ഇന്ത്യയിൽ അതിവേഗ സാറ്റലൈറ്റ് ഇന്റർനെറ്റ് സേവനങ്ങൾ ലഭ്യമാക്കാൻ പൂർണ സജ്ജരാണെന്ന് ഇലോൺ മസ്കിന്റെ പ്രമുഖ സാറ്റലൈറ്റ് ഇന്റർനെറ്റ് സംരംഭമായ 'സ്റ്റാർലിങ്ക്' (Starlink). കഴിഞ്ഞ അഞ്ച് വർഷത്തിലേറെയായി രാജ്യത്തെ റെഗുലേറ്റര്‍മാരായും ടെലികോം വ്യവസായ പങ്കാളികളുമായും ചേർന്ന് കമ്പനി പ്രവർത്തിച്ചുവരികയാണെന്ന് സ്റ്റാർലിങ്ക് അറിയിച്ചു. ഇന്ത്യൻ ഉപഭോക്താക്കൾക്ക് സുരക്ഷിതമായി സേവനം നൽകുന്നതിനായി ആവശ്യമായ ഗേറ്റ്‌വേകളും ഡെഡിക്കേറ്റഡ് സിസ്റ്റങ്ങളും മറ്റ് അടിസ്ഥാന സൗകര്യങ്ങളും സർക്കാരിന്റെ ആവശ്യമായ ഔദ്യോഗിക അനുമതികളോടെ രാജ്യത്തിനുള്ളിൽ തന്നെ നിർമ്മിച്ചിട്ടുണ്ടെന്നും കമ്പനി വ്യക്തമാക്കി.
സ്റ്റാർലിങ്കിന്റെ സേവനങ്ങൾക്ക് ഇന്ത്യയിൽ അനുമതി ലഭിക്കുന്നത് വൈകുന്നതുമായി ബന്ധപ്പെട്ട് മുൻപ് മസ്കും റിലയൻസ് ഗ്രൂപ്പും തമ്മിൽ പരസ്യമായ വിമർശനങ്ങൾ നിലനിന്നിരുന്നു. എന്നാൽ ഇതിന് മറുപടിയായി, സ്റ്റാർലിങ്ക് ഉൾപ്പെടെയുള്ള വിദേശ മത്സരങ്ങളെ റിലയൻസ് ഇൻഡസ്ട്രീസ് സ്വാഗതം ചെയ്യുന്നതായും ഉപഭോക്താക്കൾക്ക് ആരാണ് മികച്ച സേവനം നൽകുന്നത് എന്ന് തെളിയിക്കാനുള്ള യഥാർത്ഥ പരീക്ഷണമാണ് മത്സരമെന്നും റിലയൻസ് വ്യക്തമാക്കി.
2016-ൽ ഒരു ഉപഭോക്താവ് പോലും ഇല്ലാതെ പ്രവർത്തനം ആരംഭിച്ച ജിയോ, ഇന്ന് 53 കോടിയിലധികം (530 million) ഉപഭോക്താക്കളുടെ വിശ്വാസ്യത നേടിയത് മത്സരത്തിലൂടെയാണെന്നും കമ്പനി പറഞ്ഞു. കൂടാതെ ജിയോയുടെ സ്വന്തം സാറ്റലൈറ്റ് സേവനങ്ങളും സർക്കാരിന്റെ അന്തിമ അനുമതിക്കായി കാത്തിരിക്കുകയാണെന്നും റിലയൻസ് അറിയിച്ചു.
റിലയൻസിന്റെ ഈ നിലപാടിനെ സ്വാഗതം ചെയ്തുകൊണ്ട് ഇലോൺ മസ്ക് സമൂഹമാധ്യമമായ 'എക്‌സിൽ' (X) "വളരെ പ്രശംസനീയം" (Much appreciated) എന്ന് കുറിച്ച് റിലയൻസിന് നന്ദി അറിയിച്ചു. ഇതിനു പിന്നാലെയാണ് സ്റ്റാർലിങ്കും പ്രസ്താവനയിറക്കിയത്. ഇതോടെ ഇന്ത്യൻ സാറ്റലൈറ്റ് കമ്മ്യൂണിക്കേഷൻ രംഗത്തെ അനുമതി നടപടികളും മത്സരവും പുതിയ ഘട്ടത്തിലേക്ക് കടന്നിരിക്കുകയാണ്.
Read DhanamOnline in English
Subscribe to Dhanam Magazine