലയൻസ് ഇൻഡസ്ട്രീസ് അധ്യക്ഷൻ മുകേഷ് അംബാനി ചൈനീസ് ടെക് ഭീമനായ ബൈറ്റ്ഡാൻസിന്റെ സഹസ്ഥാപകൻ ഷാങ് യിമിംഗിനെ മറികടന്ന് ഏഷ്യയിലെ ഏറ്റവും വലിയ ധനികനായി. റിലയൻസ് ഇൻഡസ്ട്രീസിന്റെ ഓഹരി മൂല്യത്തിലുണ്ടായ വൻ കുതിച്ചുചാട്ടമാണ് അംബാനിയുടെ ആസ്തി വർദ്ധിക്കാൻ കാരണമായത്.
ഫോർബ്‌സിന്റെ തൽസമയ ശതകോടീശ്വരന്മാരുടെ പട്ടിക പ്രകാരം മുകേഷ് അംബാനിയുടെ അറ്റ ആസ്തി 10.5 ശതമാനം വർദ്ധിച്ച് 88.8 ശതകോടി ഡോളറിലെത്തി ($88.8 billion). ആഗോളതലത്തിൽ 22-ാം സ്ഥാനത്താണ് നിലവിൽ അംബാനി. 84 ശതകോടി ഡോളർ ആസ്തിയുള്ള ഷാങ് യിമിംഗ് 25-ാം സ്ഥാനത്തും, 80.1 ശതകോടി ഡോളറുമായി അദാനി ഗ്രൂപ്പ് ചെയർമാൻ ഗൗതം അദാനി 26-ാം സ്ഥാനത്തുമാണ്. റിലയൻസ് ഓഹരികൾ കഴിഞ്ഞ ദിവസം (തിങ്കളാഴ്ച) ഏകദേശം 12 ശതമാനം ഉയർന്നതോടെ കമ്പനിയുടെ വിപണി മൂല്യത്തിൽ 19 ശതകോടിയിലധികം ഡോളറിന്റെ വർദ്ധനവുണ്ടായി.
ജൂലൈ-സെപ്റ്റംബർ പാദത്തിൽ റിലയൻസ് ഇൻഡസ്ട്രീസ് കുറിച്ച എക്കാലത്തെയും മികച്ച സാമ്പത്തിക ഫലങ്ങളാണ് ഓഹരി വിപണിയിൽ പ്രതിഫലിച്ചത്. കമ്പനിയുടെ ആകെ വരുമാനം 28 ശതമാനം വർദ്ധിച്ച് 3.62 ലക്ഷം കോടി രൂപയും, അറ്റ ലാഭം 34 ശതമാനം ഉയർന്ന് 29,550 കോടി രൂപയുമെന്ന റെക്കോർഡ് തലത്തിലെത്തി. ഓയിൽ-ടു-കെമിക്കൽസ് (O2C) ബിസിനസ്, ഡിജിറ്റൽ സർവീസസ്, റീട്ടെയിൽ എന്നീ വിഭാഗങ്ങളിലെ ശക്തമായ വളർച്ചയാണ് ഈ നേട്ടത്തിന് കാരണമായത്. O2C വരുമാനം 44.2 ശതമാനം വർദ്ധിച്ച് ₹2.32 ലക്ഷം കോടിയായി ഉയർന്നപ്പോൾ EBITDA 67.9 ശതമാനം വർദ്ധിച്ചു.
ജിയോ പ്ലാറ്റ്‌ഫോംസിന്റെ ലിസ്റ്റിംഗ്: മുകേഷ് അംബാനിയുടെ നിയന്ത്രണത്തിലുള്ള ജിയോ പ്ലാറ്റ്‌ഫോംസ് ഒക്ടോബർ 28 ന് ഓഹരി വിപണിയിൽ ലിസ്റ്റ് ചെയ്തതും 27 ശതമാനം നേട്ടത്തോടെ അരങ്ങേറ്റം കുറിച്ചതും റിലയൻസിന്റെ കുതിപ്പിന് കരുത്തേകി. 53.3 കോടിയിലധികം വരിക്കാരുള്ള ജിയോ പ്ലാറ്റ്‌ഫോംസിന്റെ ഐ.പി.ഒ (IPO) വഴി 3.2 ശതകോടി ഡോളറാണ് സമാഹരിച്ചത്.
റിലയൻസ് ഇൻഡസ്ട്രീസ് (RIL) ഓഹരി ഇന്ന് (നവംബർ 3) പ്രോഫിറ്റ് ബുക്കിംഗിനെ തുടർന്ന് നേരിയ ഇടിവ് രേഖപ്പെടുത്തി. കഴിഞ്ഞ ദിവസത്തെ (തിങ്കളാഴ്ച) വ്യാപാരത്തിൽ 11.6% എന്ന റെക്കോർഡ് കുതിപ്പോടെ ₹1,300-ൽ ക്ലോസ് ചെയ്ത ഓഹരി, ഇന്ന് ഒരു ശതമാനത്തിലധികം താഴ്ന്ന് ₹1,282 വരെ എത്തിയിരുന്നു. ഓഹരി ഇന്ന് എൻ.എസ്.ഇ-യിൽ (NSE) ₹1,307.90 എന്ന നിലയിൽ വ്യാപാരം അവസാനിപ്പിച്ചു. മുൻ ദിവസത്തെ ക്ലോസിംഗ് വിലയായ ₹1,300.00-ൽ നിന്ന് ₹7.90 (0.61%) വർധനയാണിത്.
Read DhanamOnline in English
Subscribe to Dhanam Magazine