കൂട്ടുകാരൻ തന്നെ ശത്രുവാകുമോ? മൈക്രോസോഫ്റ്റുമായുള്ളത് അടുത്ത ബന്ധം, പക്ഷെ കമ്പനിയില്‍ നിന്ന് വലിയ അപകടസാധ്യതയെന്ന് ചാറ്റ് ജി.പി.ടി

തങ്ങളുടെ ബിസിനസ് പങ്കാളിയായ മൈക്രോസോഫ്റ്റില്‍ നിന്ന് അപകടസാധ്യതയുളളതായി (Risk factor) വ്യക്തമാക്കി ഓപ്പൺഎഐ (OpenAI). ഐപിഒയ്ക്ക് (IPO) മുന്നോടിയായി തയാറാക്കിയ രേഖയിലാണ് മൈക്രോസോഫ്റ്റുമായുള്ള അമിത ആശ്രിതത്വം കമ്പനി വെളിപ്പെടുത്തിയത്. ഓപ്പൺഎഐയുടെ സാമ്പത്തിക സഹായത്തിന്റെയും കമ്പ്യൂട്ടിംഗ് ശേഷിയുടെയും (Compute) വലിയൊരു ഭാഗം നൽകുന്നത് മൈക്രോസോഫ്റ്റാണ്.

ഈ വാണിജ്യ പങ്കാളിത്തത്തിൽ മൈക്രോസോഫ്റ്റ് എന്തെങ്കിലും മാറ്റം വരുത്തുകയോ അല്ലെങ്കിൽ ഇത് അവസാനിപ്പിക്കുകയോ ചെയ്താൽ, അത് ഓപ്പൺഎഐയുടെ പ്രവർത്തന ഫലങ്ങളെയും സാമ്പത്തിക സ്ഥിതിയെയും സാരമായി ബാധിച്ചേക്കാമെന്ന് സിഎൻബിസി റിപ്പോര്‍ട്ടില്‍ പറയുന്നു. മൈക്രോസോഫ്റ്റ് കൂടാതെയുളള മറ്റ് പങ്കാളികളുമായി വിജയകരമായി ബന്ധം സ്ഥാപിക്കാൻ കഴിയുമോ എന്നതിനെ ആശ്രയിച്ചിരിക്കും സാം ആൾട്ട്മാന്റെ ഓപ്പൺഎഐയുടെ പ്രവർത്തന ഫലങ്ങൾ.

പരസ്പരം മത്സരം

മൈക്രോസോഫ്റ്റിന് പുറമെ കൂടുതൽ പങ്കാളികളെ കണ്ടെത്തുക എന്നത് കമ്പനിയുടെ നിലനിൽപ്പിന് അത്യന്താപേക്ഷിതമാണ്. കൂടാതെ, ഇരു കമ്പനികളും നിലവിൽ എഐ വിപണിയിലെ ഉപഭോക്താക്കൾക്കായി പരസ്പരം മത്സരിക്കുന്നുമുണ്ട്. മൈക്രോസോഫ്റ്റ് ഇതുവരെ ഓപ്പൺഎഐയിൽ 13 ബില്യൺ ഡോളർ നിക്ഷേപിച്ചിട്ടുണ്ട്. വർഷങ്ങളായി ആമസോൺ, ആപ്പിൾ, ഗൂഗിൾ, മെറ്റ എന്നിവയെയാണ് സത്യ നദെല്ല നയിക്കുന്ന മൈക്രോസോഫ്റ്റ് എതിരാളികളായി പരിഗണിച്ചിരുന്നത്. എന്നാല്‍ 2024 വാർഷിക റിപ്പോർട്ടിൽ മൈക്രോസോഫ്റ്റ് ഓപ്പൺഎഐയെ എതിരാളികളുടെ പട്ടികയിൽ ചേർത്തു.

മറ്റ് അപകടസാധ്യതകൾ

മൈക്രോസോഫ്റ്റ് മാത്രമല്ല ഓപ്പൺഎഐ നേരിടുന്ന ഏക വെല്ലുവിളി. താഴെ പറയുന്ന കാര്യങ്ങളും കമ്പനി അപകടസാധ്യതകളായി ചൂണ്ടിക്കാട്ടുന്നു.

ചിപ്പ് ക്ഷാമവും വിതരണ തടസവും: എഐ മോഡലുകൾ പരിശീലിപ്പിക്കുന്നതിന് വലിയ തോതിൽ കമ്പ്യൂട്ടേഷണൽ വിഭവങ്ങൾ ആവശ്യമാണ്. ആഗോളതലത്തിലുള്ള ചിപ്പ് ക്ഷാമം ബിസിനസിനെ തകർക്കാൻ സാധ്യതയുണ്ട്. പ്രത്യേകിച്ച്, തായ്‌വാൻ സെമികണ്ടക്ടർ മാനുഫാക്ചറിംഗ് കമ്പനിയെ (TSMC) ബാധിക്കുന്ന പ്രാദേശിക സംഘർഷങ്ങൾ വലിയ തടസങ്ങൾ സൃഷ്ടിച്ചേക്കാം.

നിയമപരമായ വെല്ലുവിളികൾ: ഇലോൺ മസ്‌കിന്റെ xAI യുമായുള്ള കോടതി യുദ്ധം കമ്പനി നേരിടുന്ന വലിയൊരു പ്രതിസന്ധിയാണ്. കൂടാതെ, ചാറ്റ്ജിപിടി പ്രേരിപ്പിച്ചു എന്ന് ആരോപിക്കപ്പെടുന്ന ആത്മഹത്യകളുമായി ബന്ധപ്പെട്ട കേസുകളും ഓപ്പൺഎഐ നേരിടുന്നുണ്ട്.

ഐപിഒ ഈ വര്‍ഷം?

2026 ന്റെ രണ്ടാം പകുതിയിൽ ഓഹരി വിപണിയില്‍ കമ്പനി ലിസ്റ്റ് ചെയ്യപ്പെടുമെന്നാണ് പ്രതീക്ഷിക്കുന്നത്. ചാറ്റ് ജിപിടിയുടെ മൂല്യം 1 ട്രില്യൺ ഡോളർ വരെയാകാൻ സാധ്യതയുള്ളതായി റോയിട്ടേഴ്‌സ് റിപ്പോർട്ട് ചെയ്തിരുന്നു. അതേസമയം, ഇത് അപകടസാധ്യത ഘടകങ്ങളുടെ ഒരു നിയമപരമായ വെളിപ്പെടുത്തൽ ആണെന്നും ഏതെങ്കിലും ഐപിഒ പ്രോസ്പെക്ടസുമായി ബന്ധപ്പെട്ടതല്ലെന്നും ഓപ്പൺഎഐ വക്താവ് പറഞ്ഞു. എന്നിരുന്നാലും എഐ വിപണിയിലെ കടുത്ത മത്സരവും സാങ്കേതിക വെല്ലുവിളികളുമാണ് ഇത് സൂചിപ്പിക്കുന്നത്.

_{OpenAI flags Microsoft dependency, chip shortages, and legal issues as key risks ahead of potential IPO.}