റിസർവ് ബാങ്ക് ഓഫ് ഇന്ത്യ (RBI) നിശ്ചയിച്ചിട്ടുള്ള കർശനമായ റീ-കെവൈസി (re-KYC) പൂർത്തിയാക്കാനുള്ള സമയപരിധിയായ സെപ്റ്റംബർ 15 അടുത്തെത്തിയിരിക്കെ, രാജ്യത്തെ ലക്ഷക്കണക്കിന് ചെറുകിട വ്യാപാരികളുടെ പേയ്മെന്റുകൾ തടസപ്പെടാൻ സാധ്യതയുണ്ടെന്ന് റിപ്പോർട്ടുകൾ. ഗൂഗിൾ പേ, പേടിഎം, ഫോൺപേ തുടങ്ങിയ പേയ്മെന്റ് അഗ്രിഗേറ്ററുകൾക്ക് ഈ പരിശോധനകൾ സമയപരിധിക്കുളളില് പൂർത്തിയാക്കാൻ കഴിയാത്തതാണ് ഈ പ്രതിസന്ധിക്ക് കാരണം.
നിരോധന ഭീഷണി: പുതിയ നിർദ്ദേശങ്ങൾ പാലിക്കാത്ത വ്യാപാരികളുടെ പേയ്മെന്റുകൾ തടഞ്ഞുവെക്കുമെന്ന് ആർബിഐ വ്യക്തമാക്കിയിട്ടുണ്ട്. നിലവിലുള്ള വിവരങ്ങൾ അനുസരിച്ച്, യുപിഐ ഇടപാടുകൾക്കായി ക്യുആർ (QR) കോഡുകൾ ഉപയോഗിക്കുന്ന ചെറുകിട ഓഫ്ലൈൻ വ്യാപാരികളിൽ 30 മുതൽ 35 ശതമാനം വരെ ആളുകൾക്ക് നിശ്ചിത സമയത്തിനുള്ളിൽ ഈ നടപടികൾ പൂർത്തിയാക്കാൻ കഴിഞ്ഞേക്കില്ല.
രേഖകളുടെ കുറവ്: ഒപ്പം പത്ത് ലക്ഷത്തോളം ചെറുകിട ഓൺലൈൻ സ്ഥാപനങ്ങളും ഈ വെല്ലുവിളി നേരിടുന്നുണ്ട്. ആവശ്യമായ കൃത്യമായ ഔദ്യോഗിക രേഖകളില്ലാത്ത ചെറുകിട പലചരക്ക് കടകൾ ഉൾപ്പെടെയുള്ള സാധാരണ വ്യാപാരികളെയാണ് ഇത് ഏറ്റവും കൂടുതൽ ബാധിക്കുന്നത്.
പരിശോധനാ രീതിയിലെ കടുപ്പം: തേർഡ് പാർട്ടി ഏജൻസികളെ ഒഴിവാക്കി പേയ്മെന്റ് അഗ്രിഗേറ്റർമാരുടെ സ്വന്തം ജീവനക്കാർ നേരിട്ടെത്തി (in-person) വേണം കെവൈസി പരിശോധനകൾ നടത്താൻ എന്ന് ആർബിഐ നിർബന്ധമാക്കിയിട്ടുണ്ട്. ഇത് പേടിഎം, ഫോൺപേ, ഗൂഗിൾ പേ തുടങ്ങിയ കമ്പനികൾക്ക് വലിയ പ്രതിസന്ധിയാണ് സൃഷ്ടിക്കുന്നത്.
2025 സെപ്റ്റംബറിലാണ് പെയ്മെന്റ് അഗ്രിഗേറ്റർമാരെ പിഎ-ഓൺലൈൻ, പിഎ-ഫിസിക്കൽ, പിഎ-ക്രോസ് ബോർഡർ എന്നിങ്ങനെ തരംതിരിച്ച് ആർബിഐ ഈ മാസ്റ്റർ ഡയറക്ഷൻ പുറപ്പെടുവിച്ചത്. സമയപരിധിക്ക് മുൻപ് പരമാവധി കെവൈസി പൂർത്തിയാക്കാൻ കമ്പനികൾ ശ്രമിക്കുന്നുണ്ടെങ്കിലും ചെറിയ കടകൾക്ക് ഈ സമയപരിധി പാലിക്കാന് സാധിക്കില്ലെന്നാണ് കരുതുന്നത്.
Read DhanamOnline in English
Subscribe to Dhanam Magazine